Smart forstars Concept

Просмотров: 710
Smart forstars Concept
  • Smart forstars Concept
  • Smart forstars Concept
  • Smart forstars Concept
  • Smart forstars Concept
  • Smart forstars Concept
  • Smart forstars Concept

Smart forstars Concept ekoloji cəhətdən təmiz avtomobil olduğuna görə sağlam ətraf mühit uğrunda mübarizə aparanların mənfi münasibəti ilə qarşılaşmayacaq. Yeni Smart forstars Concept yalnız elektrik mühərriki vasitəsilə hərəkətə gətirilir. Üstəlik, bu "ağıllı" avtomobili smartfonla kənardan idarə etmək və ya təkərlər üzərində kinoteatra çevirmək mümkündür.

Yeni konseptual avtomobilin ölçüləri belədir: uzunluğu 3550 mm, eni 1710 mm, hündürlüyü 1505 mm. İstehsalçı şirkət 3,5 metrlik məkanda sürücü və sərnişin üçün iki rahat kreslo yerləşdirib və avtomobili kapota quraşdırılmış video-proyektorla təchiz edib. Smart forstars Concept-in arxa hissəsində keyfiyyətli səsgücləndiricilər quraşdırılıb ki, bu da avtomobil sahibinin istənilən yerdə və istənilən vaxtda dostları ilə videoya baxmasına imkan verir.

Zahiri görünüşünə görə kompakt Smart forstars Concept modeli tutqun boz-qara rənglə parlaq qırmızı rəngin kombinasiyası, özünəməxsus bamperi və faraların altında iki havaçəkəni ilə seçilir. Arxa fənərlər ön fənərlər kimi kvadrat formasındadır, dairəvi dam örtüyü isə bütünlüklə şüşədən hazırlanıb, yalnız dayaqlar qeyri-şəffaflığı ilə seçilir.

Qəşəng və kontrastlı salona ağ sədəf rəngi, eləcə də cilalanmış alüminium rəngi  xüsusi yaraşıq verir. Bu rənglərdən əlavə, salonda eksteryerin rənginə uyğun qırmızı rəngdən də istifadə edilib. Oturacaqlar dəlikli ağappaq dəri ilə işlənib, orijinal sükan çarxı isə iki milinin olması ilə yuxarı hissədə dairənin ənənəvi davamının olmaması ilə seçilir.

Smart forstars Concept-in ekoloji cəhətdən təmiz elektrik mühərrikinə gəlincə, istehsalçının bildirdiyinə görə, onun gücü 60 kilovat (80 at gücü), fırlanma momenti 135 Nm təşkil edir. Mühərrik enerjini 17,4 kilovat tutumu olan akkumulyatordan alır, məhz bunun sayəsində avtomobilin spidometrində 130 km/saatdan artıq sürət göstəricisinə nail olmaq mümkün olur. Tam yüklənmiş batareya ilə avtomobilin nə qədər məsafə qət etməyə qadir olduğunu istehsalçı hələlik açıqlamır.

Smart forstars konsept-karına 21 düymlük təkər diskləri quraşdırılıb. Disklərin üzərinə Michelin istehsalı olan 245/35 ZR-21 ölçülü iri idman şinləri taxılıb. Yüngül lehimli disklər parlaq qara rəngdədir və çevrəsinin daxilində "V" formalı üç cüt nazik mil var, çevrənin kənarları isə ağ rənglə haşiyələnib.

İstehsalçının məlumatına görə, Smart forstars Concept avtomobilində sürücü ilə sərnişinin yüklərinin daşınması üçün kifayət qədər yer var. Zərurət yarandıqda iri qabaritli yüklərin daşınması üçün daxili məkanı genişləndirmək olar. Bu məqsədlə qabaqdakı sərnişin oturacağını çıxarmaq mümkündür.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.  

Şərhlərin sayı: 0

AVATAR
Hələ heç kim şərh verməyib. Birinci siz olun.