Peugeot 4007: səylərin birləşməsi

Просмотров: 2670
Peugeot 4007: səylərin birləşməsi

Digər biznes sahələrində olduğu kimi, sürətlə inkişaf edən avtomobil dünyasında da bu və ya digər məqsədə nail olmaq üçün avtomobil istehsalçıları minimal məsrəflərlə maksimal nəticə əldə etməyə imkan verən yeni yolları və metodları daim axtarırlar. Belə metodlardan biri bir neçə şirkətin səylərinin birləşdirilməsidir. 

Təcrübə göstərir ki, bu cür metod özünü tam doğruldur. Aktivlərində bir neçə marka olan iri konsernlər ümumi platforma işləyib hazırlamağa çalışırlar ki, sonradan onun əsasında bir neçə model yaratsınlar, bu isə, öz növbəsində, məsrəflərin xeyli azalmasına və mənfəətin artmasına səbəb olur.

Bundan başqa, bir konsernin tərkibində olan bir neçə marka çox vaxt eyni mühərriklər ailəsinə mənsub olan güc aqreqatlarından, habelə oxşar transmissiyalardan və asqı konstruksiyalarından istifadə edir.

Nəticədə modellər daxilən oxşar olsalar da, zahirən rəngarəng olurlar. PSA Peugeot Citroen konserni də bu yolla getməyi qərara alıb. Özlərinin ilk ofrouderlərini hazırlayarkən fransızlar təzədən velosiped icad etməməyi qərara alaraq, Yaponiyanın Mitsubishi avtomobilqayırma şirkəti ilə səylərini birləşdirməyi məqsədəuyğun hesab ediblər.

Qeyd edək ki, adıçəkilən şirkət dünya bazarında özünü ofrouderlər seqmentinin lideri qismində çoxdan tanıdıb. Fransızlarla yaponların səylərinin birləşdirilməsi qarşılıqlı faydalı şərtlər əsasında baş verib. PSA Peugeot Citroen artıq populyar olan Mitsubishi Outlander XL avtomobilinin platformasını əldə edib.

Bunun əvəzinə konsern Mitsubishi şirkətinə əla dizel mühərriki verib (bu mühərrik Peugeot ilə Ford-un birgə işinin bəhrəsidir), həmin mühərrik Avropa bazarına genişmiqyaslı həmlə etməkdə Mitsubishi-yə yardımçı olacaq.

Beləliklə, birgə işin nəticəsində Mitsubishi Outlander avtomobilinin iki “qardaşı” peyda olub: Citroen C-Crosser və Peugeot 4007. Bu yazıda söhbət sonuncudan gedəcək.

Peugeot 4007-yə nəzər salarkən, ilk növbədə, onun yapon “donoru” ilə oxşarlığı deyil, fransızlar tərəfindən hazırlanmış eksteryer elementləri diqqəti cəlb edir. Radiator barmaqlığının iri “ağzı” (xromlanmış vertikal zolaqlarla birlikdə), duman əleyhinə faraların orijinal üslubda hazırlanmış “yuvaları”, çəpəki qaydada yerləşən baş optika və kapot üzərində xromlanmış iri “şir” avtomobilin hansı markaya mənsub olduğunu açıq-aydın göstərir.

Yalnız Peugeot 4007-yə bir qədər ətraflı nəzər saldıqdan sonra onun yapon krossoveri ilə oxşarlığını anlamağa başlayırsan. Profildən Peugeot 4007-yə baxarkən kandarların xromlanmış üst qatı və pəncərələrin altının haşiyələnməsi diqqəti cəlb edir. Bundan başqa, zəngin Premiun Pack paketinə orijinal dizaynlı 18 düymlük yüngül xəlitəli disklər daxildir. Fransız avtomobilinin arxa tərəfi tünd qırmızı fənərləri və markanın loqotipi ilə seçilir.

