Müasir avtomobil dizaynerləri arasında ən çox tanınan 5 şəxs

Просмотров: 1630
Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs
  • Müasir avtomobil dizaynerləri arasında ən çox tanınan 5 şəxs

Valter de Silva

İspan mənşəli bu italiyalının adı hələ Volkswagen konserninin şef-dizayneri vəzifəsini tutmasından xeyli əvvəl məşhurlaşmışdı. Vaxtilə Alfa Romeo kompaniyasında onun qazandığı nailiyyətlər avtomobil dünyasında indiki uğurlarından heç də az rezonans doğurmamışdı. Onun hazırladığı Alfa Romeo 156 modelini tərəddüd etmədən 90-cı illərin ən gözəl avtomobillərindən biri adlandırmaq olar. 

Əlbəttə, karyerasında elə dövrlər də olub ki, Valter de Silva o qədər də uğurlu olmayan qəribə dizayn eksperimentləri aparıb. Məsələn, Alfa Romeo 166 modeli avtomobil sahəsinin peşəkarları arasında heyranlıq və məftunluq hisslərindən daha çox, anlaşılmazlıq və təəccüb hissləri doğurdu. Eləcə də XXI əsrin onun hazırladığı avanqard Seat-lar peşəkar dizaynerdən daha çox, həvəskar dizaynerin işinə bənzəyir. Lakin onun son illərə aid işləri öz möhtəşəmliyinə və əhəmiyyətinə görə əvvəlki işlərini kölgədə qoydu. Onun sayəsində Audi avtomobillərinin dizayn üslubu xüsusi gözəllik əldə etdi. İndi bu avtomobillərdə alman sanballılığı ilə ispan-italyan ehtiraslılığının cizgiləri birləşib. Onun yaradıcılığının zirvəsi isə Audi A5, Audi R8 və Volkswagen Scirocco modelləridir.

Piter Şrayer

Lüks markalı avtomobilləri gözəlləşdirmək bir çox avtomobil hazırlayanlara müyəssər olsa da, bu və ya digər brendin kütləvi avtomobillərinin yaddaqalan obrazını düzətlməyə yalınız az sayda dizaynerlər nail olublar. Piter Şrayer onların arasındadır. O, avtomobil dizaynı sahəsində məşhur şəxsdir. Belə ki, birinci nəsil Audi TT-nin dizaynını məhz o hazırlayıb. Bu model peşəkarlar arasında öz dövrünün olduqca əhəmiyyətli dizayn nümunəsi sayılır. Belə ki, o, dünya avtomobil sənayesində dizayn işinin inkişafına böyük təsir göstərib. Bu uğurların fonunda elə təəssürat yaranmışdı ki, daha fəth edilməli zirvə qalmayıb. Amma Piter Şrayer əsas uğurunu 2006-cı ildən şef-dizayner vəzifəsində çalışdığı Kia-da qazandı.

Şübhəsiz ki, Audi TT-dən fərqli olaraq, onun hazırladığı heç bir Kia modelini pərəstiş obyekti adlandırmaq olmaz. Bununla belə, bütövlükdə bu Koreya markasının modellərinin dizaynında baş vermiş əsaslı dəyişiklikləri də görməmək mümkün deyil. Adətən bizdə belə rəy yaranıb ki, Koreya markaları dizayn üslubu baxımından Avropa, ABŞ və yapon modellərindən geridə qalır. Amma indi Kia avtomobillərinin dizaynı istər Avropa, istərsə də ABŞ və yapon modelləri üçün nümunə sayıla bilər. Bunda isə, sözsüz ki, Piter Şrayerin böyük əməyi var.

Stiv Mattin

Bu britaniyalı dizayn ustasının dünya miqyasında ən məşhur olduğunu demək olmaz, amma Rusiyada onun müəyyən müddətdən bəri ölkənin əsas dizayneri hesab edildiyini söyləmək olar. Məhz bu dizayner AvtoVAZ-ın bütün gələcək modellərinin üslubunu müəyyənləşdirir. 2000-ci illərin başlanğıcında Mercedes-Benzdə onun karyerasında yüksəliş baş verdiyi zaman Stiv Mattin dünyanın qabaqcıl avtomobil dizaynerləri sırasına daxil oldu. Bu şirkətdə bir çox modellərin hazırlanmasında onun əməyi olub. Onun ərsəyə gətirdiyi əsas modellər isə ML və GL modelləridir.

Stiv Mattin 2005-ci ildən 2009-cu ilədək Volvo-nun şey-dizayneri vəzifəsində çalışıb və məhz o, şirkətin imicinə yeni nəfəs gətirib. Onun hazırladığı Volvo S60 modeli və XC60 konsepti markanın dizayn üslubunun inkişafının əsas xəttini müəyyənləşdirib. Kim bilir, AvtoVAZ onu öz sıralarına cəlb etməsəydi, bu dizaynerin rəhbərliyi altında İsveç şirkəti dizayn sahəsində nə kimi yeniliklərə imza atardı.

