Optimal həll: Kia Optima

Просмотров: 3881
Optimal həll: Kia Optima

Beynəlxalq Nyu-York avtosalonunda Kia Motors korporasiyası Optima sedanını təqdim etdi. Yeni avtomobil satış üçün Avropa avtosalonlarında gələn ilin yazında peyda olacaq.

Yeni model Kia Motors-un Frankfurtdakı (Almaniya) və İrvindəki (Kaliforniya ştatı, ABŞ) konstruktor mərkəzlərinin birgə səyi ilə yaradılıb. İkinci nəsil Optima avtomobili bu modelin əvvəlki versiyasından uzun və enlidir, hündürlüyü isə ondan azdır. Avtomobil ölçülərin və proporsiyaların optimal balansını təmin edən orta qabaritli yeni platformada yaradılıb.

Optima-nın əla dinamikasının mənbəyi gücün və qənaətcilliyin əla birliyini təmin edən yeni güc aqreqatlarıdır. Bəzi mühərriklər birbaşa yanacaqçiləmə sistemi və turbokompressorla təchiz olunub. 2011-ci ildə hibrid versiyası da işıq üzü görəcək, o Şimali Amerika bazarı üçün nəzərdə tutulub. 

Konsepsiya

Schreyer Line konsepsiyası əsasında işlənib hazırlanmış aqressiv radiator barmaqlığı və avtomobilin yan səthlərinə girən iri faralar birmənalı olaraq ondan xəbər verir ki, qarşınızdakı avtomobil məşhur Piter Şrayerin rəhbərliyi altında yaradılmış yeni nəsil Kia Optima-nın təmsilçisidir.

Yeni Optima-nın kandarı əvvəlki modelə nisbətən aşağı, kuzovu isə xeyli genişdir. Yuxarıdan avtomobilin profili kuzovun ön dayaqlarından arxa dayaqlarına doğru istiqamətlənən xromlanmış qövs ilə haşiyələnib.

Bu dizayn üslubu kuzovu daha alçaq göstərir. Dam örtüyünün xətti tədricən rəvan şəkildə hündür və aydın “çiyin” xətlərinə keçməklə avtomobilin genişliyini və təkər bazasının uzunluğunu (2795 mm) vurğulayır.

Müasir dizaynlı təkər tağları və getdikcə kiçilən arxa pəncərə sedana həm zərif, həm də idmansayağı görkəm verir. Əlavə opsiyalar qismində müştərilərə ksenon faralar (səviyyənin avtomatik tənzimlənməsi funksiyası ilə), arxa tərəfdə işıq-diod optikası, arxa spoyler və 17 və ya 18 düym diametrli yüngül xəlitəli təkər diskləri təklif olunacaq.

Yeni Optima-nın interyerinə baxan insanda şübhə qalmır ki, bu məhz sürücü üçün yaradılmış avtomobildir. Cihazlar paneli pilot kabinəsini xatırladır, hündür mərkəzi konsol isə (qısa sürətdəyişmə rıçaqı ilə birlikdə) bu təəssüratı gücləndirir.

Günəş əleyhinə şüşədən düzəldilmiş panoramlı lyuk salonu daha geniş göstərir. Sükan çarxının arxasında yerləşən sürət dəyişdiriciləri Şimali Amerikadan kənara ixrac olunan bütün avtomobillərin standart komplektasiyasına daxildir.

Təchizat

Optima-nın baza komplektasiyasına standart opsiyalarla yanaşı, multiformatlı Dimension audiosistemi  daxildir. O, səkkiz dinamiklə, habelə kənar qurğuların qoşulması üçün analoqlu giriş, USB portu və Bluetooth interfeysi ilə təchiz olunub.

Avropa və Şimali Amerika alıcıları üçün opsiya qismində həmçinin səslə idarəetmə funksiyalı və GPS-naviqasiyalı multimedia sistemi təklif olunacaq.

Mailliyi və hündürlüyü tənzimlənən sükan sütunu, kruiz-kontrol və yanacaq sərfinin indikatoru Optima-nın sürücüsünə nəinki uzaq məsafələrə komfortla səfər etmək, həm də bunu ən qənaətcil rejimdə həyata keçirmək imkanı yaradır.

