X60 Azərbaycanda istehsal olunan ilk krossoverdir

Просмотров: 12521
X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir
  • X60 Azərbaycanda istehsal olunan ilk krossoverdir

2010-cu ilin yanvar ayının 11-də istismara verilmiş Naxçıvan Avtomobil Zavodunun (NAZ)  bu il fəaliyyətə başlamasının 2 ili tamam oldu. Zavod iki yaşını qeyd etdiyi ərəfədə SUV seqmentində təmsil olunan Lifan X60, 320 və 620 modellərinin avtomatik sürət qutusu ilə təchiz edilmiş versiyalarının istehsalına başladı.

Naxçıvan Avtomobil Zavodunun direktor müavini Polad Sadıxov “Avtomobil.az” jurnalına baş vermiş yeniliklər və zavodun gələcək planları haqqında danışdı.

 - Polad bəy, ötən iki il  hansı əlamətdar hadisələrlə yadda qaldı?

Fəaliyyətə başladığımız birinci ildə bizim müəssisə biznesdə “Uğur 2010” mükafatına layiq görüldü. Ötən il zavodda istehsal olunan avtomobillərin sayı 1.000 ədədi keçdi, həmçinin 2012-ci ildə istehsal olunacaq yeni modellər üçün hazırlıq işləri tam başa çatdırıldı.

- Zavodun inkişafında hansı göstəricilərə nail olunmuşdur? Son iki ildə istehsal həcmi neçə dəfə artmışdır?

2010-cu illə müqayisədə 2011-ci ildə istehsal olunan avtomobillərin həcmində 10% artım müşahidə olunub.

- Bu ilin sonuna hədəfiniz hansı səviyyədə istehsal göstəricisinə nail olmaqdır?

Yeni modellərin istehsal olunacağını nəzərə alaraq ən az 4 dəfə istehsal həcmini artırmaq nəzərdə tutulub.

- Hazırda NAZ tərəfindən hansı modellərin istehsalı həyata keçirilir?

Cari ildə yeni model daxil olmaqla 5 model istehsal olunacaq. Bunlar: NAZ-LİFAN 320, 520, 520i, 620 və X60 modelləridir. Bundan əlavə, onu qeyd etməliyəm ki, 320 və 620 modelləri bu ildən avtomatik transmissiya ilə təchiz olunurlar.

- Naxçıvan Avtomobil Zavodunun istehsal etdiyi avtomobillərə tələb necədir?

Zavodumuzda istehsal olunan avtomobillərə maraq və tələbat getdikcə artır. Çünki NAZ-LİFAN avtomobilləri qiymət və keyfiyyət baxımından optimal variant kimi qiymətləndirilə bilər.

- Naxçıvan Avtomobil Zavodu yeni X60 modeli ilə SUV bazarına daxil olur. Azərbaycan bazarında rəqabətin böyük olduğu bu seqmentdə özünüzü necə görürsünüz?

X60 modeli Azərbaycanda istehsal olunan ilk krossoverdir. Alıcıların marağına və tələbatına əsaslanaraq onu deyə bilərəm ki, istehsal etdiyimiz digər modellərə nisbətən daha çox satılma ehtimalı var.

- Bu il NAZ Lifan X60 modelindən  neçə ədəd istehsal edilməsi planlaşdırılır?

Birinci il üçün 500 ədəd X60 modelindən istehsal olunması nəzərdə tutulur. Lakin bu modelə tələbat artarsa, zavod il ərzində bu krossoverdən hətta 5.000 ədəd istehsal etmək gücünə malikdir.

- Xahiş edirəm, Lifan X60 avtomobilinin texniki göstəriciləri barədə ətraflı məlumat verərdiniz?

Lifan X60 avtomobili 133 at gücündə 1,8 litr,  4 silindr, 16 klapan, injektor mühərriklə təchiz olunur. Sürət qutusu 5 pilləli mexanikidir. Avtomobil Avro 3 ekoloji standartına cavab verir və 100 km-ə yanacaq sərfi 8,2 litr təşkil edir. Həmçinin avtomobilin sükanı hidravlik gücləndirici ilə təchiz olunub.

- Qeyd etdiniz ki, NAZ Lifan-320 və NAZ Lifan-620 markalı avtomobillərin avtomat sürət qutusu ilə istehsalına da başlanılıb. Bu qiymətlərin artmasına hansı səviyyədə təsir edə bilər?

