Yeni Volkswagen Golf VII

Просмотров: 1997
Yeni Volkswagen Golf VII
  • Yeni Volkswagen Golf VII
  • Yeni Volkswagen Golf VII
  • Yeni Volkswagen Golf VII
  • Yeni Volkswagen Golf VII
  • Yeni Volkswagen Golf VII

Ötən ay Berlin Milli qalereyasında uzun müddətdən bəri gözlənilən Volkswagen Golf VII avtomobilinin təqdimatı oldu. 2013-cü model ilinin yeni VW Golf 2013 modeli avtomobil bazarına müasir görünüşdə çıxır. Onun ölçüləri bir qədər böyüyüb, klirensi kiçildilib, sürücü və sərnişinlər üçün komfortluluq artırılıb. Qənaətcil mühərriklərin, təhlükəsizlik sistemlərinin və komplektasiyaların zəngin siyahısı alıcıya öz istəyinə uyğun olaraq maksimal dərəcədə fərdi avtomobil seçmək imkanı yaradacaq.

7-ci nəsil VW Golf avtomobili çəkisini xeyli dərəcədə itirib, amma daha iri və relyefli görünüş əldə edib. Hetçbekin ümumi uzunluğu 56 mm artıb (4.255 mm), təkər bazası isə 59 mm artıb (2.637 mm). Bundan əlavə, avtomobilin eni 13 mm artıb (1.799 mm), hündürlüyü isə 28 mm azalıb (1.452 mm). Alman avtomobil istehsalçısı ölçülərdəki artımlardan səmərəli istifadə edərək onları salonda və baqaj bölməsində əlavə məkana çevirməyi bacarıb. Nəticədə Volkswagen Golf VII-nin arxa sərnişinlərinin ayaqları üçün sərbəst məkan 1,5 sm, çiyinləri üçün məkan isə 3 sm artıb, baqaj bölməsinin həcmində artım 30 litr təşkil edir. Sürücü və qabaq sərnişin üçün məkan da genişlənib. Bundan başqa, arxa və ön sərnişin oturacaqlarını qatlamaqla 380 litrlik baqaj bölməsinin həcmini asanlıqla artırmaq olar. Bu vəziyyətdə baqaj bölməsində 2412 mm uzunluğu olan yükü rahatca aparmaq olar.

VW Golf VII-nin eksteryerinin dizaynı işıq-diod lampaları olan yeni faraları, yeni radiator barmaqlığı və yeni arxa fənərləri ilə (onlar da işıq-diod texnologiyasına əsaslanır) seçilir. Avtomobilin interyerində əhəmiyyətli dəyişikliklər aparılıb. VW Golf VII-nin mərkəzi konsolunda sensor ekranlı informasiya-əyləncə sistemi diqqəti cəlb edir. Versiyadan asılı olaraq onun ölçüsü 5,8 düymdən 8,0 düymədəkdir. Gözlənildiyi kimi, Golf VII 2013-ün avadanlıqları sırasına Bluetooth, rəqəmsal radio və USB də daxil olmaqla hər cür qoşulma imkanları daxildir.

Yeni Volkswagen Golf VII-nin təhlükəsizlik sistemləri

Yenilənmiş hetçbekin təhlükəsizlik sistemləri siyahısına həm çoxlu standart sistemlər, həm də əlavə opsiya qismində təklif olunanlar daxildir. Volkswagen təmsilçilərinin bildirdiyinə görə, Golf VII-nin bəzi sistemləri ilə əvvəllər yalnız premium-klass avtomobilləri təchiz olunurdu. Aşağıda Volkswagen Golf VII-nin təhlükəsizlik sistemlərini diqqətinizə çatdırırıq:
•    Yeni dayandırıcı elektron əyləc;
•    Bir neçə toqquşmanın təsiri ilə avtomatik əyləclənmə sistemi;
•    Adaptiv kruiz-kontrol (150 km/saatadək);
•    Şəhər yollarında ekstremal əyləcləmə sistemi (30 km/saatadək);
•    Avtomobili öz hərəkət zolağında saxlayan sistem;
•    Qaçılmaz qəza zamanı bir sıra tədbirlər görən PreCrash sistemi.

Aktiv kruiz-kontrolu olan Volkswagen Golf VII-nin sürücüsü 150 km/saat sürətlə hərəkət zamanı təhlükə barədə narahat olmaya bilər. Qarşıda gedən nəqliyyat vasitəsi maneə yaratdıqda avtomobilin hərəkətini yavaşıtmaqdan tutmuş onu tam dayandırana qədər hər şeyi sistem özü edir. Həmçinin şəhər rejimində 30 km/saatadək sürətlə hərəkət zamanı yolda qarşıya mane çıxdıqda avtomobili dayandıran ekstremal əyləcləmə sistemi nəzərdə tutulub. İlk dəfə Touareg modelində debüt etmiş PreCrash sistemi isə təhlükəsizlik kəmərlərinin vəziyyətini nizamlayır və toqquşma qaçılmaz olduqda lyukla pəncələri bağlayır.

Yeni Volkswagen Golf VII-nin mühərrikləri

1. TSI benzin mühərriki: 1,2 litr həcmə və 85 at gücünə malikdir, 100 km məsafəyə 4,9 litr yanacaq sərf edir, atmosferə atılan zərərli tullantıların miqdarı 1 kilometrə 113 qramdır;
2. TSI benzin mühərriki: 1,4 litr həcmə və 140 at gücünə malikdir, 100 km məsafəyə 4,8 litr yanacaq sərf edir, atmosferə atılan zərərli tullantıların miqdarı 1 kilometrə 112 qramdır;

3. TDI dizel mühərriki: 1,6 litr həcmə və 105 at gücünə malikdir, 100 km məsafəyə 3,8 litr yanacaq sərf edir, atmosferə atılan karbon qazının miqdarı 1 kilometrə 99 qramdır;

4. 2,0 litr həcmə və 150 at gücünə malik dizel mühərriki: 100 km məsafəyə 4,1 litr yanacaq sərf edir, atmosferə atılan karbon qazının zərərli tullantıların miqdarı 1 kilometrə 106 qramdır.

İkinci benzin motoru yeni texnologiya ilə təchiz olunur. Bu texnologiya yüksək sürətlə hərəkət zamanı 4 silindrdən ikisinin işini dayandırmağa imkan verir ki, bunun da sayəsində yanacaq sərfiyyatının xeyli azalmasına nail olunur. Bütün mühərriklər üçün "start/stop" idarəetmə sistemi nəzərdə tutulub. Bundan başqa, əyləclənmə zamanı akkumulyator enerji ehtiyatı yığa bilir ki, bu da yanacağa qənaət edilməsinə əlavə yardım edir.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.