Sərnişin nəqliyyatındakı problemlər yenidən gündəmdədir

Просмотров: 2510
Sərnişin nəqliyyatındakı problemlər yenidən gündəmdədir

Qəzaların baş verməsinin əsas səbəbləri nədir?

Fevralın ilk günündə paytaxtın Binəqədi rayonu ərazisində 165 və 106 saylı avtobusların toqquşması nəticəsində 5 nəfər öldü, 3 nəfər isə ağır yaralandı. Əslində buna qəza yox, faciə deyilməlidir. İlkin araşdırmalar zamanı hadisəyə yüksək sürətin səbəb olduğu göstərilsə də, ekspertlər qəzanın çoxsaylı obyektiv və subyektiv səbəblərinin olduğunu bildirirlər.

Fevralın 8-də isə Bakıda daha iki sərnişin avtobusu toqquşması xəbəri gəldi. Hava limanı istiqamətində hərəkət edən fəhlə avtobusu əks istiqamətdən hərəkət edən 66 saylı marşrutla toqquşdu. Xoşbəxtlikdən ölən olmasa da, 8 nəfər xəsarət aldı.

Problemlər zəncirvaridir...

Bu hadisələr sərnişindaşımadakı boşluqları, avtobus sürücülərinin qayda-qanunlara məhəl qoymamaları kimi məsələləri yenidən gündəmə gətirdi. Ümumiyyətlə, avtobus parklarının yenilənməsinə baxmayaraq, Bakıda marşrut bazarındakı vəziyyəti tənzimləmək mümkün olmur. Çünki problem bir və ya iki deyil, zəncirvaridir. Bütün bu problemlərə qarşı cavabdeh qurumların gördüyü işlər isə kampaniya xarakterli olduğundan effektlilik faizi aşağıdır.
Bakı Şəhər Dövlət Yol Polisi İdarəsindən bildirdilər ki, Binəqədi rayon ərazisində iki avtobusun toqquşması nəticəsində baş vermiş qəzadan sonra yol hərəkəti qaydalarını pozan sürücülərə qarşı mübarizə gücləndirilib. Bu sahədə pozuntuların aradan qaldırılması üçün şəhərdə reydlər keçirilir. İdarədən onu da dedilər ki, avtobus sürücülərinin daha çox yol verdiyi pozuntular avtomobili müvafiq kateqoriya, sürücülük vəsiqəsi olmadan idarə etmə, ötmə qaydalarının pozulması, avtomobilin yüksək sürətlə idarə olunması, dayanacaqdan kənarda sərnişin götürməsidir.

“Avtobus və taksi sürücüləri kurslara cəlb olunacaq”

“Bakısərnişinnəqliyyatı” MMC-nin mətbuat katibi Samir Həsənov isə “Avtomobil.az”a açıqlamasında bildirdi ki, həqiqətən də, avtobus sürücülərinin kobud pozuntulara yol verməsi faktları mövcuddur. O qeyd edib ki, ötən il kobud qayda pozuntularına yol vermiş 300-dən artıq avtobus sürücüsü inzibati qaydada cəzalandırılıb. Onlar arasında "D" kateqoriyası olmadan sərnişin daşıyanlar da olub. S.Həsənovun sözlərinə görə, gələcəkdə paytaxtda avtobus və taksilərdə sürücülük etmək istəyənlər kurslara cəlb olunacaq və kursu başa vurandan sonra xüsusi imtahan verəcəklər: “Qeyd olunan nəqliyyat vasitələrində sürücü işləmək istəyənlərin sürücülük təcrübəsi olmalı, paytaxtın küçələrini və ərazilərini tanımalı, sərnişinlərlə etik qaydalar çərçivəsində davranmağı bacarmalıdırlar. Bu tələblərə cavab verənlərə sürücü kimi işləməyə icazə veriləcək”.

Qanunla sürücü texniki və tibbi müayinədən keçməlidir, amma...

Araşdırmalarımız göstərir ki, son illərdə marşrut avtobusların törətdiyi qəzalarda onlarla insan həyatını itirib, çoxlu sayda insan isə şikəst qalıb. Bəs görəsən bu qəzaların tez-tez baş verməsinin səbəbi nədir, günahkar kimdir?

Qeyd edək ki, 2008-ci il 4 aprel tarixində qüvvəyə minmiş “Avtomobil nəqliyyatı haqqında” qanuna əsasən, hər bir sərnişin daşıyan nəqliyyat vasitəsi və sürücüsü reys öncəsi həm texniki, həm də tibbi müayinədən keçməlidir. Bu iş ya qaraj sistemi ilə, ya da mərkəzləşdirilmiş formada həyata keçirilməlidir. Söhbətləşdiyimiz avtobus sürücüləri ümumiyyətlə, tibbi müayinədən keçmədiklərini söylədilər.

Onların sözlərinə görə, hər gün ödənilən kiçik məbləğ müqabilində sürücülərə tam sağlam olmaları haqda "tibbi arayış" verilir. Bu sferada səhhətində problemləri olan şəxslərin sürücülük vəsiqəsi əldə edərək sükan arxasına keçmələri “problem deyil”. Hətta dəfələrlə ürək çatışmazlığı, əsəb-sinir xəstəliyi və digər şiddətli problemlərlə üz-üzə qalanların avtomobil sürərkən idarəetmə qabiliyyətlərini itirməsi və qəza törətməsi faktları qeydə alınıb.

Yolları kəsişən marşrutlar arasında ölüm-dirim mübarizəsi gedir

Daha bir problem isə qeyri-peşəkar sürücülərin avtobusları idarə etməsi ilə bağlıdır. Tez-tez rastlaşdığımız haldır ki, yetkinlik yaşına çatmış, 18-20 yaşlı gənc onlarla sərnişinin əyləşdiyi marşrut avtobusunun sükanı arxasında oturur. Təbii ki, belə hallar insanların həyatı üçün ciddi təhlükə yaradır. Eyni zamanda, rayonlardan gələn və sadəcə avtomobil idarə etmək barədə cüzi anlayışı olanlar müxtəlif yollarla vəsiqə əldə edərək, bu sahədə tezliklə iş tapırlar. Elə fevralın 1-də baş verən hadisə zamanı  106 saylı avtobusu idarə edən 55 yaşlı Razi Seyfullayev Xaçmaz rayonundan yenicə gəlib və yanvarın 22-dən bu xəttə çalışırmış. Bu faktın isə hansı faciəyə yol açdığını hamımız gördük.

Qəzaların baş verməsinin digər ciddi səbəbi isə planı doldurmaq məsələsidir. Sürücülər hər saniyəni də dəyərləndirməklə vuruşub çarpışırlar ki, planı doldurduqdan sonra özlərinə pul qazansınlar. Belə olan halda yolları kəsişən marşrutlar arasında ölüm-dirim mübarizəsi gedir. Digər bir səbəb isə əksər sürücülərin sutka ərzində 16-18 saat işləməsidir. Bu da qəzaların baş verməsinə birbaşa dəlalət edir.

“Avtomobil.az” olaraq hesab edirik ki, hər bir avtobus sürücüsü və bu sahəyə cavabdeh olan şəxslər fevralın ilk günündə baş verən faciəli hadisədən nəticə çıxarmalı və öz işlərinə daha məsuliyyətlə yanaşmalıdırlar.

 

 
 

 




Mais Şahmaroğlu



© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.



Şərhlərin sayı: 0

AVATAR
Hələ heç kim şərh verməyib. Birinci siz olun.