Velosipedçinin yolu

Просмотров: 1743
Velosipedçinin yolu

Ötən həftə şənbə günü həyatımda ilk dəfə velosipedlə işə getdim. Heç vaxt düşünməzdim ki, iki təkər üzərində hərəkət bu qədər maraqlı və zövqlü olacaq. Günəşdən və təmiz havadan aldığım enerji bütün günümə bəs elədi. Çoxdandır belə məhsuldar gün keçirməmişdim. Evdən işə qədər olan məsafəni 35 dəqiqəyə qət etdim.

Müqayisə üçün deyim ki, avtomobillə bu yolu 15-20 dəqiqəyə gedirəm. Əlbəttə, qarajdan çıxmaq və parkinq yer tapmaq bura daxildir. İşdən sonra geri velosipedlə qayıdarkən bir qədər sürəti artırdım və 25 dəqiqəyə evdə oldum. Ayaqlarımda xoş bir yorğunluq var idi, buna baxmayaraq, bu cür səfərləri daha tez-tez təkrarlamağı qərara aldım.

Bazar günü isə Yaşıl Velosipedçilər klubunun təşkil etdiyi “Velosipedçinin səhəri” adlı tura yollandım. Əcəmi Naxçıvanı küçəsindən bulvara velosipedlə getdim və geri qayıtdım. Bu qısa (mənim üçün çox uzun) yol məndə tam əminlik yaratdı ki, Bakı ərazisində velosiped sürmək üçün heç bir şərait yoxdur. Avtomobil yollarının kənarında, piyada üçün nəzərdə tutulmuş hissələr ya çox dardır, ya da geniş olduğu təqdirdə orada çox bahalı avtomobillər “parkovka” edilib. Əgər siz risk edib avtomobil yoluna çıxsanız, burada sürücülərin münasibəti sözlə izah edilə bilməyəcək qədər dəhşətlidir.

Onlar ya sizin üstünüzə sürürlər, ya da müxtəlif eybəcər səs siqnalları ilə sizi çaşdırmağa çalışırlar. Əlbəttə, yol avtomobilçilərindir, amma bu o demək deyil ki, velosipedçilərə çətinlik yaratsınlar. Avtomobil sürücüləri velosipedçilərə elə münasibət göstərirlər ki, sanki, velosiped sürənlər başqa planetlərdən gəlmiş yadellilərdir. Yox... Əziz dostlar, onlar yadelli deyil, onlar elə mənəm, bizik, sənin-mənim dostlarımızdır, qohumlarımızdır... onlar azərbaycanlılardır...

Bu gün ölkədə velosipedçilərin sayı durmadan artır. Ekoloji cəhətdən təmiz olan bu nəqliyyat vasitələrinin hərəkəti üçün yollar gərəklidir. Bu yollar əsas magistrallardan bir qədər aralı olsa daha yaxşı olar. Bu həm təhlükəsizlik baxımından önəmlidir, həm də velosipedçinin avtomobilin mühərrikindən çıxan zərərli qazı udmaması üçün vacibdir.

Son zamanlarda Brüsseldə və Minskdə səfərdə olduğum zaman velosiped yolları, onların keyfiyyətini və insanlar üçün necə rahatlıq yaratdığının şahidi oldum. Xatırlayıram, internetdən oxuduğum məlumatlara əsasən, Danimarkada velosipedçilər müxtəlif aksiya və tədbirlər keçirərək hökuməti məcbur etdilər ki, onlar üçün xüsusi yollar çəkilsin. Belə də oldu...

Velosiped yolları Bakımızda da olsa, bir çox üstünlüklər gətirər. “Ekologiya ili”ndə ekologiyanın qorunmasına xidmət edər, tıxaclar nisbətən azalar, parkinq problemi aradan qalxar, ölkəyə gələn turistlər üçün gəzinti baxımından və paytaxtımızın gözəlliklərindən zövq almaq üçün geniş imkanlar açılar. Bu siyahını daha da artırmaq olar... Əlavələr etmək üçün isə mütləq bir gün velosipedlə işə getmək lazımdır. Mənim kimi...










Vasif Xəliloğlu,
Baş redaktor  


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.