Radarlarla bağlı bilmədiklərimiz

Просмотров: 1696
Radarlarla bağlı bilmədiklərimiz
  • Radarlarla bağlı bilmədiklərimiz
  • Radarlarla bağlı bilmədiklərimiz
  • Radarlarla bağlı bilmədiklərimiz
  • Radarlarla bağlı bilmədiklərimiz
  • Radarlarla bağlı bilmədiklərimiz
  • Radarlarla bağlı bilmədiklərimiz

Hansı halda cəriməyə 10% -lik güzəşt tətbiq edilir?

Dövlət təminatı ilə icra edilməsi, ədaləti, sistemliliyi, rəsmiliyi və digər amilləri özündə cəmləşdirən hüquq anlayışı geniş məzmun və hədəflərə malikdir. Liberal baxımdan yanaşsaq, hüquq hər bir şəxs üçün bərabər azadlıq və ədaləti özündə ehtiva edən norma və qaydaların məcmusudur. Deməli, bu qaydalara riayət birbaşa bizim mənafeyimizə xidmət edir. Lakin belə bir deyim də özünün təsir qüvvəsini hələ itirməyib: “Qanunlar onları pozmaq üçün yaradılıb”. Müasir dövrdə idarə üsulundan asılı olmayaraq hər dövlət quruluşunda müəyyən qanunlar  tərtib edilərək icrası icbari sayılır. Həyatımızın demək olar ki, hər sahəsi qanunla əhatələnib. Bunlardan biri də avtomobil idarə edilməsində mövcud olan qayda-qanunlardır.

Budəfəki sayımızda radarlardan söz açacağıq. Buna səbəb kimi isə sürücülərin günümüzdə əsasən radarlar barəsində narazılığı və onunla bağlı qanunlara, yeniliklərə tam bələd olmamalarıdır.

25 ildən çoxdur avtomobil idarə edən Rəşad Mehdizadənin sözlərinə görə, radarlar əvvəl pis quraşdırılırdı: “Hazırda vəziyyət nisbətən yaxşıdır. Nəzərə çarpan yerlərdə quraşdırıblar, əvvəl polis maşının içində, ağacların arasında gizlədirdilər. Əslində isə radarın funksiyası sürücüləri qorumaq olsa da, bizdə daha çox cəzalandırma sistemi kimi tətbiq edilir”.

Artıq 4 ildir avtomobil idarə edən Röya Qarabağlı da bu mövzuya biganə deyil. Onun sözlərinə görə, demək olar ki, hər bir sürücü avtomobil idarəsi tarixində bu halla qarşılaşır: “Səbəb isə aydındır. Lakin mənə görə, radarlardan sürət həddini tənzimləmək üçün istifadə edilməməlidir. Çünki artıq insanlar üçün kamera və radarlar getdikcə adiləşir. Radarın yerini müəyyən edən sürücü həmin ərazidən asta sürətlə keçdikdən sonra yenidən sürət həddini aşır. Bu halların qarşısını almaq üçün ən ideal çıxış yolu sosial maarifləndirmədir. İnsanlar sosial video çarxlar vasitəsilə bunun zərərini anlamalı, beləliklə də, qorxaraq deyil, anlayaraq sürət həddini aşmamalıdırlar. Yol kənarlarında səmimi, təsiredici ifadələrlə sürücüləri sürət həddini aşmamağa dəvət edən lövhələr də  yaxşı təlqin vasitəsi ola bilər”.

Bakı Şəhər Dövlət Yol Polisi İdarəsinin (BŞDYPİ) İctimaiyyətlə əlaqələr şöbəsinin rəisi, polis polkovnik-leytenantı Vaqif Əsədov radarlarla bağlı yeni tətbiq edilən məqamlardan söz açaraq sürücüləri daha ehtiyatlı olmağa çağırdı: “Hazırda 400 nöqtədə 2000 kamera quraşdırılıb. Bu kameralar asayişin qorunmasını təmin etməklə yanaşı, şəhərdə təhlükəsizliyin nəzarətinə də imkan verir. Sürət həddini aşdığına görə kameralar tərəfindən qeydə alınan sürücüyə 3 gün ərzində yazılı bildiriş verilir. Qanunu pozaraq radara düşən sürücü haqqında 24 saat ərzində bazadakı məlumatlar müəyyən edilərək, yazılı protokol tərtib edilib, sürücüyə göndərilir. Çağırış vərəqində fotoşəkil, inzibati protokol əlavə edilir. Sürət həddini aşanlar üçün “Yol hərəkəti haqqında” qanunda mövcud bəndlər var. Əvvəllər cərimə məbləği 3 formada idisə, hazırda 4 formadadır. Sürücü 10-20 km/saat  sürət həddini aşmasına görə 30 manat, 20-40 km/saata görə 50 manat və 2 bal, 40-60 km/saat sürətə görə 150 manat və 3 bal, 60 km/saatdan çox sürət aşırsa 250 manat və 4 bal cərimə tətbiq edilir. Əgər cərimə sürücü tərəfindən ilk 3 iş günü ərzində ödənilirsə, avtomatik olaraq 10% endirim edilir. 1 ay müddətində ödənilirsə, cərimə olduğu kimi ödənilir. 1 aydan çox müddətdə ödənilərsə, hər gün üçün 2% əlavə məbləğ gəlir. 3 aydan çox müddətdə cərimə ödənilməzsə, avtomobil müvəqqəti olaraq cərimə meydançasına aparılır”.

Məlumdur ki, sürücülərin ən çox narazı olduqları məqam korrupsiya halları ilə üzləşmələridir. Bu problemin həlli yolu üçün bir sıra yeni sistemlər tətbiq edilir. V.Əsədov radarlarla bağlı bu mənada həyata keçirilən plastik kart sistemindən danışdı. Onun sözlərinə görə, plastik kartı olan sürücülər ən yaxın postda post- terminal cihazları vasitəsilə, yaxud istənilən poçtda, istənilən bankda ödəniş edə bilərlər.

V.Əsədov Bakı şəhəri 2012-ci illə 2011-ci ilin müqayisəli cədvəlini də bildirdi: “2011-ci ilin əvvəlindən dekabr ayının 20-dək 1048 hadisə baş verib. 314 ölüm, 1132 xəsarət qeydə alınıb. Bununla müqayisədə ötən il hadisələrin sayı xeyli aşağı düşüb. 103 hadisə, 48 ölüm, 13 xəsarət qeydə alınıb. İlin əvvəlindən dekabr ayının 2-dək 364 mindən artıq inzibati protokol tərtib edilib ki, bunlardan 5500-dən çoxu sürət həddini aşılmasına görə yazılıb”.

Qədim yunan filosofu Epikürün belə bir deyimi var: “Hər istək qarşısında insan özünə sual etməlidir: bu istək əldə edilərsə, nə olar, əldə edilməzsə nə olar”.
Bəli, bu sual mütləqdir və sürət həvəsində olanlar bunu əldə etdikləri təqdirdə nələri itirmə ehtimalının olmasını göz önünə almalıdırlar. 

Fəridə Abdıyeva

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.