Moto mövsümə start verildi

Просмотров: 3015
Moto mövsümə start verildi

Artıq  havalar qızdıqca, tətil ayları gəldikcə şəhərin də görünüşü dəyişir, hərəkətlilik artır, bir sözlə, həyat qaynayır. Şəhər həyatının isti havalar üçün uyğun olan vərdişləri insanların məişət həyatından tutmuş ictimai həyatına kimi dəyişir. Nəqliyyat vasitəsi olan motosikletlər də yay fəsli, isti havalar üçün yararlıdır. Ölkəmizdə bu nəqliyyat vasitəsi geniş yayılmasa da, son zamanlar bu yöndə irəliləyişlər var. Buna misal olaraq, artıq paytaxt Bakıda yaranan motosikletçilərin mövsümü açmaq ənənəsini göstərmək olar.

Mayın 30-da Bakıda “İTC” Biznes Mərkəzində motosikletçilər bir araya toplaşaraq mövsümün açılışını etdilər. Mərkəzə toplaşan insanların çoxluğundan, tədbirin təşkilindən açılışın önəmli olduğu görünürdü. Səhnədə rok qrupunun ifa etdiyi musiqilər bir yandan, motosikletçilərin canfəşanlığı, moto nömrələr göstərmələri  də bir yandan tədbirə rəng qatırdı. İlk baxışdan adi tədbirlərdən hərəkətliliyi ilə seçilirdi. Bu da təbiidir...

Təşkilatçıların dediyinə görə, motosikletçilər üçün bu açılış bütün dünyada keçirilir. Bu zaman motosikletçilər öz motosikletlərini təmir edirlər, sazlayırlar, hər hansı yürüşə, müsabiqəyə hazır olurlar. Havaların istiləşməsi ilə əlaqəli olduğu üçün bu tip tədbirlər bu aylarda daha tez-tez keçirilir. Motosiklet də bu səbəbdən isti havaların nəqliyyat vasitəsi hesab olunur.
Rok qrupunun ifa etdiyi musiqilər öz yerində. Motosikletçilər olan yerdə rokun olması çox təbiidir. Hər kəs öz havasında idi. Bir yanda musiqiyə qulaq asan, musiqi sədasına oynayan, deyib-gülən, bir yanda da kənarda düzülmüş motosikletlərlə maraqlananlar, şəkil çəkdirənlər, nömrə göstərənlər...

Havaların qızması ilə açılan mövsüm soyuq havalar gələnə qədər davam edir. “Moto Bakı” motosikletçilər klubunun 2006-cı ildən keçirdiyi bu tədbir ildən-ilə genişlənməkdə, iştirakçılarının sayı artmaqdadır. Klubun üzvləri arasında bank işçiləri, biznesmenlər, müxtəlif şirkət və qurumlarda rəhbər vəzifələrində çalışan və fərqli peşə sahibləri də var.

Tıxacların qənimi motosiklet niyə Bakıda zəif  “gedir”?

Ümumiyyətlə, Azərbaycanda bu nəqliyyat növünün yayılması, inkişafı həm sərfəlidir, həm də Bakının küçələri üçün tam uyğundur. Bildiyimiz kimi, son bir neçə ildə paytaxt yollarında tıxac problemi yaranır. Bu cür şəraitlərdə motosiklet nəqliyyat vasitəsi kimi əvəzsizdir. Bir çox xarici ölkələrdə yollarda tıxac probleminin həlli yollarından biri də nəqliyyat vasitəsi kimi motosiklet və velosipedlərdən istifadə olunmasıdır. Ancaq bunların əksinə olaraq, ölkəmizdə motosikletin nəqliyyat vasitəsi olmaqdan da başqa problemləri var. Moto idman demək olar ki, yox səviyyəsindədir. Həvəskarların hesabına motosikletçilər dəstəsi qalmaqdadır. Təşkilatçıların qeyd etdiyi kimi, bu sahədə yeni öyrənənlərin olmaması ilə yanaşı, buna şərait də yoxdur. İndiki halda Bakıdakı motosikletçilərin mövcud olması, sadəcə, bu sahəyə güclü marağı olan insanların fəaliyyətidir. 

“Moto Bakı” motosikletçilər klubunun keçirdiyi bu tədbiri iştirakçıların özü təşkil etmişdi. 80-dən çox motosikletçinin iştirak etdiyi açılışa xüsusi köməyi dəyənlər də var. Təşkilatçılar mövsümün açılışında köməyi olan hər kəsə, xüsusilə “İTC” Biznes Mərkəzinin rəhbərliyi, Improtex Marine & Sport Facilities şirkətinin təmsilçiləri və tədbir iştirakçılarına öz təşəkkürünü bildirir. Qeyd edək ki, mövsümün bağlanmağı oktyabr-noyabr aylarına təsadüf edir. Bu aylarda da havalar tədricən soyumağa başlayır.

Əhməd Muxtar
Fotolar müəllifindir

















© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.