Peugeot 307 alarkən

Просмотров: 3947
Peugeot 307 alarkən

Peugeot 307 avtomobili 2001-ci ildə 306-cı modeli əvəz edib. İlk öncə 3 və 5 qapılı hetçbeklər işıq üzü gördü, bir ildən sonra isə 307 SW universalı peyda oldu. 307-ci modelin dizaynı sələfləri ilə müqayisədə əsl inqilab demək idi: bu avtomobil təkcə gözəl deyil, həm də inanılmaz dərəcədə geniş idi. Onun qiyməti kifayət qədər “insaflı”, təchizatı isə yüksək səviyyəli olduğundan Peugeot 307 sürətlə satılmağa başladı. Doğrudur, əvvəlcə avtomobildə bəzi xırda nasazlıqlar aşkar edildi, nəticədə bir çox alıcılar ümidlərinin doğrulmadığını və aldadıldıqlarını zənn etdilər.

Mühərriklər

Hetçbeklər üç benzin və üç dizel mühərriki ilə təchiz olunublar. Ən kiçik benzin mühərriki (1,4 litr, 75 at gücü) 206-cı modeldə özünü yaxşı cəhətdən göstərdi, amma daha ağır 307-ci model üçün o, zəifdir və yalnız avtomobili sakit tərzdə sürən sürücüləri qane edə bilər. 1,6 litr həcmə və 110 at gücünə malik mühərrik isə burada, doğrudan da, yerinə düşür. Sürətli avtomobilsürmə üslubunun həvəskarları üçün isə Peugeot 307-ni kifayət qədər güclü avtomobilə çevirməyə qadir olan 2 litr həcmli və 137 at gücünə malik aqreqat vardır.

Ümumən mühərriklərə hər hansı irad yoxdur, onların işi etibarlıdır. Normal istismar şəraitində yağı hər 30 min kilometrdən bir, ağır şəraitlərdə isə hər 20 min kilometrdən bir dəyişmək nəzərdə tutulub. Bizim yol şəraitində, xüsusən sürücü avtomobili şəhər yollarında çox sürürsə, hər 20 min kilometrdən bir yaxşı olar ki, mühərrikə qulluq etsin. İlk illərdə istehsal olunmuş avtomobillərdə rast gəlinən xırda nasazlıqlara gəldikdə, aşağı temperaturlarda mühərrikin bir qədər çətin işə düşməsini göstərmək olar.

Bu nöqsan mühərrikin idarə olunması sisteminin yenidən proqramlaşdırılması yolu ilə aradan qaldırılır, əgər bu problemlə üzləşmisinizsə, yerli dilerə müraciət edin. 

Yuxarıda qeyd edildiyi kimi, hetçbeklərə quraşdırılan dizel mühərriklərinin sayı da üçdür: 1,4 litr həcmli (68 at gücü) və 2 litr həcmli (90 və 110 at gücü). Bütün mühərriklər turbokompressorla və “common rail” sistemi ilə təchiz olunublar. Kiçik dizel mühərriki ekoloji cəhətdən qaneedicidir, amma onunla avtomobil yüksək sürətlə hərəkət edə bilmir. 2 litr həcmli dizel mühərriki quraşdırılmış avtomobillər isə daha cəlddir (xüsusən 110 at gücünə malik olanlar). Common rail sistemi ilə təchiz edilmiş bütün mühərriklər kimi bu aqreqat da dizel yanacağının keyfiyyətinə qarşı tələbkardır. Ümumiyyətlə isə onların etibarlı işinə güvənmək olar. Normal istismar şəraitində yağı hər 20 min kilometrdən bir, ağır şəraitlərdə isə hər 15 min kilometrdən bir dəyişmək tələb olunur. Bizim yol şəraitində yağı hər 15 min kilometrdən bir dəyişmək məsləhətdir.

Peugeot mühərriklərinin özəl xüsusiyyəti istilik rejiminin gərgin olmasından ibarətdir, buna görə də yağa qarşı spesifik tələblər irəli sürür. Bu səbəbdən yaxşı olar ki, istehsalçının tövsiyə etdiyi Total yağından istifadə edəsiniz. Soyuducu mayenin dəyişdirilməsini 2 ildə bir dəfə, yaxud 120 min kilometrdən bir həyata keçirmək lazımdır.