Ümumi oxşarlıqlarına baxmayaraq, vizual cəhətdən Peugeot 4007 orijinal xarici görünüşə və öz xarizmasına malik fərdi model kimi qəbul edilir. Dizaynerlər bu özünəməxsus fərdiyyətə avtomobilin ön tərəfində dəyişikliklər etmək sayəsində nail olublar. İndi avtomobilin ön tərəfi təkrarolunmaz fransız gözəlliyi əldə edib. Emblemlərində heyvanlar hökmdarının təsviri olan avtomobillər məhz bu cəhətləri ilə seçilirlər.

Daxili quruluşa gəldikdə, burada Peugeot mütəxəssisləri hər hansı ciddi yenilik tətbiq etməyiblər. Fransız avtomobilini yapon modelindən ayıran yeganə vizual fərq sükan üzərindəki emblemdən ibarətdir. Qalan məsələlərdə interyerlər eynidir. Salonda əyləşən zaman anlayırsan ki, bu avtomobil heç də Peugeot-ya bənzəmir.

Burada əsasən düz xətlərə və monoton rənglərə təsadüf etmək olar. Görünür, yeni interyerin işlənib hazırlanması əlavə xərclər   tələb etdiyinə və nəticədə avtomobilin qiyməti artdığına görə istehsalçılar bundan imtina ediblər.

Cihazlar paneli (burada marşrut kompüterinin informasiya displeyi və iki oyuqda spidometrlə taxometr yerləşir) əla informativliyi və işıqlandırıcı qırmızı rəngi ilə seçilir. Qabaq oturacaqların kifayət qədər yaxşı profilini, habelə yan tərəflərdən yaxşı dəstəyini qeyd etmək lazımdır. Premium Pack top-versiyasında sürücü kreslosu elektrik tənzimləyiciləri ilə təchiz olunub, onların diapazonları istənilən bədən quruluşlu sürücü üçün yetərlidir.

Sərt plastik materialdan geniş istifadə edilsə də, ədalət naminə qeyd etməliyik ki, avtomobilin yığımı “5” bala layiq olan əla səviyyədədir, materialların xoş təəssürat yaradan fakturası və keyfiyyətli dəri interyerin dizaynının darıxdırıcılığına bir qədər rəng qata bilir.

Arxa divan yaxşı profili və rahat oturma imkanları ilə seçilir, eyni zamanda, onu 800 millimetr hərəkət etdirmək olar, odur ki, arxa tərəfdəki sərnişinlərin ayaqları üçün kifayət qədər yer var. Uzaq səfərə çıxarkən komfortun təmin edilməsi üçün rahat dirsək altlığı nəzərdə tutulub (həmçinin iki stəkan altlığı da quraşdırılıb).

Arxa oturacaqlar 60:40 nisbətində qatlanır. Bu əməliyyatı həm bilavasitə salondan həyata keçirmək, həm də baqaj bölməsində xüsusi düymələri basmaq yolu ilə icra etmək olar. Baqaj bölməsinin faydalı həcmi 510 litr təşkil edir, arxa divan qatlandıqda isə 1.686 litrədək artır. Tam ölçülü ehtiyat təkər baqaj bölməsinin altında yerləşdirilib, burada həmçinin üçüncü oturacaqlar cərgəsi də var, o, əsasən uşaqlar üçün yarayır.

Test sınağı üçün seçdiyimiz avtomobilin komplektləşdirilməsi zəngin idi, buraya ksenon faralar, arxa parktronik, dəri salon, yüngül xəlitəli 18 düymlük disklər, Bluetooth və s. daxil idi. Yeri gəlmişkən, baza komplektasiyası da kifayət qədər rəngarəngdir: buraya ABS sistemi, stabilizasiya sistemi, 6 təhlükəsizlik yastığı, klimat-kontrol, tam elektropaket, kruiz-kontrol, audiosistem, 16 düymlük disklər, qabaq oturacaqların isidilməsi sistemi və s. daxildir.

