Yeni Chevrolet Malibu

Просмотров: 4310
Yeni Chevrolet Malibu
  • Yeni Chevrolet Malibu
  • Yeni Chevrolet Malibu
  • Yeni Chevrolet Malibu
  • Yeni Chevrolet Malibu
  • Yeni Chevrolet Malibu
  • Yeni Chevrolet Malibu

General Motors (GM) konserninin tərkibinə daxil olan Chevrolet şirkəti növbəti dəfə fürsətdən istifadə etdi və dünyanın avtomobil arenalarında öz yeniliklərini nümayiş etdirmək üçün hərəkətə keçdi. Bu dəfə o, yeni avtomobilini paralel olaraq dünyanın iki müxtəlif qütbündə – Nyu-Yorkda və Şanxayda nümayiş etdirdi. Hərçənd ki, şirkətin təqdim etdiyi Chevrolet Malibu avtomobilinə yaxından nəzər saldıqda onu tam yenilik adlandıra bilmərik. Amma bu barədə bir qədər sonra danışarıq.

Öncə yeni avtomobilin nümayiş etdirildiyi məkanlardan söz açaq. Nyu-York Chevrolet-in doğma torpağıdır. Elə Şanxay da təsadüfən seçilməyib. Axı bu gün Çin bazarı sürətli artımı və həcmi sayəsində dünya avtomobil istehsalçıları üçün prioritet bazardır. Chevrolet Malibu-nun təqdimatı ən dəbdə olan müasir marketinq texnologiyasından istifadə edilməklə – birbaşa yayım vasitəsilə Facebook sosial şəbəkəsinə qoşulmaqla keçirildi. 2012-ci model ilinin avtomobili yeni Chevrolet Malibu bütün qitələrdə satılacaq.

Yeni avtomobilin xarici görünüşünün təsvirinə belə bir faktdan başlamaq lazımdır ki, yeni Chevrolet Malibu qlobal Epsilon II platformasında hazırlanıb və onun eksteryeri bir sıra cəhətlərinə görə GM modellərinin çoxuna bənzəyir. Xatırladaq ki, öncə bu platformada  GM konserninin Opel Insignia, Buick LaCrosse, Buick Regal, Saab 9-5 kimi modelləri buraxılıb. Yeni Chevrolet Malibu-nun xarici görünüşü kifayət qədər maraqlı və pafoslu alınıb.

Avtomobilin dizaynında Avropa yönümü artıq hiss olunmaqdadır. Ön tərəfin işıq texnikası monumental falşradiator barmaqlığı ilə harmoniya təşkil edir, kapotun üzərində ifadəli xətlər diqqəti cəlb edir. Yan tərəflərdən arxaya doğru dizayn xətləri əla formaya malikdir, LED-elementlərlə işləyən arxa tərəfdəki Camaro işıq texnikası bu formanı daha da yaraşıqlı edir.

İri arxa dayaqlar avtomobilə daha sanballı görünüş, sərnişinlərə isə müdafiə altında olma və rahatlıq duyğusu verir. Uzunluğu 4850 mm, eni 1850 mm, hündürlüyü 1460 mm olan avtomobil kifayət qədər aqressiv və idmansayağı görünüşə malikdir. Təkər bazasının ölçüsü Opel Insignia-nın parametrləri ilə (2737 mm) üst-üstə düşür, baqaj bölməsinin həcmi 460 litr təşkil edir.

GM-in dizayn üzrə icraçı direktoru Brayan Nesbitt təqdimat mərasimindəki çıxışında vurğuladı ki, yeni Chevrolet Malibu amerikan avtomobil sənayesinin Chevrolet Corvette Chevrolet Camaro kimi pərəstişə layiq modellərinə xas olan idman ruhunu özündə təcəssüm etdirir. Yeni idman sedanının ölkəmizdəki avtomobil həvəskarlarının ürəyincə olub-olmayacağını gələcək göstərəcək. Bunun üçün bir qədər gözləmək lazım gələcək (təxminən 2012-ci ilin yazınadək).

Yeni Malibu-nun interyerinin dizaynını Chevrolet üçün özünəməxsus nailiyyət saymaq olar. İkirəngli torpedonun orijinal arxitekturası rəvan xətləri ilə birlikdə interyerin ümumi ahəngi ilə üzvi surətdə uzlaşır. Salonda 7 düymlük sensorlu monitor, maqnitola və klimat-kontrola rast gəlmək olar. Üçmilli multisükan da interyerin ümumi ahəngi ilə əla uzlaşır. Ümumən salon yalnız müsbət emosiyalar doğurur, amma üzlük materialları və interyer elementlərinin keyfiyyəti barədə danışmaq hələ tezdir. Əlbəttə, yaxşı olar ki, interyerin səviyyəsi Opel Insignia-nın səviyyəsindən geri qalmasın.

Malibu-nun texniki xarakteristikalarına gəldikdə, avtomobilin satışlarının lap əvvəlindən onu 190 at güclü, 2,5 litr həcmli dörd silindrli benzin mühərriki ilə təchiz etmək planlaşdırılır. Mühərrik altıpilləli Hydra-Matic 6T40 avtomat transmissiyası ilə tandemdə işləyir. Asqı Opel asqısı ilə eynidir, avtomobil elektrogücləndirici ilə, diskli ön və arxa əyləclərlə (ABC ilə) təchiz olunub.

Chevrolet Malibu təchizat səviyyəsinə görə D-Class” avtomobillərinin orta statistik təmsilçisi olmalıdır. Alıcılara təklif olunan opsiyalar sırasına bunlar daxildir: nişan xəttinin keçildiyi barədə xəbərdarlıq edən sistem, arxa tərəfi göstərən kamera, Bose audiosistemi (səkkiz dinamik və USB-portla), ölçüləri 17 düymdən 19 düymədək olan təkər diskləri, dəri salon. Ölkəmizdəki Chevrolet pərəstişkarlarına hansı komplektasiyaların təklif olunacağı barədə, xüsusən də avtomobilin ölkəmizdəki qiyməti barədə danışmaq hələlik tezdir.

Rəqiblər:

Hyundai Sonata,

Toyota Camry,

Honda Accord,

Opel Insignia,

Nissan Altima

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.     

Şərhlərin sayı: 0

AVATAR
Hələ heç kim şərh verməyib. Birinci siz olun.