Komfortu artıran əlavə opsiyaların siyahısında həmçinin mühərriki işə salan və söndürən düymə, Smart Key açarsız giriş sistemi, ikizonalı klimat-kontrol, kresloların və salonun digər elementlərinin dəri üzlüyü, maye kristallı displeylə təchiz olunmuş Supervision cihazlar paneli, sürücünün yaddaş funksiyalı kreslosu (kreslonun vəziyyətinin tənzimlənməsi üçün), habelə ön oturacaqların ventilyasiyası və isidilməsi sistemi və arxa oturacaqların isidilməsi sistemi var.

Platforma
 
İkinci nəsil Optima avtomobili tamamilə yeni platformada hazırlanıb. Avtomobilin uzunluğu 4845 mm təşkil edir ki, bu da əvvəlki modeldən 45 mm çoxdur. Avtomobilin eni 1830 mm-dir, təkər bazası isə əvvəlki modeldən uzundur və 2795 mm təşkil edir.

Klirensin qısaldılması hava axınına müqaviməti azaltmağa şərait yaradıb ki, bu da aerodinamik səs-küyü və yanacaq sərfini azaltmağa imkan verir.

Avtomobilin kuzovu yüksək keyfiyyətli poladdan hazırlanıb. Bu da həm avtomobilin çəkisini azaltmağa, həm də konstruksiyanın möhkəmliyinə şərait yaradıb.

Optima-nın ön və arxa asqıları müstəqildir. Ön asqı McPherson tipli, arxa asqı isə çoxrıçaqlıdır.

Mühərrik 

Qərbi Avropada Optima-nın alıcıları iki güc aqreqatından birini seçə bilərlər: qazbölüşdürmə fazalarının pilləsiz dəyişdirilməsi sistemi CVVL ilə (bu sistem təkmilləşdirilib) təchiz olunmuş 2 litr həcmli benzin mühərriki, yaxud ucluğun geometriyasının dəyişdirilməsi funksiyası ilə təchiz olunmuş turbini (VGT) olan 1,7 litr həcmli turbodizel mühərriki.

MDB-də və bəzi Şərqi Avropa ölkələrində yeni Optima həmçinin 178 at gücünə malik 2,4 litr həcmli benzin mühərriki ilə təklif olunacaq.

Yeni nəsil Optima avtomobili alıcılara 6 pilləli avtomat və ya mexaniki transmissiya ilə təklif olunacaq. Eyni zamanda, avtomat transmissiya əl rejimi ilə (Sportmatic) təchiz olunub. 

Avropadan kənarda yeni Optima 2010-cu ilin sonunda peyda olacaq. O, gücləri 278 at gücünə qədər olan, birbaşa yanacaqçiləmə sistemi ilə təchiz olunmuş (Theta II) altı yeni qənaətcil güc aqreqatı ilə təklif olunacaq.

Yeni nəsil Optima-nın standart komplektasiyası səmərəli təhlükəsizlik sistemi ilə təchiz olunub. Bu sistemə aşağıdakılar daxildir:

-altı təhlükəsizlik yastığı, ön kresloların aktiv baş altlıqları, qapılarda zərbə əleyhinə tirlər, uşaq oturacağının bərkidilməsi sistemi (LATCH) və şinlərdəki təzyiqə nəzarət sistemi (TPMS).

Satış bazarından asılı olaraq standart və ya əlavə opsiyalar qismində bunlar təklif olunacaq: bloklanma əleyhinə əyləc sistemi (ABS), hərəkətin stabilliyinə nəzarət edən Electronic Stability Control (ESC) elektron sistemi, hərəkət kursunun stabilliyini təmin edən Traction Control System (TCS) elektron sistemi, ekstremal əyləcləmə zamanı yardım sistemi Brake Assist System (BAS) və yoxuşa qalxma zamanı yardım sistemi Hillstart Assist System (HAC).

 




© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.



Şərhlərin sayı: 0

AVATAR
Hələ heç kim şərh verməyib. Birinci siz olun.