Yeni Infiniti QX56-nın test-drayvı

Просмотров: 2404
Yeni Infiniti QX56-nın test-drayvı
  • Yeni Infiniti QX56-nın test-drayvı
  • Yeni Infiniti QX56-nın test-drayvı
  • Yeni Infiniti QX56-nın test-drayvı
  • Yeni Infiniti QX56-nın test-drayvı
  • Yeni Infiniti QX56-nın test-drayvı
  • Yeni Infiniti QX56-nın test-drayvı

Öz sinfindəki avtomobillər, yəni nəhəng ofrouderlər arasında məhz Infiniti QX56 ən güclü təsir bağışlayır. Bu avtomobilin dizaynı sanki müşahidəçi ilə qeyri-adi bir dildə danışır. Özü də dizayn elə hazırlanıb ki, avtomobilin ölçülərini xüsusi vurğulayır. Infiniti-nin dizaynında yeni istiqamət son modellərin simasında özünü xüsusilə büruzə verir. Belə  ki, bu avtomobillər dizayn üslubuna görə dərhal tanınır. İstər QX, istərsə də M və FX avtomobillər kütləsindən seçilirlər. Daha "sakit xarakterli" G və EX modelləri isə, sadəcə, yaşca onlardan bir qədər böyükdürlər.

QX56 modeli Infiniti avtomobilləri ailəsinə başçılıq edir, şirkət bu avtomobilə böyük ümid bəsləyir. O, qəşəng və nöqsansız olmalıdır. Burada əvvəlki modeli xatırlamamaq olmaz. O, ölçüləri ilə diqqəti cəlb etsə də, lüks avtomobil təəssüratı yaratmırdı. Onun görünüşündə amerikan qabalığı hiss olunurdu. Onun salonunun tərtibatında ən son yeniliklər tətbiq edilsə də, hər halda amerikansayağı köntöylük sezilirdi. Buna görə də avtomobilin ikinci nəslinin hazırlanmasına yaponlar daha diqqətlə yanaşdılar. Onlar mahiyyət etibarilə yeni avtomobil hazılamış oldular.

Əvvəlcə modelin istehsalı ABŞ-dan Yaponiyaya köçürüldü. Hər halda "Made in Japan" ("Yaponiyada istehsal olunub") yazısını oxuyanda alıcılarda malın keyfiyyəti barədə müsbət təəssürat yaranır. QX56-nın indiki nəslinin hazırlandığı platformada ciddi dəyişikliklər edilib.

İkinci mühüm yenilik kapotun altında yeni mühərrikin peyda olmasıdır. Litrajı əvvəlki səviyyədə qalan bu V6 motoru daha effektiv işləyir. Onun gücü 325 at gücündən 405 at gücünədək, fırlanma momenti isə 533 Nm-dən 560 Nm-dək artırılıb. Gücünün bu qədər artmasına baxmayaraq, yeni mühərrik sələfindən cəmi 10% artıq yanacaq işlədir.

Avtomobilin göstəricilərindəki artıma qazbölüşdürmə fazalarının və klapanların açılma dərəcəsinin tənzimlənməsi (VVEL) sistemi sayəsində, habelə birbaşa yanacaqçiləmə sistemi (DIG) sayəsində nail olunub. 7 pilləli avtomat transmissiya (bloklanan transformatorla) motorla cütlük təşkil edir. Bu sürət qutusunun üstünlükləri özünü büruzə verir. Belə  ki, sürətyığma və yanacağa qənaət göstəriciləri yaxşılaşıb.

Fotoşəkillərdə bu avtomobil böyük görünür, reallıqda isə lap nəhəngə bənzəyir. Şəhər yollarında onu idarə etmək üçün sürücülük məharətinə malik olmaq lazımdır. Əlbəttə, Around View Monitor kameraları da sürücünün köməyinə çatır, amma çirkli havada onları daim təmizləməyə hazır olmaq lazımdır.

Bu nəhəngin dizaynını bəziləri bəyənə, digərləri isə bəyənməyə bilər, amma heç kim onun dizaynına biganə qala bilməz. Onun cizgiləri Infiniti həvəskarlarına yaxşı tanışdır və asanlıqla tanınır, xromla işlənmiş kuzovun üslubu və alüminium xəlitəsindən hazırlanan 22 düymlük effektli tökmə disklər QX56-nın təmtəraqlı və zəngin avtomobil olmasına işarədir.

İnteryer isə daha da təmtəraqlıdır. Kompaniya təmsilçiləri bu avtomobilin salonunu biznes-jetin salonu ilə müqayisə edirlər. Bu müqayisə ilə mübahisə etmək çətindir. Salona girən kimi nəhəng ağ məkan səni ağuşuna alır. Kreslolara dəlikli yarı anilin dəridən üzlük çəkilib. Sürücünün oturacağı 10 mövqe üzrə tənzimlənir. İsitmə və ventilyasiya sistemləri də var. Taxta-dəri multisükan iki müstəvidə elektrik tənzimlənmə və isidilmə sistemi ilə təchiz olunub. Simmetrik mərkəzi konsol ağac materialla gen-bol işlənib. Həmçinin metal elementlərdən də istifadə olunub.

