Küçələrimizi tanıyaq

Просмотров: 3380
Küçələrimizi tanıyaq

Neçə illərdir ki, küçələrimizə yeni adlar verilib, amma hələ də çoxumuz əksər küçələri sovet dövründəki, hətta rus imperatoru II Nikolayın dövründəki adları ilə tanıyırıq. Küçənin yeni adını bilməməklə yanaşı, həmin küçəyə verilən adın kim olduğunu da, təəssüflər olsun ki, heç də yaxşı bilmirik.

Beləliklə, “Küçələrimizi tanıyaq” rubrikasında daha bir neçə küçənin adının sahibini yaxından tanıyacağıq. 

Vəli Məmmədov küçəsi

Əvvəllər “Buxara”, “Gertsen” kimi tanınan küçənin indiki adı Vəli Məmmədov küçəsidir. Vəli Məmmədovu tanıyanlar, əlbəttə ki, yox deyil. Amma onun haqqında məlumatı olmayanlar və hansı xidmətlərinə görə həmin küçəyə məhz onun adının verildiyini bilməyənlər də var.
Vəli Məmmədov ədəbiyyatşünas və publisist olub. 1989-cu ildə SSRİ-nin Xalq deputatı seçilib. Yardımlıda boya-başa çatan V.Məmmədov daha sonra Azərbaycan Dövlət Universitetində (indiki BDU-da) filoloji istiqamətdə təhsil alıb. “Azərbaycan ədəbiyyatı tarixi”nin yazılmasında əvəzsiz xidməti olub. Müxtəlif partiya vəzifələrində çalışmış, eyni zamanda, ədəbi fəaliyyətlə də aktiv şəkildə məşğul olmuşdur. O, N.Nərimanovun ilk tədqiqatçısı və təbliğatçısı olub. Bir publisist olaraq, mətbuatda ictimai problemlərlə bağlı xeyli sayda məqalələrlə çıxış edib.

Görkəmli şəxsiyyət Vəli Məmmədov erməni terrorunun qurbanı olub. Belə ki, 1991-ci ilin noyabrın 20-də baş vermiş Qarakənd faciəsində dünyasını dəyişən çox dəyərli şəxsiyyətlərdən biri də Vəli Məmmədov idi.

Sübhi Salayev küçəsi

Şəhər sakinləri Sübhi Salayev küçəsini daha çox 4-cü paralel kimi tanıyırlar. Görkəmli alim, pedaqoq Sübhi Salayevi daha yaxından tanıyaq.

Geologiya elminin neft-qaz sahəsinin inkişafına öz töhfələrini vermiş akademik Sübhi Salayev 63 illik ömrünün düz 40 ilini elmə həsr edib. Elmin inkişafında və elmi nailiyyətlərin xalq təsərrüfatında tətbiqində əldə etdiyi uğurlara görə S.Salayev "Xalqlar dostluğu", "Şərəf nişanı" ordenləri və bir sıra medallarla, iki dəfə Azərbaycan Ali Soveti Rəyasət Heyətinin Fəxri Fərmanı ilə təltif olunub.

Bəsti Bağırova küçəsi

Küçələrimizin bir qismi də müxtəlif sahələrdə rolu olmuş, uğur qazanmış qadınların adını daşıyır. Lap elə bizim Bəsti Bağırova küçəsi kimi...
Bəsti Bağırova küçəsi xatirələrdə 7-ci paralel küçəsi kimi xatırlanır. Sovet insanına adı və işi yaxşı tanış olan Bəsti Bağırovanı gənc nəslə də tanıdaq.

Bəsti Bağırova Azərbaycanın məşhur pambıqçısı olub. İki əl ilə pambıq yığımı hərəkatının ilk təşəbbüsçüsü olub və ilk dəfə Sosialist Əməyi Qəhrəmanı adına layiq görülüb. SSRİ Ali Sovetinin (I-III çağırış), Azərbaycan SSR Ali Sovetinin (IV–V çağırış) deputatı, Azərbaycan SSR Ali Soveti Rəyasət Heyətinin üzvü seçilib.
Doğulduğu yerdə - Goranboyun Bağçakürd kəndində tuncdan büstü qoyulub, Fəxri Xiyabanda dəfn olunub. 

Küçələrimiz və şəxsiyyətlərimizi tanıyaq və tanıdaq!

Aygün Əliyeva

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.