Üstün sığortalanmaq fürsəti

Просмотров: 1833
Üstün sığortalanmaq fürsəti

Əli Bayramov: “Sığorta boş şey deyil, biz yol axtarırıq ki, müştəriyə ödəniş edək.”

A-GROUP sığorta şirkəti 1995-ci ildən sığorta bazarında fəaliyyət göstərir. İlk əvvəllər tibbi sığorta üzrə fəaliyyət göstərən şirkət 2000-ci ildən başlayaraq, digər sığorta növlərini də inkişaf etdirir. Şirkət avtomobil nəqliyyatı vasitələrinin sığortası ilə bağlı da məhsullar hazırlayaraq bazara çıxarıb.

Əziz oxucular, jurnalımız sizlərə seçiminizdə kömək olmaq məqsədilə ölkəmizin aparıcı sığorta şirkətlərinin avtomobil sığortası ilə bağlı fəaliyyətlərini diqqətinizə çatdırır. Budəfəki müsahibimiz A-GROUP  sığorta şirkətinin İdarə Heyətinin üzvü Əli Bayramovdur. O, “Avtomobil.az”ın suallarını cavablandıraraq, avtomobil sığortası ilə bağlı vacib məqamlara aydınlıq gətirdi.

-Əli müəllim, A-GROUP sığorta şirkətinin nəqliyyat vasitələrinin sığortası ilə bağlı hansı məhsulları vardır?

- A-GROUP sığorta şirkətində digər sığorta şirkətlərində olduğu kimi, avtomobillərin sığortasında 3 təminat mövcuddur. Bunlar bütün risklərə təminat verən KASKO sığortası, sürücü və sərnişinlərin bədbəxt hadisələrdən sığortası və mülki məsuliyyətin icbari və könüllü sığortasıdır.

A-GROUP sığorta şirkətinin bir sıra üstünlüklərə malik “Yol yoldaşı” sığorta proqramı daha cəlbedicidir. Bu proqramla avtomobillərini sığortalayanlar pulsuz evakuasiya xidmətindən, MediClub təcili yardım xidmətindən, sutka ərzində fasiləsiz assistance xidmətlərindən faydalanır və  hədiyyə olaraq ilk tibbi yardım qutusunu və 5000 ABŞ dolları dəyərində bədbəxt hadisələrdən sığorta polisi əldə edir.

Həmçinin  A-GROUP sığorta şirkətində avtomobilini sığortalayan hər bir şəxs yol-nəqliyyat hadisəsi nəticəsində zədələnmiş avtomobilinin təmirdə olduğu müddət ərzində müvəqqəti olaraq  digər nəqliyyat vasitəsi ilə təmin olunur. Qeyd etmək lazımdır ki, KASKO şəhadətnaməsinin sahibi baş vermiş yol-nəqliyyat hadisəsi sığorta hadisəsi kimi qiymətləndirilməyən hallarda belə, bu xidmətdən istifadə edə bilər. Müştərimizin seçiminə Nissam XTrail, Subaru İmpreza, Toyota Corolla markalı yeni avtomobillər təqdim edilir. Sığortalanmış yeni avtomobil sığortalıya hadisə yerindəcə etibarnamə ilə təhvil verilir.

-Bəs hansı hallarda zərərçəkənə ödəniş etməkdən imtina edə bilərsiniz?

-İmtina üçün əsas alkoqollu içki və narkotik maddələrin qəbul edilməsidir. Digər tərəfdən, müvafiq kateqoriyalı və ya sürücülük vəsiqəsi olmadan avtomobili idarə etməklə hadisə törədilərsə, sığorta ödənişindən imtina edirik. Bizdə kobud ehtiyatsızlıq anlayışı yoxdur.

Hətta qanunda kobud ehtiyatsızlıq ifadəsinin açılışı göstərilməyib. Bu yolla ödənişdən imtina etmək düzgün deyil. Sürücü bilməyərəkdən svetoforun qırmızı işığını keçərək və ya qoşa xətti tapdalayaraq əks hərəkət zolağına çıxmaqla qəza törətsə belə, biz ona dəymiş zərəri ödəyirik.

