Mercedes Ener-G-Force Concept: gələcək Gelandewagen-in prototipi

Просмотров: 2082
Mercedes Ener-G-Force Concept: gələcək Gelandewagen-in prototipi
  • Mercedes Ener-G-Force Concept: gələcək Gelandewagen-in prototipi
  • Mercedes Ener-G-Force Concept: gələcək Gelandewagen-in prototipi
  • Mercedes Ener-G-Force Concept: gələcək Gelandewagen-in prototipi
  • Mercedes Ener-G-Force Concept: gələcək Gelandewagen-in prototipi
  • Mercedes Ener-G-Force Concept: gələcək Gelandewagen-in prototipi

Avtomobil dünyasını unikal üslubu ilə pərəstişkarlarının və sahiblərinin sevimlisinə çevrilmiş Mercedes Gelandewagen ofrouderi olmadan təsəvvür etmək çətindir. G-Class avtomobilinin restaylinqindən söz düşəndə çoxları həyəcan və narahatlıqla restaylinqin nəticəsini gözləyirlər. Xoşbəxtlikdən hələlik istehsalçı restaylinq əməliyyatı zamanı yalnız texniki dəyişikliklərlə və komfortun artırılması ilə kifayətlənir və avtomobilin xarici görünüşünə toxunmur. Lakin zaman keçdikcə Mercedes-Benz belə bir sualla qarşılaşmalı olur: "G-Class təxminən 2025-ci ildə istehsal olunacaqmı?"

Los-Ancelesdəki Design Challenge 2012 dizayn müsabiqəsi üçün alman konserni tarixi 1979-cu ilə gedib çıxan məşhur ofrouderin gələcək versiyasının layihəsini hazırlayıb. Mercedes Ener-G-Force konsepti Highway Patrol Vehicle 2025 polis avtomobilinin timsalında nümayiş etdirilib. Onun ardınca Almaniyanın nəhəng avtomobil istehsalçısının mütəxəssisləri G-Class 2025 mülki versiyasını hazırlamağı planlaşdırırlar. Baxmayaraq ki, müsabiqədə nümayiş etdirilmiş Mercedes-Benz Ener-G-Force konsepti yalnız avtomobilin masştablı maketidir və onun dizaynı, xarakteristikaları elmi fantastikaya bənzəyir, bu konseptin real avtomobilə çevrilməsi tamamilə mümkündür. Əlbəttə, bu, bir müddət sonranın işidir.  

Gələcəyin polis avtomobilinə hansı tələblər irəli sürülür? Mercedes-Benz təmsilçiləri ümumi mənzərəni belə təsvir edirlər: "Gələcəkdə polislər daha güclü nəqliyyat axını və avtomobillərlə dolu küçələr, xeyli dərəcədə əhali artımı, yetərincə aktiv olan və hətta qoca yaşlarında özlərini gənc hiss edən dəyişkən insanlarla üzləşəcəklər". Konsern təmsilçilərinin rəyinə görə, polislərin nəqliyyat vasitəsi şirkətin təqdim etdiyi Mercedes-Benz Ener-G-Force konsepti kimi etibarlı və sürətli olmalı, yol şəraitinin yaxşı və ya pis olmasından asılı olmayaraq, təyinat yerinə çatmağa qadir olmalıdır.

Burada Gelandewagen modelinin yolsuzluq şəraitində hərəkət imkanlarına işarə açıq-aydın hiss olunur. Gələcəyin avtomobili həmçinin ekoloji cəhətdən təmiz olmalı və alternativ yanacaqla işləməlidir. Polis ofrouderi polis əməkdaşlarının təhlükəsizliyini təmin etməlidir. Məhz  bu səbəbdən Highway Patrol Vehicle 2025 versiyasının timsalında təqdim edilmiş Mercedes-Benz Ener-G-Force konseptində kuzovun şüşəli hissəsinin sahəsi böyük deyil. Avtomobilin xüsusi siqnalları dama quraşdırılıb, 20 düymlük iri təkərlər isə çətin yerlərdə əla keçid qabiliyyətini təmin edir.

Gələcəyin Ener-G-Force ofrouderində indiki Mercedes-Benz G-Class avtomobilinin cizgiləri sezilir. O, əvvəlkitək güclü və əzəmətlidir. Sadəcə olaraq, dizaynı bir qədər futurist üslublu, şüşələrinin kənar xətləri isə daha sadə görünüşlüdür. Konseptdə ehtiyat təkərin əvəzinə, zəruri alətlər üçün kiçik bölmə nəzərdə tutulub. Baqaj bölməsinin qapısını açmadan onları rahatca götürmək mümkündür.

Mercedes Ener-G-Force konseptinin damında su üçün rezervuarlar yerləşir, oradan su hidrokonverterə ötürülür, sonuncu isə onu yanacaq elementləri üçün hidrogenə çevirir. Alınan enerjinin hesabına təkərlərdə yerləşən dörd elektrik mühərriki işləyir. Xüsusi topoqrafik Terra-Scan skaneri Mercedes-Benz Ener-G-Force konseptinin ətrafını (tam 360 dərəcə bucaq altında) izləyir, habelə asqının tənziminə və mühərriklərin dartı qüvvəsinə nəzarət edir.

Ener-G-Force konseptinin yan "ətəklərində" enerji toplayıcıları yerləşir. Gələcək Mercedes-Benz avtomobilinə ön tərəfdən baxdıqda isə işıq-diod faralarının "G" hərfi formasında düzəldildiyini görmək olar. Bu konsepti əfsanəvi Gelandewagen-ə bənzədən daha bir cəhət cinahların yuxarı hissəsində yerləşən dönmə işıqlarıdır.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.