Arxa cərgəyə keçməyin əsl vaxtıdır. Testdən keçirdiyimiz avtomobil maksimal komplektasiyalıdır, arxada VİP-şəxslər üçün iki kreslo var, onları iri boks ayırır. Məkanın genişliyinə söz yoxdur, hətta istəsəniz, ayağınızı ayağınızın üzərinə aşıra bilərsiniz. Burada həmçinin mikroiqlimi idarəetmə bloku, stəkan altlıqları və isitmə sistemi də var. Qabaq kresloların baş altlıqlarına səliqə ilə multimedia sisteminin monitorları quraşdırılıb. 13 dinamik əla səs ucalığını təmin edir, onlardan ikisi aşağı tezliklidir. İstəsəniz, pleyeri qoşa və ya kinoya baxa bilərsiniz.

İndi isə bir qədər də arxaya keçək. Üçüncü cərgəyə keçmək üçün 2-ci cərgədəki kresloları qatlamaq lazımdır, bunun üçün xüsusi düymə var. Nominal olaraq orada üç nəfər otura bilər. Amma üçüncü cərgədə hətta iki nəfər üçün də yer geniş deyil. Bu yerlər uşaqlar üçün daha yaxşıdır.

Yeri gəlmişkən, oturacaqları birbaşa baqaj bölməsindən qatlamaq olar, bunun üçün sadəcə klavişlərə basmaq kifayətdir. Bu zaman kifayət qədər hamar döşəmə əmələ gəlir və yetərincə geniş məkan yaranır, ondan müxtəlif məqsədlər üçün istifadə etmək olar. Beşinci qapı elektrik ötürücüsü ilə təchiz olunub və yalnız tam açılır.

Mühərrik rəvan işləyir və səsi qətiyyən eşidilmir, yalnız 3000 fırlanma dövrəsinə çatdıqda xoşagəlimli uğultu eşidilir. Məhdudlaşdırıcı həddə çatdıqda isə mühərrik avtomobili böyük sürətlə qovur. Çəkisi 2.654 kiloqram olan avtomobilin 100 km/saat sürət yığmasına cəmi 6,5 saniyə tələb olunur! Güclü sürətyığma potensialı 180-200 km/saat göstəricisinədək davam edir. Nəhəng universalın maksimal sürəti isə 210 km/saat təşkil edir. Bu nəhəngin yolda necə rahat şütüdüyünü görəndə bu ağırlıqda avtomobilin bu cür asanlıqla sürətini artırmasına təəccüblənirsən.

Asqı yoldakı nahamarlıqların öhdəsindən asanlıqla gəlir, sanki onları udur. Yeni QX56 yoldakı döngə-dalanları sələfindən daha rahat dəf edir. Qarşıya kəskin döngələr çıxdıqda asqı sanki sehrli şəkildə sıxılır, bu ölçüdə avtomobil üçün döngələrdə yana meyllənmələr çox aşağı səviyyədədir. Hərəkətin rəvanlığı daha yaxşı, idarəetmə daha rahatdır.

Tam ötürücülü sistem hələ "ötən seriyadan" dəyişikliyə uğramayıb. Əvvəllər olduğu kimi, əsas vurğu arxa oxun üzərinə düşür, ön tərəfə isə "enerjinin" 50%-ini ötürmək olar. Təkərlərarası differensiallar sərbəstdir. Aşağı profilli şinlər taxılmış 22 düymlük diskləri olan effektli təkərlərlə səkiyə ehtiyatla çıxmaq lazım gəlir. Yolsuzluq şəraitindən isə heç danışmağa dəyməz. Amma etiraf etmək lazımdır ki, bu ramalı avtomobildə nəzəri cəhətdən ofrouder potensialı var, bamperlər hündürdə yerləşir, ön tərəfin yerə nəzərən maillik bucağı böyük deyil.

Səs izolyasiyası və vibroizolyasiya baxımından bu avtomobildə hər şey qaydasındadır. Belə ki, ətrafdakı səs-küy, demək olar ki, hiss olunmur, salonun qabaritləri isə səs-küyü daha da azaldır. Hətta qabaritlərinə görə QX56-ya bənzəyən ofrouderlər bu avtomobilin salonundan cırtdan kimi görünür. Avtomobil cürbəcür opsiyalarla təchiz olunub. Buna misal olaraq, yerdəki nişanları izləyən sistemi göstərmək olar. Amma bu funksiya o halda işləyir ki, yol təmiz olsun və yerdəki nişanlar, zolaqlar görünsün. Əks halda skaner onları nəzərdən qaçıracaq.

QX56-nın qiymətinə gəlincə, bu cür keyfiyyətə və opsiyalara malik avtomobil üçün qiymət tamamilə uyğundur. QX56-nın satışlarının tam uğur qazanması qarşısında yeganə maneə avtomobilin həddən artıq təmtəraqlı və bol təchizatlı olmasıdır. Bir çox adamlar gözə dərhal sataşan üsluba deyil, daha az nəzərə çarpan üsluba üstünlük verirlər.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.