Transmissiya

Avtomobillər 5 pilləli mexaniki transmissiyalarla və 4 diapazonlu AL4 avtomat transmissiyaları ilə təchiz olunublar. Mexaniki transmissiyalar Peugeot üçün ənənəvi olaraq yanacaq sərfində qənaətcilliyə imkan verir və etibarlı işləyir. Bununla belə, bir sürətdən digərinə keçid o qədər də ideal səviyyədə deyil. AL4 adaptiv transmissiyaların yeni nəslini təmsil edir və transmissiyanı rahat tənzimləməyə şərait yaradır. Doğrudur, belə hesab edilir ki, onların zəmanətli resursu 150 min kilometr təşkil edir (bu, alman ZF-lərindən azdır), buna görə də 100 min kilometr məsafə qət etmiş avtomat transmissiyalı avtomobili alarkən diqqətlə düşünmək lazımdır. Həm mexaniki, həm də avtomat transmissiyalar istismar müddətində qulluq tələb etmir, amma yaxşı olar ki, hər 60 min kilometrdən bir onların yağını dəyişəsiniz və yalnız orijinal yağlardan istifadə edəsiniz. Bu sözlər xüsusən avtomat transmissiyalara aiddir.

Bəzi avtomobillərdə bənd-ləyicilərin tez sıradan çıxması müşahidə olunur, amma bu nasazlığın səbəbi, çox güman ki, sürücülərin avtomobilləri düzgün istismar etməməsidir.

Transmissiyaya qarşı hər hansı başqa irad yoxdur.

Asqı və sükanla idarəetmə

Asqı kifayət qədər sadədir: ön tərəfdə McPherson dayaqları, arxada isə yarımmüstəqil asqı. 307-ci modeldə fransızlar arxa asqıda ənənəvi torsionlardan imtina ediblər. Nəticədə avtomobilin hərəkətinin rəvanlığı bir qədər azalsa da, əvəzində onun sadəliyi və etibarlılığı artıb. Axı bu cür konstruksiyada, praktiki olaraq, sınası heç bir şey yoxdur. Ön tərəfdə təxminən hər 40 min kilometrdən bir stabilizatorun dayaqlarını dəyişmək lazım gəlir, dairəvi dayaqlar və saylent-bloklar isə 100 min kilometrədək məsafəyə davam gətirir. Dairəvi dayaqlar rıçaqlarla birlikdə dəyişdirilir, saylent-bloklar isə ayrıca preslənir. 307-ci modelin amortizatorları Peugeot-nun öz istehsalıdır, onlar yüksək keyfiyyətliliyi və böyük resursu ilə (çox vaxt 100 min kilometrdən artıq) seçilirlər. Odur ki, amortizatorları dəyişmək zərurəti yaransa, yaxşı olar ki, orijinal amortizatorlar qoyasınız. Bu, sizin üçün ən sərfəli yoldur. Hidrogücləndirici ilə təchiz olunmuş sükanla idarəetmə sistemi etibarlı işləyir, bununla belə, ucluqların və sükan dartılarının mütəmadi dəyişdirilməsi tələb olunur.

Əyləc sistemi

Avtomobilə ön və arxa tərəfdə disk əyləcləri quraşdırılıb. Bütün avtomobillər ABS ilə təchiz olunub, həmçinin onların çoxu stabilizasiya sistemi ilə də təchiz olunub. Əyləc kötüklərini hər üçüncü dəfə dəyişdirərkən əyləc disklərini də dəyişdirmək məsləhətdir, əyləc mayesi ildə bir dəfə, yaxud hər 60 min kilometrdən bir dəyişdirilir. 

