Nissan Pathfinder 2013

Просмотров: 2657
Nissan Pathfinder 2013
  • Nissan Pathfinder 2013
  • Nissan Pathfinder 2013
  • Nissan Pathfinder 2013
  • Nissan Pathfinder 2013
  • Nissan Pathfinder 2013
  • Nissan Pathfinder 2013
  • Nissan Pathfinder 2013

Yaponiyanın avtomobil nəhəngi Nissan avtomobil ictimaiyyətinə Pathfinder modelinin seriyalı versiyasını təqdim etdi. Ofrouderin dördüncü nəsli ilk dəfə Detroyt-2012 avtosalonunda nümayiş etdirildi və avtomobil ekspertlərində ziddiyyətli hisslər yaratdı. Aqressiv xarici görünüşə malik rama konstruksiyalı ofrouderi yaraşıqlı xarici görünüşü olan daşıyıcı konstruksiyalı krossover əvəz etdi.

Əlbəttə, yapon dizaynerləri və konstruktorları işlərini mümkün qədər yaxşı görməyə çalışıblar və nəticə heç də pis alınmayıb. Nissan Pathfinder 2013 avtomobili yolsuzluq şəraitini dəf etmək qabiliyyəti, komfortluluq, rahat idarəetmə və qənaətcillik kimi keyfiyyətlər arasında kompromisin nümunəsidir. Modelin populyarlığının pik məqamı 2000-ci illərin ortasına təsadüf edib, sonra isə satışların həcmi aşağı düşüb. İstehlakçılar diqqətlərini daha çox qənaətcil krossoverlərə yönəldiblər. Bu səbəbdən Nissan yenilənmiş Pathfinder-i bu günün tələblərinə uyğunlaşdırıb.

Avtomobilin çəkisinin azaldılması konstruktorların qarşısında duran mühüm vəzifə idi. İndi onlar qürur hissi ilə bildirirlər ki, Nissan Pathfinder-in çəkisi avtomobilin hərəkət xarakteristikalarına xələl gətirilmədən 225 kq azaldılıb. Yapon krossoveri öz seqmentində ən yüngül avtomobillərdən biridir. Ön ötürücülü modifikasiyanın çəkisi 1.880 kiloqram, tam ötürücülü versiyanın çəkisi isə 1.946 kiloqramdır. Ofrouderun yedəyinə tam kütləsi 2,2 ton olan qoşqunu qoşmaq mümkündür.

Nissan Pathfinder 2013-ün xarici dizaynı əvvəlki nəslin dizaynından fərqlənir. Avtomobilin yaraşıqlı xarici görünüşü onun aerodinamik keyfiyyətləri ilə tam vəhdət təşkil edir. Avtomobil əvvəlkindən daha dinamik və cəlddir. Qabaq bamperə və kandarlara qara rəngli plastik üstlüklər vurulub, radiator barmaqlığı və qapı dəstəkləri isə xromla bəzədilib. Avtomobilin beşinci qapısına yaraşıqlı spoyler quraşdırılıb.

Pathfinder 2013-ün mühərriki
Dördüncü nəsil Nissan avtomobili üçün 3,5 litr həcmə və 260 at gücünə malik altı silindrli mühərrik təklif olunur. Mühərrik Xtronic variatoru ilə tandemdə işləyir. Transmissiya və mühərrik yanacağa qənaət edilməsinə böyük töhfə verir. Ön ötürücülü versiya qarışıq hərəkət rejimdə 100 kilometr məsafəyə cəmi 10,7 litr yanacaq işlədir. Tam ötürücülü versiya isə analoji şəraitdə 11,2 litr yanacaq sərf edir.

Yeni Pathfinder ailə avtomobili qismində əsas rolunun öhdəsindən layiqincə gələcək. Belə ki, oturacaqların hər üç cərgəsində yerlər kifayət qədər genişdir, xüsusi texnologiya isə ikinci cərgəni çox qısa müddətdə qatlamağa və rahatca arxaya keçməyə imkan verir. Zərurət yarandıqda krossoverin arxa oturacaqlarını qatlayıb onu qısa müddətə yükdaşıyan furqona çevirmək və təyinat yerinə xeyli baqaj daşımaq olar.

Nissan Pathfinder 2013-ün salonunda dəri üzlük çəkilmiş oturacaqlar, ikizonalı klimat-kontrol, isidilən sükan çarxı və Bose akustikası diqqəti cəlb edir. Sürücü avtomobilin iş rejimi barədə bütün məlumatları Advanced Drive-Assist sisteminin 4 düymlük displeyi vasitəsilə əldə edə bilər. O, spidometrlə taxometrin arasında quraşdırılıb. Əyləncə məlumatları və naviqasiya informasiyaları isə mərkəzi konsoldakı böyük ekranda əks olunur.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.