Motosiklet mövsümünə “Start!”

Просмотров: 3609
Motosiklet mövsümünə “Start!”

Yay mövsümü bir çox əyləncələri və idman növlərini özü ilə birgə gətirir. Həm əyləncə, həm idman növü, həm də artıq həyat tərzinə çevrilmiş motosiklet də bunlardan biridir. Baykerlərin və motosiklet həvəskarlarının ötən yaydan gözlədiyi moto mövsüm may ayının 22-də Novxanı Aquaparkda keçirilən tədbirlə açıq elan olundu.

100-dən artıq motosiklet və bir neçə idman avtomobili Bakı-Sumqayıt yolunu fəth edərək ilin ilk möhtəşəm yürüşünü keçirdilər. Təbii ki, yürüş bu qədər motosikleti bir arada görənlərin diqqət və təəccübünə səbəb olmuşdu. Qeyd edək ki, bu yürüşdə əsasən Moto Baku, Motosaurs, BandaBaza motosiklet klublarının üzvləri və digər sərbəst motosikletçilər iştirak ediblər.

Motosikletçilərin son dayanacağı Novxanı Aquapark oldu. Burada artıq onları tədbirin digər qonaqları gözləyirdi. Mövsümün açılışını qeyd etmək üçün Suzukinin baş sponsorluğu və Motul və Jaguarın sponsorluğu ilə möhtəşəm tədbir keçirildi.

Mövsüm açıq elan olundu. Bu zaman motosikletçilərə mövsüm boyu uğurlar arzuladılar və ehtiyatlı olmalarını xatırlatdılar. Həmçinin motosiklet qəzasında həlak olan yoldaşlarının da xatirəsi bir dəqiqəlik sükutla yad edildi. Bundan sonra “Milan” rok qrupu tədbir ərzində qonaqları öz ifaları ilə əyləndirdi. Bəzi motosikletçilər isə qonaqlar üçün öz məharətlərini də göstərdilər.

Tədbir göstərdi ki, motosikletlərə olan maraq ildən ilə artmaqdadır. Belə ki, hazırda müxtəlif klublarda və onlardan kənar Azərbaycanda 1000-dən artıq motosikletçi var. Gənclərin bu idman növünə marağı artmaqdadır. Onlar öyrənməyə və əylənməyə həvəslidirlər.

Lakin motosikletçilərin özləri də məsləhət görür ki, bunu kor-koranə öyrənmək olmaz. Professionallardan dərs almaq və bütün təhlükəsizlik qaydalarına riayət etmək lazımdır. Əgər bu iş ciddiyə alınsa, birçox nümunələrdən görünür ki, motosiklet insanın həyat tərzinə çevrilə bilər, zövqünə, geyiminə, seçimlərinə təsir edə bilər.























Hazırladı: İlahə Əkbər
Foto: Səxavət Əhmədov

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.