Təbii ki, avtomatik transmissiya ilə təchiz olunan avtomobilin qiyməti nisbətən baha olacaq. Lakin şəhər yollarındakı intensivliyi nəzərə alsaq, alıcılar qiymət fərqinə o qədər də əhəmiyyət verməyərək, daha rahat idarəetməni üstün tutacaqlar.

- Bu il satış və xidmət şəbəkəsini genişləndirilməsi ilə bağlı nə kimi planlarınız var?

Artıq Naxçıvan, Bakı və Sumqayıt şəhərlərində NAZ-LİFAN avtomobillərinin satışı təşkil olunmuşdur. Bu il isə satış şəbəkəsinin genişləndirilərək respublikamızın qərb, cənub və şimal rayonlarını da əhatə etməsi nəzərdə tutulur.

- İstehsalın genişləndirilməsi və əlavə sərmayənin qoyulması gözlənilirmi?

Növbəti 2 il ərzində zavodda ştamp, qaynaq və rəngləmə xəttinin açılması, bəzi ehtiyat hissələrinin zavodda istehsalı nəzərdə tutulur. Beləliklə, istehsal etdiyimiz avtomobillərin maya dəyəri aşağı düşəcək, istehsalın və satışın həcmi isə artacaq.

- Hazırda buraxılan avtomobillərin xarici ölkələrə ixracı planlaşdırılırmı?

Bəli, bu istiqamətdə işlər aparılır. İstehsal etdiyimiz avtomobillərin lokallaşdırılmasına nail olduqdan sonra onları Azərbaycan məhsulu kimi xarici ölkələrə ixrac edə bilərik.

- Tərəfdaşınız olan Çinin Lifan avtomobil şirkəti son dövrlər inkişafında hansı uğurları əldə etmişdir?

Ötən il LİFAN şirkəti Çində avtomobil istehsal edən ilk şəxsi şirkət olaraq Şanxay birjasında qeydiyyatdan keçdi və öz səhmlərini ictimaiyyətə çıxardı. Həmin ilin dekabr ayının 21-də isə LİFAN şirkəti Çin XR-in Sənaye və Kommersiya Federasiyası tərəfindən “müstəqil innovasiya müəssisələri, layihələri və şəxsləri” nominasiyasında Elmi və Texniki Mükafata layiq görüldü.
Hazırda LIFAN Motors bir istehsal xətti ilə il ərzində 180.000 ədəd avtomobil istehsal edir. Çində avtomobil ixrac edən şirkətlərin sırasında ikinci yer tutan LİFAN Motors 2013-cü ilə qədər 2-ci istehsal xəttini istifadəyə verməklə illik istehsal gücünü 300.000 ədədə çatdıracaq.

- Lifan Motors şirkəti 2012-ci ildə LF620 modelini yeniləyəcəyini bəyan etmişdir. Eyni vaxtda Azərbaycanda da yenilənmiş modelin istehsalı nəzərdə tutulurmu?

620 modelinin yenilənmiş versiyasının LİFAN Motors tərəfindən ixracı 2014-cü ildə nəzərdə tutulur. Bu model ixraca buraxılan kimi Azərbaycanda da onun istehsalı təşkil olunacaq.

- Avtomobillərə texniki xidmətin göstərilməsini genişləndirmək üçün yeni texniki xidmət mərkəzlərinin yaradılması nəzərdə tutulub?

Yeni texniki xidmət stansiyalarının həm Naxçıvan MR-in iki bölgəsində, həm də əvvəlcədən qeyd etdiyim kimi, respublikamızın qərb, şimal və cənub regionlarında təşkil edilməsi planlaşdırılır.

- Lifan avtomobilləri təhlükəsizlik standartları istiqamətində necə irəliləyir? “Kraş” testlərdən neçə qiymət alır? 

LİFAN avtomobilləri dünyanın 80 ölkəsində satılır və təhlükəsizlik standartlarına tam cavab verir. Kraş testin nəticələrinə görə isə, bu avtomobillər 3 ulduza layiq görülmüşdür.

- Polad bəy, müsahibə üçün təşəkkür edirik.

 Seymur Yunusov

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.