Stiv Mattinin Rusiyada çalışdığı birinci il ərzində hamını bu sual düşündürürdü ki, Rusiyanın dizayn studiyası "ulduz" rəhbərin başçılığı altında nəsə maraqlı bir şey ortaya çıxara bilərmi? Nəhayət, 2012-ci ildə Moskva avtosalonunda gələcək Niva-nın konsepti nümayiş etdirildi. Daha dəqiq desək, bu, AvtoVAZ-ın konveyerində köhnə Niva-nı əvəz edəcək yeni krossover idi. Rusiya avtomobil dizaynının meyarlarına görə bu konsept valehedici dizayna malik idi. Baxmayaraq ki, bu eksperimental nümunə hələlik kütləvi istehsala buraxılmaqdan çox uzaqdır, avtomobil həvəskarları ümid edirlər ki, seriya ilə buraxılacaq model dizaynına görə konseptdən heç də geri qalmayacaq. Hər halda uğurlu futurist dizayn elementlərini istehsalatda tətbiq etməkdə Stiv Mattinin kifayət qədər təcrübəsi var.

Yan Kallum

Yan Kallum Jaguar-da 1975-ci ildən çalışır, amma onun istedadı əsasən yeni əsrdə, daha dəqiq desək, bu İngiltərə şirkətinin dizayn üzrə direktoru (şef-dizayneri) vəzifəsinə təyin olunmasından sonra özünü büruzə verdi. Əsrlərin qovşağında Jaguar avtomobillərinin dizayn üslubunda durğunluq müşahidə olunurdu: ənənəvi retro üslubunun təkrarlanmasından savayı, elə bir yenilik nəzərə çarpmırdı. Məhz Yan Kallum bu vəziyyətdən çıxış yolu tapdı.

Yeni üslub illərin zəhməti nəticəsində ərsəyə gəlmişdi. Şirkətin şef-dizaynerinin təşəbbüsü ilə Jaguar modellərinin əvvəlki retro obrazından imtina edildi. İndi Britaniya markasının bütün modelləri müasir imici ilə seçilir. Lakin eyni zamanda, yeni modellərin dizaynından köhnə Jaguar-ların rəvan xətləri saxlanılıb ki, bunun da sayəsində Jaguar modellərini asanlıqla tanımaq olur. Yeni dizaynın ilk daşıyıcısı 2008-ci ildə işıq üzü görmüş Jaguar XF biznes-klass sedanı oldu. Jaguar-lar ildən-ilə daha maraqlı dizaynları ilə seçilirlər.

2010-cu ildə möhtəşəm Jaguar XJ avtomobil həvəskarlarında güclü təəssürat yaratdı. Bu gün o, öz sinfində ən qeyri-adi sedanlardan biridir. 2012-ci ildə Paris avtosalonunda ən parlaq premyeralardan biri Jaguar F-Type rodsterinin premyerası oldu. Belə təəssürat yaranır ki, bütün bunlar Jaguar-ın yeni obrazına doğru atılan addımlarıdır və biz hələ daha maraqlı yeniliklərin şahidi olacağıq.

 

Mark Adams

Son illər Opel markası çoxlu problemlərlə üzləşmişdi, hətta şirkəti müflisləşmə təhlükəsi gözləyirdi. Lakin kompaniya dizayn sahəsində irəliyə doğru böyük sıçrayış etdi. Vikipediya onlayn ensiklopediyasına nəzər salsaq, görərik ki, son dövrlərə aid olan bu və ya digər Opel modelinin dizaynının müəllifi müxtəlif insanlardır. Ola bilsin ki, bu, Opel-in dizayn üzrə hazırkı vitse-prezidenti Mark Adamsın təvazökarlığının nəticəsidir, axı onun komandasında yüzlərlə işçi çalışır. Hər halda alman markasının son illərdə hazırlanan ən yaxşı modelləri məhz onun rəhbərliyi altında hazırlanıb.

2008-ci ildə yeni Insignia-nın işıq üzü görməsi Opel-də yeniliklərdən xəbər verən ilk siqnal idi. Bir il sonra Astra-nın yeni nəsli çoxlu sayda müsbət rəylər qazandı. 2010-cu ildə onun bazasında üçqaplı Astra GTC modeli hazırlandıqda jurnalistlər onu yetərincə təriflədilər. Onu açıq-aydın "seksual" model adlandırdılar, bu isə, sözün açığı, Opel üçün heç də adi kompliment deyil. Belə görünür ki, Mark Adams uğurlarını ildən-ilə möhkəmləndirmək əzmindədir.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.