Əlavə ödəniş hesabına opsiya qismində Rocford Fosgate akustikasının Hi-Fi dəstini əldə etmək olar. Həmin dəstə 8 dinamik, sabvufer və 650 vatlıq səsgücləndirici daxildir. Keyfiyyətli səs həvəskarlarına bu opsiyanı əldə etməyi tövsiyə edirik, çünki “Rocford”un səslənməsi, həqiqətən, əladır. Həmçinin əlavə ödəniş hesabına multimedia-naviqasiya kompleksini (GPS naviqasiya sistemi ilə, 30 giqabaytlıq sərt disklə, arxa tərəfi göstərən kamera ilə və diaqonalı 7 düym olan sensorlu rəngli displeylə birlikdə) sifariş etmək olar.

Amma təəssüf ki, avtomobilin naviqasiya sistemi ölkəmiz üçün uyğunlaşdırılmayıb və Azərbaycanda bu sistem hələ yeni quraşdırılır. Buna görə də bu cür bahalı opsiyanı sifariş etməyin mənası yoxdur. Bundan başqa, sistemin “fikirləşmə” müddəti kifayət qədər uzun çəkir. Bəzən radiostansiyaları və ya MP3 diskindəki trekləri dəyişmək üçün gözləmə intervalı 10-15 saniyəyə çatır.

Avtomobilə 2,4 litr həcmə və 170 at gücünə malik olan MIVEC mühərriki ilə yanaşı, 5 pilləli mexaniki transmissiya, yaxud pilləsiz CVT variatoru (6 virtual pillə arasında keçid etmək imkanı ilə) quraşdırıla bilər. Bizim sınaqdan keçirdiyimiz Peugeot 4007 variatorlu versiya idi. Bu tipli transmissiya ilə təchiz olunmuş fransız-yapon ofrouderi yüksək dinamika xarakteristikaları ilə seçildi. Mühərrikin bütün fırlanma dövrələrində rəvan dartı qüvvəsi təmin edilir. Bundan başqa, variator ənənəvi avtomat transmissiyaya nisbətən qənaətcildir.

Trasda Peugeot 4007 düz xətt boyunca rahatca hərəkət edir və faktiki olaraq kənara sapmalar baş vermir. Sükanla idarəetmə rahatdır, avtomobil sürücünün hərəkətlərinə vaxtında və yaxşı reaksiya verir. Amma “sıfıra” yaxın zonada informativlik çatışmır.

Təkərlərin altında asfalt hamar olduqda Peugeot 4007 rəvan hərəkəti və döngələrdə yana az meyllənməsi ilə sürücünü sevindirir. Avtomobil aydın hərəkət trayektoriyası cızır, hətta bəzən unudursan ki, adi minik avtomobilinin deyil, hündür krossoverin sükanı arxasındasan.

Transmissiya rejimlərinin dəyişdirilməsi qabaq oturacaqlar arasındakı tuneldə dairəvi dəyişdirici vasitəsilə həyata keçirilir. Burada cəmi üç rejim nəzərdə tutulub: 2WD, 4WD (qabaq təkərlər boş-boşuna fırlandıqda elektronika arxa cinahı işə salır) və Lock (mərkəzi diferensialın bloklanmasının emulyasiyası). Bunlar şəhər yollarında hərəkət edən ofrouder üçün yetərli funksiyalardır.

Onunla qarlı həyətdə qar topaları üzərində və ya bağ evinə qədər çöllükdə hərəkət etmək olar. Amma bundan artığına Peugeot 4007 hazır deyil, avtomobilin kiçik klirensi və iri kənarları onun ofrouder potensialını xeyli məhdudlaşdırır.
Peugeot 4007 özünü asfalt yollara meylli olan krossover kimi göstərdi. Onun çox da güclü olmayan ofrouder xarakteristikaları və nahamar yerlərdə sərtliyi asfalt üzərində rahat idarə olunması ilə kompensasiya olunur.



Vasif Xəliloğlu
Foto: Toğrul Məmmədov




© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir. 

Şərhlərin sayı: 0

AVATAR
Hələ heç kim şərh verməyib. Birinci siz olun.