Kia gələn ilin əvvəllərində keçiriləcək Cenevrə avtomobil şousunda ilk dəfə gələcək modelləri üçün istifadəsi nəzərdə tutulan və brendin Avropa tədqiqat və inkişaf mərkəzi tərəfindən yaradılan yeni innovativ yüngül güc aqreqatını nümayiş etdirdi. Sərgi üçün yaradılmış Kia Optima T-Hybrid şoukarı Kia-nın yeni yüngül hibrid güc aqreqatının ilk dəfə tətbiq edildiyi və nümayiş etdirildiyi modelidir.   

T-Hybrid konseptinin kapotunun altında Optima üçün nəzərdə tutulmuş 1,7-litrlik CRDI turbodizel mühərriki ilə yanaşı 48-voltluq qurğuşun-karbon akkumulyatorla çalışan kiçik elektrik motora malikdir. Yeni güc aqreqatı Optima T-Hybrid avtomobilinə aşağı sürətdə yalnız elektrik rejimdə hərəkət edilməsinə imkan verir və sürəti yavaşadanda akkumulyatorları enerji ilə təchiz edir.

Litium-ion akkumulyatorundan fərqli olaraq Kia-nın yüngül hibrid güc aqreqatı üçün seçilmiş qurğuşun-karbon akkumulyatorları heç bir aktiv soyutma tələb etmir və istismaq müddəti başa çatdıqda daha asanlıqla utilizasiya olunur.

Avtomobil sıfır emissiyalı start-stop sistemi ilə təchiz olunub və ənənəvi generatoru yeni qayış ötürməli starter-generator əvəz edib. Bu isə o deməkdir ki, mühərrik demək olar ki, heç bir səs və vibrasiya olmadan işə düşür. Bu güc aqreqatının Optima sedanına yerləşdirilməsi nəticəsində daha kiçik ölçülü akkumulyator və starter istifadə etmək imkanı yaranıb ki, bu da avtomobilin çəkisinin oxlar üzrə paylaşmasını və idarəetməni daha da yaxşılaşdırıb.

Sistem həmçinin CRDi mühərrikinə aşağı dövrələrdə mühərrikin reaksiyasının və fırlanma anının artmasına kömək edən ənənəvi turboüfürücü ilə yanaşı innovativ elektrik kompressorun quraşdırılmasına da imkan verir. Yeni T-Hybrid güc aqreqatı Kia alıcılarına daha mükəmməl performans və daha az istismar xərcləri vəd edir. 

Optima T-Hybrid avtomobilindəki yeni güc aqreqatına dair heç bir performans və ya yanacaq sərfiyyatı göstəriciləri mövcud deyil. Lakin Kia mühəndisləri yeni güc aqreqatı ilə təchiz ediləcək hər hansı bir model üçün gücün 15-20 faiz arasında artacağını və CO2 tullantılarının əhəmiyyətli dərəcədə azalacağını ehtimal edirlər. Hal-hazırda Optima-nın 136 a.g.-ə malik 1,7 litr həcmində dizel mühərriki 128 q/km CO2 emissiyası hasil edir (ISG start-stop və mexaniki transmissiya ilə təchiz edildiyi halda).

Sərgi üçün hazırlanmış Kia Optima T-Hybrid avtomobilinin kütləvi istehsalı ilə əlaqədar heç bir plan hələ təsdiqlənməyib. Gələcəkdə Kia modelləri üçün T-Hybrid transmissiyasının tətbiq ediləcəyi barədə müzakirələr gedir.