-Hadisə zamanı avtomobillərin qəza yerindən tərpədilməsinə icazə verilirmi?

-Yalnız yol polisinin və sığorta şirkətinin əməkdaşları gəldikdən sonra onların iştirakı ilə icazə verilir. Belə vəziyyətdə heç olmasa yol polisi gəlməlidir. Qəza baş verən zaman sığortalı qəza nişanını qurmalı və ya qəza işıqlarını yandırmalıdır. Qısa bir müddətdə polisə və sığorta şirkətinə məlumat verməlidir.

Hadisənin başvermə səbəbi müəyyənləşdirildikdən və sxem tərtib edildikdən sonra hadisə yeri boşaldıla bilər. Əgər sığortalı özbaşına avtomobilin yerini dəyişərsə, mütləq sığorta ödənişi almayacaqdır. Belə hərəkətlər sığorta şirkətinin də hüquqlarının pozulması deməkdir.

Belə ki, sığorta şirkətlərinin subroqasiya hüququ var. Nə deməkdir bu hüquq?  Bu hüquq sığortaçının qarşı tərəfə iddiası deməkdir. Yəni sığorta şirkətinin zərərçəkənə ödədiyi vəsaiti zərərvurandan istəmək hüququ var. Əgər avtomobillər yerindən tərpədilərsə, onda sığorta şirkətinin də hüququ pozulur və sığortalı da ödəniş ala bilmir.

- “Sığorta boş şeydir” - deyənlərə siz hansı cavabı verərdiniz?

- Sığorta boş şey deyil, hər an hadisə baş verə bilər. İnsanlarımızın sığortadan narazılıqlarının birinci səbəbi sığorta şərtləri ilə yaxından tanış olmamalarıdır. Digər tərəfdən, yerli orqanlarla iş qismən problemdir. Qanunvericiliklə nəzərdə tutulmuş sənədlər toplusu var. Həmin sənədləri yol polisi xidməti verir. Bəzən həmin sənədlərin alınması gecikdirilir. “Forma 4” deyilən sənəd var.

Həmin sənəd yol-nəqliyyat hadisəsinin təfərrüatını göstərir. Biz də həmin sənədləri almadan ödəniş edə bimirik. Müştəri də bizi ödənişi etməməkdə günahlandırır. Bu problem bizdən qaynaqlanmır. Yol polisinin işinin çox olması, poçt sisteminin yaxşı işləməməsi həmin sənədləri 30 günə kimi gecikdirir. Əslində isə 15 gün ərzində sənədlər sığorta şirkətinə göndərilməlidir.

Həmçinin bir neçə yerli sığorta şirkəti vardır ki, onların yarıtmaz fəaliyyəti ucbatından sığortaya inamsızlıq yaranır. Müştərilərə məsləhət görürəm ki, sığorta şirkəti seçməzdən öncə şirkətlərin fəaliyyətinə, xüsusilə ödənişlərinə fikir versinlər. Sığortada ən güclü reklam sığorta ödənişlərinin müştəriyə düzgün verilməsidir.

Bir razı müştəri təqribən əlavə 15 yeni müştəri deməkdir. Biz bu deviz altında fəaliyyət göstəririk. Hətta biz yol axtarırıq ki, müştəriyə ödəniş edək. “Sığorta boş şeydir” - deyənlər bizim şirkətə gələrək şərtlərimizlə tam tanış olsunlar.  Bizim sığortadan istifadə etsələr görəcəklər ki, sığorta boş şey deyil, əksinə olduqca vacibdir.

-Əli müəllim, dolğun müsahibənizə görə təşəkkür edirəm.



Müsahibəni apardı: Seymur Yunusov



© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.


Şərhlərin sayı: 0

AVATAR
Hələ heç kim şərh verməyib. Birinci siz olun.