Suzuki şirkəti Audi və ya Acura alıcılarına... pul ödəyir

Просмотров: 2280
Suzuki şirkəti Audi və ya Acura alıcılarına... pul ödəyir

Zahirən elə görünür ki, Suzuki-nin maliyyə vəziyyəti onun xeyriyyəçiliklə məşğul olmasına imkan vermir. Amma fakt faktlığında qalır – Yaponiyanın bu məşhur avtomobil istehsalçısı Amerika avtomobil bazarının premium sektorunda liderlik uğrunda mübarizə aparan rəqiblərinin istehsal etdiyi avtomobilləri alanlara böyük məbləğdə olmasa da, hər halda real pullar ödəmək niyyətindədir.

Suzuki vəd edib ki, onun istehsal etdiyi yeni Kizashi sedanını testdən keçirdikdən sonra bu avtomobili almaqdan vaz keçərək Audi və ya Acura avtomobilini almaq qərarına gələn hər kəsə 100 dollar ödəyəcək. Etiraf edək ki, bu, qeyri-adi reklam üsuludur, amma şirkət təmsilçiləri əmindirlər ki, onların yeni avtomobilini sürdükdən sonra avtomobil həvəskarları rəqib şirkətlərin avtomobillərini almağa tələsməyəcəklər.

Məsələ heç də ödəniləcək pulda deyil, reklamın qeyri-adiliyindədir. Standart reklam ilə Suzuki premium avtomobillərinin alıcılarını öz salonlarına cəlb edə bilməzdi. Başlıcası budur ki, əvvəllər Audi və ya Acura almaq üçün avtomobil salonlarına yollanan alıcı Suzuki Kizashi kimi əla avtomobilin mövcudluğundan xəbərsiz idisə, bu cür reklamdan sonra heç olmasa bu avtomobili görə biləcək və yəqin ki, onu sürüb sınaqdan keçirmək istəyəcək. Kim bilir, bəlkə, bundan sonra o, fikrini dəyişib məhz Kizashi-ni almaq qərarına gəldi?

Üstəlik, qeyd etmək lazımdır ki, aksiyanın qeyri-ixtiyari iştirakçıları Kizashi sedanının yoldakı üstünlükləri ilə yanaşı, qiymət cəhətdən üstünlüklərinin də şahidi ola bilərlər: Amerikada 2010-cu model ilinin avtomobili Acura TSX (bu, Avropadakı Honda Accord modelinin lüks variantıdır) 29.300 dollara, 2 litr həcmli mühərriki olan Audi A4 (bu da yeni avtomobildir) 31.500 dollara satıldığı halda Kizashi avtomobilinin baza qiymətləri komplektasiyadan asılı olaraq 19.000 dollarla 27.000 dollar arasındadır.

Bir tərəfdən reklam kampaniyasının hədəfi qismində rəqib modellərin seçilməsi qəribə görünür, amma digər tərəfdən bu, çox incə bir psixoloji gedişdir. Axı bu reklamın sayəsində şüuraltı səviyyədə ictimaiyyətin yaddaşına belə bir fikir həkk olunacaq ki, Suzuki avtomobili premium seqmentinə mənsub olan avtomobillərlə (qiymətləri bahalı olmasa belə) müqayisə oluna bilər.

Bu aksiyanın şərtləri aşağıdakılardan ibarətdir: müştəri 2010-cu ilin yanvarından başlayaraq Kizashi-nin test-drayvı üçün müraciət edərək qeydiyyata alınmalıdır. Əgər o, Suzuki Kizashi-ni sınaqdan keçirdikdən sonra 10 gün ərzində Audi A4 2.0T və ya Acura TSX 2.4 alarsa, şirkət ona 100 dollarlıq çek yazacaq. Aksiya bütün ABŞ ərazisində iki ay ərzində davam edəcək.


Hazırladı: Sevinc Yusifova 


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.