Sərnişin nəqliyyatı “od tutub yanır”

Просмотров: 3551
Sərnişin nəqliyyatı “od tutub yanır”
  • Sərnişin nəqliyyatı “od tutub yanır”
  • Sərnişin nəqliyyatı “od tutub yanır”
  • Sərnişin nəqliyyatı “od tutub yanır”

İsti yay günlərində ictimai nəqliyyatdan istifadə edən vətəndaşları narahat edən başlıca problem marşrut avtobuslarında ventilyasiya və ya kondisioner sisteminin olmamasıdır. Avtobusların salonları sərnişinlərlə həddindən artıq yüklənən zaman vətəndaşlar arasında narazılıq artır və problem özünü daha qabarıq şəkildə göstərir.  Paytaxtın ictimai nəqliyyatında olan problemləri daim diqqətdə saxlayan “Avtomobil.az” bu dəfə avtobus marşrutlarında ventilyasiya və kondisionerlərin niyə işləməməsini araşdırıb.

Sən demə, paytaxta yeni gətirilən və sərnişindaşıma nəqliyyatında daha çox istifadə olunan Koreyanın “Daewoo” markalı avtobuslarında kondisioner, ümumiyyətlə, YOXDUR! Üstəlik, təzə gətirilən avtobuslarda pəncərələr yuxarıda yerləşdiyindən o, açıq halda olanda belə, içərini normal şəkildə sərinləşdirə bilmir. Nəticədə avtobusun salonu həddindən artıq bürkü olur və sərnişin havanın dəyişməsini o qədər də hiss etmir. Araşdırmalar zamanı  o da məlum oldu ki, Bakının ictimai nəqliyyatında Türkiyə və Avropa istehsalı olan bəzi şəxsi marşrut avtobusları var ki, yalnız onlarda kondisioner var. Daha çox 218, 65, 123 və digər xətlərdə işləyən sözügedən avtobuslarda da sürücülər kondisioneri, ümumiyyətlə, işlətmirlər. Bunun əvəzində əksər sürücülər içərini sərinləşdirmək üçün qanunsuz əməllərə yol verirlər. Onlar salonunun normal hava ilə təmin olunması üçün hərəkət edən maşının qapılarını açıq saxlayırlar ki, bu da istənilən vaxt bədbəxt hadisəyə səbəb ola bilər. Qeyd edək ki, belə hallarla şəhərin mərkəzində ara-sıra rastlansa da, ətraf qəsəbə və kəndlərə işləyən marşrut avtobuslarda, bir qayda olaraq, bu üsuldan istifadə olunur. Yeri gəlmişkən, avtobusu qapısı açıq formada idarə etmək inzibati xəta sayılır və bu pozuntuya yol verən sürücü 20-40 manat arasında cərimələnir.

“Bakısərnişinnəqliyyat” MMC-nin mətbuat katibi Samir Həsənov bizimlə söhbətdə bildirdi ki, son illər Bakıya 1600-dən çox müasir iritutumlu avtobuslar gətirilib və onların heç birində kondisioner yoxdur: “Əsasən Koreya istehsalı olan bu avtobuslarda belə bir sistem yoxdur. Ümumiyyətlə, ictimai nəqliyyatda kondisionerli avtobusların işləməsi dünya praktikasında az-az rastlanan haldır. Bunun səbəbi yəqin ki, bu təyinatlı nəqliyyat vasitələrinin dayanacaqlarda tez-tez saxlamasıdır”.

Sürücülərin salonu sərinləşdirmək üçün avtobusu qapısı açıq idarə etmələrinə gəlincə, S.Həsənov belə hallara yol verən sürücülərə qarşı “Bakısərnişinnəqilyyat” MMCDövlət Yol Polisi İdarəsinin birgə mübarizə apardığını dedi.

Qeyd edək ki, dünyanın bir çox ölkələrində, şəhərdaxili marşrutlarda kondisionerli avtobuslardan istifadə olunur. Hətta bəzi ölkələrdə əhalinin rahatlığı üçün kondisionerli dayanacaqlara da rast gəlinir. Problemi kifayət qədər ciddi hesab edən mütəxəssislər hesab edirlər ki, istənilən halda göstərilən xidmət digər parametrlərlə yanaşı, mövsümi tələblərə də cavab verməlidir. Bu zaman təkcə sürücünün deyil, eyni zamanda, xidməti təşkil edən qurumların da üzərinə müəyyən məsuliyyət düşür.

 Mais Şahmaroğlu

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir. 

Şərhlərin sayı: 0

AVATAR
Hələ heç kim şərh verməyib. Birinci siz olun.