Uğurlu fəaliyyətin 5 ili tamam oldu!

Просмотров: 1564
Uğurlu fəaliyyətin 5 ili tamam oldu!

“AtaSığorta” ASC 5 yaşını qeyd edir. Şirkət 2004-cü il iyul ayının 21-də rəsmi dövlət qeydiyyatından keçmiş və həmin ilin sentyabr ayının 3-dən etibarən sığorta fəaliyyətini həyata keçirir. Şirkətin təsisçisi  və yeganə səhmdarı “AtaHoldinq” ASC-dir.

Bir neçə gün öncə şirkətin 5 illik fəaliyyətinin yekunlarına həsr olunmuş mətbuat konfransı keçirildi. Mətbuat konfransında “AtaSığorta” ASC-nin İdarə Heyətinin sədri  Tamirlan Hacıyev, İdarə Heyətinin sədr müavinləri İsrail Qarayev, Səbinə Babayeva, marketinq departamentinin rəhbəri Fuad Əliyev və “AtaHoldinq” Şirkətlər qrupunun  mətbuat katibi Dilarə Zamanova iştirak edirdi.


Mətbuat konfransında İdarə Heyətinin sədr müavini İsrail Qarayev bildirdi ki, 2004-cü ildən etibarən “AtaSığorta” fəaliyyətinin əsas prinsipi kimi fiziki və hüquqi şəxslər üçün effektiv sığorta layihələri hazırlayaraq təqdim etməyə başladı və müştərilərinin bütün mümkün və sığortalana biləcək risklərinə maksimum təminat verdi. “AtaSığorta”nın  fəaliyyətə  başladığı ilk gündən əsas məqsədi Azərbaycanın sığorta bazarında keyfiyyətli xidmət göstərərək, sığorta mədəniyyətini inkişaf etdirmək olmuşdur. Dünyanın bir sıra inkişaf etmiş ölkələrində təhsil almış, iri sığorta şirkətlərinin təcrübəsini qazanmış mütəxəssislər şirkətin uğurlu fəaliyyətini daim istiqamətləndirirlər.

Cənab İsrail Qarayev şirkətin iqtisadi göstəriciləri haqqında məlumat verdi. O, bildirdi ki, 2009-cu ilin 1 sentyabr vəziyyətinə “AtaSığorta” ASC-nin ümumi aktivləri 8,0 mln. manat, ödənilmiş nizamnamə kapitalı 2,0 mln. manat, yaradılmış sığorta ehtiyatları 4,0 mln. manat, pul depozitləri 4,2 mln. manat təşkil edir. Şirkətdə hazırda 47 əməkdaş çalışır. Fəaliyyət göstərdiyi 5 il ərzində, şirkət 61 969 ədəd sığorta müqaviləsi bağlamış, 15,1 mln. manat sığorta haqları toplamışdır. 5 illik dövr üzrə şirkətin ümumi gəlirləri 20,0 mln. manat, ümumi xərcləri 17,5 mln. manat, o cümlədən 2,6 mln. manat sığorta ödənişləri olmaqla, balans mənfəəti 2,5 mln. manat təşkil etmişdir. 5 illik fəaliyyət müddəti ərzində şirkət tərəfindən 1,1 mln. manat məbləğində vergi və ayırmalar ödənilmişdir.

Hazırda “AtaSığorta” şirkəti 26 növ sığorta xidmətləri, onlardan 21 könüllü və 5 icbari növlər üzrə sığorta xidmətləri təqdim edir. Şirkətin təqdim etdiyi əsas sığorta növləri arasında əmlak sığortası, nəqliyyat vasitələrinin sığortası, nəqliyyat vasitələri sahiblərinin mülki məsuliyyətinin icbari və könüllü sığortası, sürücü və sərnişinlərin bədbəxt hadisələrdən sığortası, üçüncü şəxslər qarşısında mülki məsuliyyətin sığortası, yüklərin sığortası, inşaat sığortası, işəgötürənin məsuliyyətinin sığortası, tibbi sığorta, fərdi qəza sığortası, bank və bank fəaliyyətinin sığortası və s. vardır.