Kuzov və elektrik avadanlığı

Peugeot 307-nin kuzovunu çoxları bəyənir. Avtomobilin içərisi genişdir, salon hündürdədir, iri ölçülü pəncərələr bayırdakıları asanlıqla müşahidə etməyə imkan verir. 307 SW universalı üçüncü cərgədəki oturacaqlarla da təchiz oluna bilər. Bu da 7 oturacaq yeri deməkdir. Geniş kuzovun mənfi cəhəti ondadır ki, ön oturacaqda oturan, hətta orta boyu olan insanlar da avtomobilə minərkən və ya düşərkən geniş və tez çirklənən astanada şalvarlarının bulaşması riskinə məruz qalır. Bundan başqa, salonun üzləmə materiallarının keyfiyyəti yüksək deyil və ilk illərdə buraxılmış avtomobillərdə bütün salonda cırıltı səsləri gəlir. Bu, xüsusən universallarda özünü qabarıq büruzə verir. Doğrudur, son zamanlar zavod bu qüsurların aradan qaldırılması üçün müəyyən tədbirlər görüb. İlk dövrlərdə buraxılmış “cırıltı” salonlar üçün isə cırıltı ilə mübarizə aparmağa imkan verən zavod dəstləri təklif olunur. Həmçinin avtomobili bardürlərin və qar topalarının yanında saxlayarkən ehtiyatlı olmaq lazımdır. Çünki radiator zəif kronşteyndən asılıb və ona asanlıqla xəsarət yetirilə bilər.

Peugeot 307-nin elektrik avadanlığı da təzadlı hisslər doğurur. Adi naqillərin əvəzinə multipleks şinlərinə keçid elektrik komponentlərinin sayının artması ilə bağlıdır və özlüyündə proqressiv və məntiqi həll variantı sayıla bilər. Peugeot 307-də işıqlandırma sistemini, güzgülərin qatlanması alqoritmini və digər elementləri öz istəyinizə uyğun olaraq tənzimləyə bilərsiniz. 307-yə, həmçinin yağış sensoru və digər servis qurğuları quraşdırılıb. Özü də bütün bu qurğular kifayət qədər kompaktdır və avtomobildə elektrik məftillərinin sayı azdır. Bu da nəzəri cəhətdən elektrik sisteminin etibarlılığını artırır.

Akkumulyatoru alışdırma sistemi söndükdən ən azı iki dəqiqə sonra söndürmək olar. Akkumulyatoru quraşdırdıqdan sonra isə alışdırma sistemini ən azı iki dəqiqə yandırmaq olmaz. Əks halda blok bütün məlumatları “unuda” və hətta əvəzlənmə tələb edə bilər. Eyni hal akkumulyatorun yükünün boşalması zamanı da baş verə bilər. Əlbəttə, istehsalçı xırda nazsazlıqlar ilə mübarizə aparıb, qüsurlu detalları dəyişib, onların konstruksiyasını yenidən işləyib və proqram təminatını təkmilləşdirib. Nəticədə bir neçə il ərzində problemləri həll etmək mümkün olub.

Nəticələr

Əgər siz Peugeot 307 almaq istəyirsinizsə, onun müsbət və mənfi cəhətləri barədə aydın təsəvvürünüz olmalıdır. Gözəl dizayn, rahat və geniş salon, yaxşı hərəkət keyfiyyətləri, etibarlı asqı (yeri gəlmişkən, ona qulluq kifayət qədər ucuzdur), kifayət qədər qaneedici işıqlandırma səviyyəsi və nisbətən aşağı qiymət – bütün bunları Peugeot 307-nin müsbət cəhətlərinə aid etmək olar. Amma bilmək lazımdır ki, bahalı olmayan avtomobillərdə heç də hər şey ideal olmur. Buna görə də səs-küylü salonla və elektrik avadanlıqları ilə bağlı bəzi problemlərlə barışmaq lazım gələcək. Avtomobili seçərkən kuzovun, asqının, mühərrikin və transmissiyanın vəziyyəti ilə yanaşı elektrik avadanlığının işini də yoxlayın. Əgər sonuncuda problemlər varsa, başqa avtomobil axtarmağınız məsləhətdir, çünki mövcud nasazlıqları aradan qaldırmağınız çoxlu vaxt və pul itkisinə səbəb ola bilər.

Avtomobili hökmən firma servisində çalışan mütəxəssislərə göstərin. Onlar xırda nasazlıqların aradan qaldırılması üçün hansı işlərin görüldüyünü və hansı işləri görməyin tələb olunduğunu, həmçinin bunun nəticələrini daha yaxşı müəyyən edə bilərlər. İşlənmiş avtomobillərin qiymətinə gəldikdə, Bakıda onlar 13 min ABŞ dollarından 17 min ABŞ dollarınadək satılır.


© 2007 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.