Qadın və DYP münasibəti

Просмотров: 1972
Qadın və DYP münasibəti

Hər yerdə olduğu kimi, yol hərəkəti qayda- qanunlarında da kişi və qadın arasında bərabərlik öz əksini tapmışdır. Lakin, həqiqətənmi, sükan arxasındakı qadınlar və kişilər üçün qanunlar eyni ağırlıqdadır?

Qadın sürücü: Qadınlar üçün xüsusi güzəştlər olur. Adətən saxlayanda sürücünün qadın olduğunu görən DYP əməkdaşı artıq bir az yumşalmış formada olur. Və biz qadınlar da bundan məharətlə istifadə etməyi bacarırıq. Lakin elələri də olur ki, heç cür yola gətirmək olmur.

DYP: Azərbaycanda adətən qadınlara hər yerdə güzəşt var. Əgər pozduğu qanun elə də ciddi və təhlükə yaradıcı manevr deyilsə, keçmək olur. Sizdən nəsə xahiş edən xoş görünüşlü və alicənab qadındırsa, bu zaman yox demək heç də asan olmur.
DYP ilə münasibət necə olmalıdır?

Ən əsası özünə güvənməkdir. Əgər Dövlət Yol Polisinin inspektoru sizə dayanmalı olduğunuzu göstərirsə, boş yerə təlaşa düşmək lazım deyil. Maşını kənara verib saxlayın. Əgər siz hansısa bir qaydanı pozmamısınızsa və yaxud da pozduğunuzun fərqində deyilsinizsə, bir qayda olaraq, bu, adi sənəd yoxlamasıdır. İnspektor həmişəki kimi sizə yaxınlaşacaq və özünü təqdim edəcək. Sonra sənədləri göstərməyinizi xahiş edəcək və əgər sizin heç bir günahınız yoxdursa, o sadəcə, sənədlərin qaydasında olub-olmadığını yoxlayıb sizi yola salacaq. Nəzərə alın ki, bütün sənədlər tez əlçatan yerdə olmalıdır ki, onları uzun müddət axtarmaq lazım gəlməsin. Çünki bu müddət ərzində həm özünüz, həm də inspektor əsəbiləşir, mühit gərginləşir.

Əgər siz hər hansısa qaydanı pozmusunuzsa, inspektor sizin bunu nə vaxt və necə etdiyinizi sizə başa salacaq. Onu axıra kimi dinləyin və yarımçıq kəsməyin. İddiaların mahiyyətini anlayın. Bu zaman deyilənlərin əsaslı olduğu ilə razısınızsa, o zaman lazımsız mübahisəyə daxil olmadan razılaşmaq daha yaxşıdır. Yox, əgər sizdə hansısa bir etirazlar varsa, o zaman sakit bir formada bunu sizin etmədiyinizi bildirin.

Aqressiv olmayın. Sizin kobudluğunuz heç də xoş olmayan vəziyyətə gətirib çıxara bilər. Yüksək vəzifəli himayəçilərə istinad etməyi düşünməyin, əgər belə tanışlarınız yoxdursa, eybi yoxdur. Çünki onsuz da heç nəyə nail olmayacaqsınız. Hamısından yaxşısı ortaq dil tapmaq və razılığa gəlməkdir. Siz artıq anladınız söhbət nədən gedir?

İndi vəziyyət belədir ki, siz 100% heç bir qaydanı pozmamısnız, amma yol polisi iddia edir ki, ötmə qadağan olunan yerdən ötüb keçmisiniz və iki xətti kəsmisiniz. Bu, sadəcə bir misaldır. Belə halda mübahisə etmək lazım deyil, taktikalı və aqressiyasız davranmaq məsləhətdir. Əgər mübahisənin nəticəsində siz və inspektor öz qərarınızda qalmısınızsa, o zaman bildirin ki, siz həmin əməkdaşın rəisi ilə danışmaq istəyirsiniz. Əgər yenə də sizin üçün protokol tərtib edilərsə, bu zaman protokol üzərində qeyd edin ki, siz razı deyilsiniz və sənədin kopyasını istəyin. Amma birdən siz öz haqsızlığını dərk etdinizsə və ya pozduğunuz qaydanın əhəmiyyətsiz olduğunu düşünürsünüzsə, əsəblərinizi pozmadan razılaşın və yolunuza davam edin. Əsəbləriniz və itirdiyiniz vaxt  ödədiyiniz cərimədən daha vacibdir.

İndi isə qadın cazibəsi haqqında. Əgər siz cavan və qəşəngsinizsə və etdiniz səhv əhəmiyyətsizdirsə, onda inspektora zərif və işvəli baxışla baxın və bu səfərlik bağışlanmağınızı xahiş edin. Qaydanı pozmağınız haqqında sadəlövh izahat fikirləşin (bunu qadınlığınıza etibar edə bilərsiniz). Məsələn, sizi nişanlınız gözləyir və ya siz ən yaxın rəfiqənizin toyuna gecikirsiniz. İnspektora kompliment deyin. Ola bilər ki, o yumşalacaq və sənədləri yoxlayıb sizə uğurlu yol arzulayacaq. Amma ola bilər ki, inspektor artıq kobudlaşmış qoca kişidir və qadınlar artıq çoxdan ona maraqlı deyil. Bu zaman sizin səyləriniz hədər gedəcək. Amma unutmayın ki, yolda davranışlarının uşaq kimi olmasına baxmayaraq, qadınlar, bir qayda olaraq, daha diqqətli sürücüdürlər.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.