“AtaSığorta” ASC-nin İdarə Heyətinin sədr müavini İsrail Qarayev nəqliyyat vasitələrinin sığortasına toxunaraq bildirdi ki, bu gün minlərlə vətəndaş öz avtomobillərinin sığortasını “AtaSığorta”ya etibar edir. İndiyə qədər “AtaSığorta”nın  böyük əks-səda, narazılıq doğuran məhkəmələri olmayıb. Yaxın gələcəkdə şirkət digər sığorta sahələri ilə bərabər, nəqliyyat vasitələrinin sığortası sahəsində də yeni məhsulları təqdim etməklə şirkətin portfelini artıracaq. Sığortaya zaman keçdikcə inamın artdığını bildirən İsrail Qarayev sığorta etdirənlərə müqavilə bağlayarkən müqavilənin şərtlərini diqqətlə oxumalarını və həmin zaman öz istəklərini bildirmələrini məsləhət gördü.

“AtaSığorta” ASC-nin İdarə Heyətinin sədri  Tamirlan Hacıyev isə qeyd etdi ki, şirkətin partnyorları və müştəriləri qarşısında götürdüyü öhdəliklərin yerinə yetirilməsi sahib olduğu sığorta xidmətləri portfelindən, əhəmiyyətli həcmdə sığorta ehtiyatlarından, praktiki iş təcrübəsi və peşəkar personaldan asılıdır. Bütün bu standartlara cavab verə bilmək üçün “AtaSığorta” beynəlxalq sığorta bazarının liderləri olan GenRe, Lloyds of London, Hannover Re, Swiss Re, Chauser, AIG, Korean Re, Trans Re, Rosno, Russian Re, Ingosstrakh, AON, Willis və digər şirkətlərlə əməkdaşlıq edir.

“AtaSığorta” ASC-nin İdarə Heyətinin sədr müavini Səbinə Babayeva bildirdi ki, “AtaSığorta” ASC  idarəetməni müasir standartlarla quraraq, 2005-ci ildə “Moody International” təşkilatı tərəfindən ISO 9001-2000 Beynəlxalq Keyfiyyət Sertifikatına layiq görülüb. 2007-ci ilin yekunlarına görə, “AtaSığorta” ASC “İlin Sığorta şirkəti” nominasiyası üzrə “Uğur” Milli Mükafatına da layiq görülmüşdür. O həmçinin əlavə etdi ki, “AtaSığorta” ASC ölkənin biznes və ictimai həyatında yaxından iştirak edir. Şirkət Azərbaycan Sığortaçılar Assosiasiyasının, Azərbaycan-Amerika Ticarət Palatasının (AMCHAM), Azərbaycan-Türkiyə İşadamları Birliyinin (ATİB), Azərbaycan Sahibkarlar və İşəgötürənlər Konfederasiyasının və digər qurumların fəal üzvüdür.     2008-ci ildə “AtaSığorta” ASC Azərbaycanda keçirilən 1-ci Beynəlxalq Sığorta Forumunun əsas sponsorlarından biri və fəal iştirakçısı olmuşdur. “AtaSığorta” ASC mədəniyyət, idman və s. sosial sahələrdə sponsorluq dəstəyini göstərir.
 
Marketinq departamentinin rəhbəri Fuad Əliyev dedi ki, şirkətin son apardığı  kampaniya  “5 +” adlanır. “5 ildir baxıram, bir az ehtiyatlı olun!” sloqanı altında aparılan kampaniyanın məqsədi  5 illik yubileyi qeyd etmək və cəmiyyətdə sığorta risklərinin artmasına gətirib çıxaran ehtiyatsızlığa bir mesaj çatdırmaqdır.
    
Sonda qeyd olundu ki, “AtaSığorta” komandası doğma Azərbaycanımızın inkişaf etməsi naminə,  müsbət imicin artması və zənginləşməsi istiqamətində çalışıb, bundan sonra da  böyük səylə çalışacaqdır.



Seymur Yunusov


© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.