Məyus oldum...

Просмотров: 1726
Məyus oldum...

Neftçilər prospekti ilə yavaş sürətlə irəliləyirəm. İstilər düşüb, görünür Şıxov çimərliyinə üz tutanların sayı çoxalıb. Yolda avtomobillərin çoxluğu tıxac effekti yaradır, amma az da olsa hərəkət var. Bu gərginlik Azneft dairəsinə qədərdir. Daha sonra sürət artacaq.

Bu qədər avtomobil karvanının içində ağ rəngli möhtəşəm bir “dəmir at” irəliləyir. Tam qarşımda gedən bu maşını çox dəqiqliklə izləyirəm. Yeri gəlmişkən ətrafdakı avtomobillərdə olan sürücü və sərnişinlər də gözlərini bu maşından çəkə bilmirlər.

Avtomobilin marka və modelini qeyd etməyəcəyəm, çünki bunun məsələyə heç bir aidiyyəti yoxdur. Bir qədər də irəliləyirik. Təxminən Qız qalasının yaxınlığında həmin avtomobilin sürücü və sərnişin tərəfdən yan pəncərələri açıldı və hər iki tərəfdən yola boş butulka atıldı... Sanki, sözləşmişlər kimi içdikləri içkinin qabını eyni anda gözəl Bakımızın təmiz yollarına atdılar.

Bu “gözəl Bakımızın təmiz yolları” bir qədər şərti xarakter daşıyır. Çünki bəzi yollarımız gün ərzində 3 dəfə təmizləndiyi halda bəziləri illərlə təmizlənmir. Amma hər halda qarşımda gedən avtomobil sahibinin və onun sərnişinin etdiyinə söz tapa bilmirəm.

Bir dəqiqə əvvəl avtomobil seçiminə görə hörmətlə yanaşdığım tanımadığım bir insan elədiyi bir hərəkətlə mənim, eləcə də ətrafdakıların nifrət obyektinə çevrildi. Əslində həmin sürücü və sərnişinə deyəcək bir cümləm var idi... Amma onun deyəcəklərimi başa düşməyəcəyini təxmin edərək fikirlərimi özümdə saxladım. Maraqlıdır, Siz mənim yerimdə olsaydınız nə deyərdiniz...

Vasif Xəliloğlu,
Baş redaktor


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.
 

Şərhlərin sayı: 0

AVATAR
Hələ heç kim şərh verməyib. Birinci siz olun.