Kvadrosikl - səhrada, Antarktidada, hətta Ayda...

Просмотров: 3343
Kvadrosikl - səhrada, Antarktidada, hətta Ayda...

İnsanlar həyatlarını asanlaşdırmağa çalışırlar. Bunun üçün hər sahədə mürəkkəbdən sadəyə doğru istiqamət başlayıb. Elə müasir nəqliyyat vasitələrinin hazırlanmasında da ən sadə texnologiyalara üstünlük verilir. Belə vasitələrdən biri də kvadrosikllərdir.

Bu All Terrain Vehicle adlandırılan nəqliyyat vasitəsinin 4 təkərli növüdür və onu bütün yollarda idarə etmək olur. 

Kvadrosikl hətta uşağın da idarə edə biləcəyi dördtəkərli “motosiklet”dir. Kvadrosikl idarə etmək su skuterini idarə etməyə bənzəyir. Hər şey çox sadədir. Sizi balans saxlamaq əziyyətindən azad edən dörd çarx, yorulmamağınız üçün oturacaq və motosikletin, yaxud velosipedin idarə edilməsinə bənzəyən sadə sistem.

İlk olaraq yeni tanışımızı ənənəvi nəqliyyat vasitələri ilə müqayisə edək. Motosiklet nəqliyyatın ekstremal növüdür və bu riski hər kəs sevmir. Minik avtomobillərini  idarə etmək bəzən əlçatmaz olur, bəzən istedad tələb edir. Velosiped isə maraqlı və yüngüldür, lakin tənbəllər üçün deyil.

Kvadrosikl isə sürətlidir, manevr etməyə imkan verir və idarə etməsi yüngüldür. Onunla hətta uşaq da başa çıxa bilər. Elə bizim üçün də kvadrosiklləri dostlarımız Rəşad, Mamed, Elnur və Elgün test etdilər. Onlar tapşırılan işin öhdəsindən asanlıqla gəldilər.

Çox rahat  olan bu nəqliyyat vasitəsində uzun müddət və yorulmadan səyahət etmək olar.

İdarəetmə zamanı isə sürücü özünü motosikletdəki kimi hiss edir. Açıq hava ilə təmas, külək, sürət, yolun səs - küyü və adrenalin. Kvadrosikllər hər yerdə - səhrada, Antarktidada, hətta Ayda da sizi yarı yolda qoymaz.

Lakin hələ də bir çoxları üçün bu nəqliyyat vasitəsi istirahətin və asudə vaxtın maraqlı keçirilməsi funksiyasını yerinə yetirir. Əsasən də təbiətin keçilməsi çətin, əlçatmaz yerlərinə səyahət zamanı, ov zamanı, yaxud sadəcə gəzintiyə çıxmaq üçün kvadrosikl əvəzedilməz köməkçidir.

Bu nəqliyyat vasitəsinin fəth etdiyi yollar bəzən nəinki avtomobil, hətta motosiklet üçün də keçilməz qalır.


 



İlahə Əkbər

Foto: Toğrul Məmmədov



© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir. 


Şərhlərin sayı: 0

AVATAR
Hələ heç kim şərh verməyib. Birinci siz olun.