Nissan Juke-R

Просмотров: 2172
Nissan Juke-R
  • Nissan Juke-R
  • Nissan Juke-R
  • Nissan Juke-R
  • Nissan Juke-R

Bu avtomobil son dərəcə gözqamaşdırıcı, sürətli və temperamentlidir. Bir sözlə, inanılmaz dərəcədə valehedici avtomobildir! Onun kresloları (5 nöqtəli təhlükəsizlik kəmərləri ilə birlikdə) OMP-dən, mühərriki isə Nissan GT-R-dən götürülüb.

Yəqin ki, oxucular bu avtomobilin tarixçəsini xatırlayırlar. Ötən ilin sonlarında Nissan sosial şəbəkələrdə geniş aktivlik göstərərək fantastik eksperimenti barədə məlumatlar yaydı. Elə bir eksperiment ki, Frankenşteynin yaradılması onun yanında məktəbin fizika kabinetində aparılmış adi sınaqdan başqa bir şey deyil. Əslində Nissan-ın ideyası son dərəcə sadə idi: təkrarolunmaz GT-R-in “orqanlarını” kompakt krossoverə köçürmək və nəticədə nə alındığını müşahidə etmək. Qəribədir ki, əvvəllər bu heç kimin ağlına gəlməmişdi.

Bu cür sınaq Nissan təmsilçiləri üçün yeni deyildi. Vaxtilə onlar elə həmin kompakt krossoverin salonuna motosikletin yanacaq çənini quraşdırmışdılar və bu ideya avtomobil həvəskarlarının xoşuna gəlmişdi. Baxmayaraq ki, çən boş idi və sırf dekorativ rol oynayırdı (sürət qutusunun tutqacı üçün altlıq kimi istifadə olunurdu), ideyanın özü diqqətçəkən idi...

İki il keçməmiş Nissan təmsilçiləri yeniliyin dozasını ciddi şəkildə artırmağı qərara aldılar. Bu işdə Nissan-ın Avropa texniki mərkəzinə (NTC-E) ingilislərin (Britaniyanın Northemptonşir qraflığından olan RML Group) köməyi lazım gəldi. Bu şirkət Nissan tərəfindən təsadüfən seçilməmişdi: 1997-ci ildə BTCC  çempionatı üçün Nissan Primera-nı hazırlamışdı. Özü də avtomobil böyük tələskənliklə, vaxt qıtlığı şəraitdə hazırlanmışdı, həmin il çempionatda onun iştirakı ən sonda qeydə alındı. Növbəti ildə bu avtomobil komandaya doqquz qələbə qazanmaqda kömək etdi. Juke-R-in hazırlanmasında da RML Group tələsik işləməli oldu: bütün işlərin yerinə yetirilməsi üçün Nissan britaniyalı mühəndislərə altı aydan da az vaxt vermişdi ki, bu aylardan da üçü bilavasitə avtomobilin hazırlanmasına sərf olundu. Daha doğrusu, bir yox, iki avtomobilin: dünya 22 həftədən sonra sükanları sağ və sol tərəfdə yerləşən iki Juke-R-in ərsəyə gəlməsinin şahidi oldu.

Yaponlar yeni Nissan Juke-R superkarının qiymətini də müəyyənləşdirdilər. Yapon avtomobil istehsalçısının ABŞ-dakı bölməsinin vitse-prezidenti Devid Reyterin məlumatına görə, yeni krossoverin qiyməti 590 min ABŞ dolları təşkil edəcək.
Top-menecerin sözlərinə görə, belə yüksək qiymət onunla əlaqədardır ki, Juke-R yalnız məxsusi olaraq konkret alıcı üçün hazırlanacaq unikal avtomobil olacaq. O, kolleksiyaçılar üçün, habelə əsl innovativ nəqliyyat vasitəsinin sahibi olmaq istəyənlər üçün nəzərdə tutulub. Yaponlar Juke-R superkarının ildə cəmi 25 nüsxəsini buraxmağı planlaşdırırlar. Təsdiq olunmayan məlumatlara görə, üç avtomobil artıq sifariş edilib, onlardan biri yayda Birləşmiş Ərəb Əmirliklərinə göndəriləcək.

Nissan özünün Juke-R krossoverini Salan Salahuddin superkarları ilə mübarizə aparması üçün Dubaya göndərib. Sonuncuların sırasına Ferrari 458 Italia Lamborghini Gallardo daxildir.

Nissan şirkəti klip buraxıb, klipdə GT-R mühərriki quraşdırılmış Juke-R-in Dubai International Marine Club yarışlarında 0,58 km məsafəyə yürüşdə bir neçə dairədən sonra Lamborghini Gallardo, Ferrari 458 ItaliaMercedes-Benz SLS AMG-yə necə qalib gəldiyi göstərilir. Avtomobili Lukas Ordonyes idarə edib. O, 2008-ci ildə Nissan GT akademiyasını bitirib və ötən il Le-Man yürüşündə podiuma qalxmağa nail olub. O, bunları deyib: “Mən GT-R-ə valehəm, Juke avtomobilini görəndə həmişə zövq alıram. Juke-R bu superkarlara qalib gələndə çox sevindim”.

Rəsmi məlumatlara görə, Juke-R-in 100 km/saat sürət yığmasına cəmi 3,7 saniyə tələb olunur ki, bu da Lamborghini Gallardo LP560-4 superkarının göstəricisi ilə eynidir. Beləliklə, Juke-R dünyanın ən sürətli superkarıdır. Yarışlar başlayan kimi Juke-R krossoveri irəli şığıyaraq məşhur brendlərin təmsilçilərini geridə qoyur və yarışın sonuna qədər liderlik mövqeyini əldən vermir.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.