Mercedes-BENZ W126

Просмотров: 7501
Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126
  • Mercedes-BENZ W126

1979-cu ildə fəaliyyətə başlamış Frankfurt avtosalonunda düz 25 il bundan əvvəl Mercedes-Benz tərəfindən S-Class kateqoriyalı W126 avtomobili təqdim edildi. Bu günkü günədək bu model  kompaniya tərəfindən isthsal olunmuş ən gözəl sedan hesab olunur. Bu modelin 15 il əvvəl konveyerdən çıxarılmasına baxmayaraq, hələ də onu almaq istəyənlər tapılır. Özü də onlar işlənmiş deyil, təzə avtomobil almaq istəyirlər. Bu avtomobilin qiymətinin konsernin istehsal etdiyi bir çox müasir modellərindən baha olması onları qorxutmur.

Əsl estetikadan başı çıxan diplomatlar və ərəb şeyxləri bu avtomobilin kuzovunun dizaynını yüksək intellektual səviyyə və «yüksək üslub» etalonu hesab edirlər. Bu dizayn italyan Bruno Sakkoya məxsusdur. Bu avtomobil onun ən yaxşı işi sayılır. Təsadüfi deyil ki, bu avtomobilin dizaynının motivlərindən yaponlar uzun illər ərzində özlərinin “Lexus” sedanlarında istifadə etmişlər.

İncə zövqlə hazırlanmış bu avtomobilin kuzo-vunun altında isə alman texnikası yerləşdirilmişdir, özü də Ştutqartdan olan mühəndislər detalların və aqreqatların yığılmasına maksimalist mövqedən yanaşmışlar. Avtomobilin asqısı o qədər «davamlı» düzəldilmişdir ki, hətta indi, bir çox illər keçdikdən sonra da W126 sedanlarının çoxunda heç kim asqının təmirinə ehtiyac duymamışdır! (Qeyd: asqı təkərləri kuzovla birləşdirən detallardan ibarətdir. O, yoldakı əyriliklərin təsirini azaldaraq, kuzovun və təkərlərin silkələnməsini zəiflədir).

Bu avtomobildə heç bir alümin detal işlənməmiş, yalnız poladdan və səskeçirməyən əl qalınlığında bloklardan istifadə olunmuşdu.  Arxa asqının rıçaqları isə daha çox kiçik yük avtomobilindən götürülmüş detallara bənzəyir.

Bu avtomobildə sına biləcək heç nə yoxdur, kuzovun elementləri sındırılmasa, nəyinsə «sınması» praktiki cəhətdən qeyri-realdır. Kuzov isə, necə deyərlər, yüksək səviyyədədir: bortların, xüsusilə onların dib hissəsinin və üzərinə ağırlıq düşən elementlərinin polad təbəqəsi öz qalınlığı ilə adamı heyran edir (o vaxtlar bu, əsl alman poladı idi!). Kifayət qədər sadə konstruksiyasına baxmayaraq, bu avtomobil yolla çox rəvan hərəkət edir və bu baxımdan kuzovun altında çoxlu mürəkkəb detalların yerləşdirildiyi müasir limuzinlərdən heç də geri qalmır.

W126 1979-cu ilin sentyabrından 1985-ci ilin sentyabrınadək 2,8 litr (156 at gücünə malik karbüratorlu R6 mühərriki, habelə 185 at gücünə malik injektorlu R6 mühərriki), 3,8 litr (218 at gücünə malik V8 mühərriki) və 5 litr (240 at gücünə malik V8 mühərriki) tutumlu benzin mühərrikləri ilə buraxılırdı. Bu avtomobildə daha bir güc aqreqatı da vardı, o vaxtlar Mercedes ilk dəfə S-class avtomobilinə dizel mühərriki quraşdırmışdı ki, həmin mühərrik 3 litr həcmə və 121 at gücünə malik idi. İlk vaxtlarda ən adi benzin mühərriki (zavod indeksi M110) istər mexaniki, istərsə də avtomatik ötürücü qutuya malik ola bilərdi. Sonrakılar isə yalnız avtomatik ötürücü qutuya malik idi. R6 mühərriki özünəməxsus konstruksiyası ilə fərqlənirdi: onun iki paylayıcı valı vardı, lakin onların hər biri yalnız altı klapanı idarə edirdi (biri giriş klapanlarını, digəri isə çıxış klapanlarını). Kifayət qədər yaxşı güc xarakteristikaları olan bu mühərrik iri ölçüləri ilə və yanacağı çox sərf etməsi ilə fərqlənirdi. Bununla belə, o qədər də uğurlu olmayan iri ölçülü güc aqreqatları ilə müqayisədə o, daha yaxşı variant idi.

İki ildən sonra, 1981-ci ilin sentyabr ayında, yenə də Frankfurt şəhərində W126 sedanının aqreqatları əsasında quraşdırılmış kupe debüt etdi. Orada iki variant nümayiş etdirildi: 380SEC və 500SEC. Yenə də sentyabr ayında, bu dəfə 1985-ci ildə hər iki avtomobilin restaylinq variantı publikaya təqdim edildi [Qeyd: “restaylinq” və ya “feyslif”t dedikdə avtomobilın xarici görünüşünün üslubunda dəyişikliklərin edilməsi nəzərdə tutulur]. Xarici görünüşündəki dəyişikliklərdən (nahamar, kənarları haşiyəli dar şüşələr və yeni bamperlər) başqa avtomobilin daxilinə də ciddi surətdə «əl gəzdirilmişdi».

