Sürücülər planın çoxluğundan şikayətlənirlər

Просмотров: 2895
Sürücülər planın çoxluğundan şikayətlənirlər
  • Sürücülər planın çoxluğundan şikayətlənirlər
  • Sürücülər planın çoxluğundan şikayətlənirlər
  • Sürücülər planın çoxluğundan şikayətlənirlər
  • Sürücülər planın çoxluğundan şikayətlənirlər

Sərnişindaşıma nəqliyyatında olan problemlərin bir çoxunun avtobus sürücülərindən qaynaqlandığı hamıya məlumdur. Sən demə, daim ictimai nəqliyyatda olan çatışmazlıqların bilavasitə səbəbkarı qismində görünən marşrut avtobus sürücülərinin də problemləri başlarından aşır. Yayın gəlişi ilə yaranan sərnişin qıtlığı isə bu peşədə çalışanları, sözün əsl mənasında, çıxılmaz vəziyyətə salıb.

Belə ki, əvvəlki illərlə müqayisədə bu il yay aylarında sürücülərin ödədiyi gündəlik plan bəzi xətlərdə çox az həddə, bəzilərində isə, ümumiyyətlə, aşağı salınmayıb. Yəni, yay aylarının olmasına baxmayaraq, sürücülərə qoyulan gündəlik plan artmaqda davam edir. Halbuki açılan marşrut xəttinə plan qoyularkən onun imkanları və ən başlıcası, sərnişin dövriyyəsi nəzərə alınmalıdır. Təəssüflər olsun ki, bu gün Bakının sərnişin nəqliyyatında bunların bir çoxu, faktiki olaraq, nəzərə alınmır. Yəni sürücü gündəlik planı ödəyirsə, işləyir, ödəyə bilmirsə, işdən azad olunur.

Apardığımız araşdırmalar zamanı məlum oldu ki, gündə 14-16 saat işləyən marşrut avtobus sürücüləri bəzən evə çörəkpulu belə, apara bilmirlər. Məsələn, 1A marşrutunda işləyən Fariz adlı sürücü deyir ki, gündə 135 manat plan ödəyir: “Yanacağı və əlavə ödənişləri də nəzərə alsaq, gündəlik xərclər 200 manatı keçir. Bu şəraitdə işləmək çox çətindir. Elə gün olur ki, planı borc alıb ödəyirik. Yaydır, şəhər boşdur, heç kim yoxdur. Bizdən isə yenə də eyni plan tələb olunur”.

Şəhərin mərkəzi hissəsi ilə hərəkət edən 95 saylı marşrut avtobusunun sürücüsü Elman da bizimlə söhbətində yay aylarında planın çox az endirilməsindən şikayətləndi: “Bizdə plan 120 manat idi, məktəblər bağlanandan sonra planı 20 manat endirdilər. Təsəvvür edin ki, qış ayları ilə müqayisədə indi marşrut avtobuslara minənlər yarı-yarıya azalıb. Plan isə cəmi 20 manat azalıb”. Eyni vəziyyət 276, 342, 85, 123, 96 və digər marşrut xətlərində də hökm sürür. Maraqlıdır, bütün bu xərclər və qoyulan plan nə dərəcədə qanunauyğundur?
 
Paytaxtın sərnişindaşıma nəqliyyatına nəzarət edən “Bakısərnişinnəqliyyat” MMC-dən “Avtomobil.az”a bildirdilər ki, bu məsələyə onların  müdaxilə etmək səlahiyyətləri yoxdur. Belə ki, qoyulan plan və tələb olunan digər xərclər bilavasitə sahibkarların ixtiyarında olan məsələdir. Yəni sahibkar işə qəbul etdiyi sürücü ilə əmək müqaviləsi imzalayır və bütün bu xərclər də orada öz əksini tapır.

Mütəxəssislər isə hesab edirlər ki, sürücülərdən tələb olunan planın və digər cari xərclərin çoxu qanunsuz xarakter daşıyır. Çünki, həmin proseslərin əksəriyyəti qanunvericilikdən kənar baş verir. Əslində qanuna görə, marşruta yüklənən planın miqdarı müəyyən olunarkən həmin marşruta çəkilən xərclər və sərnişin axını, eyni zamanda, vergi və sosial müdafiə xərcləri də nəzərə alınmalıdır.

Mais Şahmaroğlu

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.