Ssenari təkrarlanır...

Просмотров: 2120
Ssenari təkrarlanır...

Plyonkalara icazə verildi. İndi cəmi 5 dəqiqə vaxt lazımdır ki, Bakı küçələrində nə qədər çox plyonkalı avtomobil olduğunu müşahidə edəsən. Cari vaxtda hətta taksi sürücüləri də öz avtomobillərinə plyonka vururlar. Bir müddət bundan öncə plyonkalı avtomobilləri barmaqla saymaq olardı. Belə avtomobillərin kimlərə məxsus olduğu bilinmir, amma nədənsə, yol polisi onları saxlamağa cürət etmirdi.

Saxlayanda isə pərdə və plyonkanın sökülməsinə maneçilik törədilirdi.

Bakı Şəhər Dövlət Yol Polisi İdarəsi avtomobillərdə plyonka və pərdələrdən istifadəyə icazə verilib-verilməməsi ilə bağlı açıqlamaları ölkə mətbuatında geniş müzakirə mövzusuna çevrildi. "Yol Hərəkəti Haqqında" Qanunun 1 saylı əlavəsi və Standartlaşdırma, Metrologiya və Patent üzrə Dövlət Agentliyinin bununla bağlı standartı bir daha yada salındı. Aydın oldu ki, plyonkaya icazə var imiş, sadəcə, ölçüsünü bilmək lazımdır.

Minik avtomobillərinin şüşələrinin tündləşdirilməsi - qabaq şüşələr üçün 25 faiz, qabaq-yan şüşələr üçün 30 faiz, arxa-yan şüşələr üçün 40 faiz normal sayılır. Arxa şüşələrin tündləşdirilməsinə, sürücünün arxa görünüşünü məhdudlaşdırmamaq şərti ilə məhdudiyyət qoyulmur. Sizcə, bizim sürücülər bu normativlərə riayət edəcəklər? Etiraf edək ki, bu bir qədər müəmmalı görünür...

3 ildə nə dəyişdi?
 
Prezident İlham Əliyev hələ 2007-ci il oktyabrın 22-də Nazirlər Kabinetinin müşavirəsində çıxış edərkən bu məsələyə ayrıca münasibət bildirmiş, avtomobillərdən plyonkaların tam yığışdırılması üçün tapşırıq vermişdi. Cənab Prezidentin həmin çıxışından bir sitatı yadımıza salaq: “Mən sizə bir neçə dəfə demişəm, əfsuslar olsun ki, gərək hər dəfə deyəm. Bir neçə gün bundan əvvəl sizə demişəm, plyonkalar olan maşınlar barədə neçə dəfə deməliyəm?! Onlar kimlərdir? Məndə siyahı var, kimlərdir. Orada bir nəfər də sadə adam tapmaq çətindir. Ya dövlət məmurlarının, ya böyük vəzifə sahiblərinin, ya Milli Məclis üzvlərinin, yaxud da böyük biznes sahiblərinin qohumlarıdır. Onlar kimdən artıqdırlar? Nə üçün onlar plyonkalı maşınlarda gəzməlidirlər?” Bundan sonra yol polisi geniş reydlərə başladı və “plyonka soyqırımı”na start verildi.

İndi plyonka mövzusunun belə aktual olduğu vaxtda ölkə Prezidentinin bu məsələyə yenidən diqqət yetirməsi bir qədər inandırıcı görünmür. Amma əminəm ki, bir müddətdən sonra dövlət rəsmiləri tərəfindən bu məsələ yenə qaldırılacaq və plyonkalar yığışdırılacaq. Yəni ssenari təkrarlanır...

Vasif Xəliloğlu,
Baş redaktor


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.