Seriya ilə buraxılan avtomobilin baza komplektasiyasına ABS dünyada ilk dəfə olaraq, daxil edildi. Bundan əlavə, insanlar iqlim şəraitinə nəzarətin (klimat control) nə olduğunu ilk dəfə Mercedes W126 modelində gördülər.

M110 indeksli köhnə R6 mühərriklərini M103 indeksli yeniləri əvəz etdi, onlar daha yığcam və yüngül idilər, özü də iki variantda quraşdırılırdılar: 2,6 litr tutumlu (166 at gücü ilə) və 3 litr tutumlu (188 at gücü ilə). Onlar istər avtomatik ötürücü qutu ilə, istərsə də 5-pilləli mexaniki ötürücü qutu ilə təchiz edilirdilər. V8 mühərrikləri də modernləşdirildi, onlardan ən irisinin – 5,6 litr həcmə malik olanının gücü isə bəzi modifikasiylarda 300 at gücünə çatdı. Dizel mühərrikləri «cəbhəsində» də dəyişikliklər baş verdi, 3 litr tutumlu yeni OM603 mühərriki artıq 150 at gücünə malik oldu. Arxa tərəfin asqısı silkələnmə əleyhinə pnevmatik sistemli amortizatorlarla, eləcə də klirensin daim sabit saxlanmasına imkan verən sistemlə təchiz edildi.

1990-cı ildə «karyerasının» sonlarında avtomobil daha bir mühərrik – 3,5 litr tutumlu dizel mühərriki qazandı. 1991-92-ci illərdə buraxılmış W126 sedanının ən son seriyalarının ayrı- ayrı nüsxələri öz sələfinin – Azərbaycanda «Mersedes 600» adlandırılan W140 modelinin interyerinin bəzi elementlərini mənimsəmişlər. Belə «hibridlər» bir neçə il istehsal olundu, sonra isə onların istehsalı dayandırıldı.

İstehsal dayandırılsa da, “sıfırdan” W126 avtomobilini almaq istəyində olanlar hələ də var. İstehsaldan çoxdan çıxarılmış olan bu avtomobilin hazırkı sifarişçiləri qeyri-adiliyi sevən ərəblər və diplomatik missiyalardır. Məlumdur ki, Bakının yollarında ən azı bir ədəd belə avtomobil hərəkət edir və onun yaşı isə beş ildən çox deyil. Son illərində buraxılmış bütün yeni W126 avtomobilləri tyuninq atelyelərinin mütəxəssislərinin işidir. W126 modeli üçün istənilən «orijinal» detal Almaniyadan problemsiz sifariş edilə bilər. Bəzi məlumatlara görə ildə 20-yə yaxın «yığılma» sedan satılır. «Retro-mersedeslər» məhz bu cür peyda olur. Amma eksklüziv sifariş edilən belə avtomobillər konsernin bir çox aparıcı müasir modellərindən bahadır.

W126 avtomobilləri əsasında çoxlu sayda maraqlı avtomobillər hazırlanmışdır. Bir çox firmalar onların bazasında limuzinlər istehsal etmişlər (Bakıda da belə nüsxələr var). Kupe kuzovlu variantlarından isə bəzi firmalar gözəl kabrioletlər istehsal etmişlər. Bu avtomobilin universal kuzovlu versiyaları da məlumdur ki, bir qayda olaraq, bunlar dəfn mərasimlərində işlədilir. Yaşıl boya ilə rənglənmiş belə avtomobillərdən biri bu yaxınlarda bir alman saytında satışa çıxarılmışdı.

Lakin bu avtomoilin tyuninqi istiqamətində çoxsaylı cəhdlərin əksəriyyəti uğursuz olmuşdur, onun xarici görünüşü o qədər mükəmməldir ki, eksteryerə əlavə olunan kənar elementlər, bir qayda olaraq, orada «yabançı ünsürlər» kimi görünür. [Qeyd: tyuninq dedikdə sifarişçilərin istəklərini nəzərə alaraq avtomobilin quruluşuna sonradan dəyişikliklər edilməsi nəzərdə tutulur].

Bakıda W126 modelinə kifayət qədər tez-tez rast gəlmək olar. Heyranedici rəqabət qabiliyyətinə baxmayaraq, W126 modeli tədricən «ömrünü başa vurur». Bu avtomobilin yaxşı vəziyyətdə olan nüsxəsini münasib qiymətə tapmaq çox çətin məsələdir. Sadəcə belə nüsxələr bir qayda olaraq, satılmır. 90-cı illərin sedanı üçün ən yaxşı halda (satıcının sözlərinə görə) 11-15 min dollar istəyirlər. Kupe isə ondan da baha –  12-20 min dollara başa gələcəkdir. İlk baxışdan bu qiymətlə alıcı tapmaq mümkünsüz görünür.

Lakin bu, heç də belə deyil. Bir qayda olaraq, belə avtomobilə sahib olmaq istəyən şəxs tez bir zamanda tapılır. Yeni W126-nın bir vaxtlar 100 min markaya (təxminən 50 min dollar) olduğunu və 15-20 ildən sonra avtomobilin qiymətinin iki dəfə ucuzlaşdığını nəzərə alsaq, bunun özü də bir rekorddur. Belə qiymətlərə yalnız yüksək kateqoriyalı avtomobillərdə, məsələn, Rolls-Royce-larda təsadüf etmək olar, onlar «yaşa dolsa da» qiymətləri praktiki olaraq, ucuzlaşmır.

© 2007 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Məqalələr

Şərhlərin sayı: 0

AVATAR
Hələ heç kim şərh verməyib. Birinci siz olun.