Kobud və güclü. Dodge Charger adlı amerikan əfsanəsi

Просмотров: 2890
Kobud və güclü. Dodge Charger adlı amerikan əfsanəsi

Biz mütəmadi olaraq Azərbaycanda fəaliyyət göstərən dilerlərdən avtomobillər götürüb sınaqdan çıxarırıq. Bununla yeni modellərlə alıcıları daha yaxından tanış etmiş oluruq. Avtomobil həvəskarları qəzetimizdə dərc olunan “təqdimat” yazılarını, eləcə də “test-drive” məqalələrini böyük həvəslə oxuyurlar. Bu bir reallıqdır ki, Azərbaycanda avtodrom yoxdur. Yəni avtomobilləri peşəkar səviyyədə test etmək üçün məkan mövcud deyil. Ən kiçik detallardan biri, avtomobilin 0 km/saat sürətindən 100 km/saat sürətini yığmasını yoxlamaq üçün düz, təhlükəsiz və möhkəm örtüklü yol yoxdur. Əslində, şəhər yolları və bölgələrə gedən magistral yollar, demək olar ki, xeyli dərəcədə düzəlib və hazırda əsaslı təmir işləri davam etdirilir. Amma bu yollarda avtomobili yüksək sürətlə idarə etmək həm qaydalara ziddir, həm də böyük təhlükə mənbəyidir. Bu səbəbdən biz test etdiyimiz avtomobilləri paytaxt Bakıda aşağı sürətlə, magistrallarda isə 90 km/saat sürəti ilə idarə edirik.

Bu sayımızda çox maraqlı bir avtomobili sınaqdan çıxaracağıq. Bu gün Azərbaycanda 25-ə yaxın rəsmi avtomobil dileri fəaliyyət göstərir. Biz onların çoxu ilə əməkdaşlıq edirik. Amma elə markalar var ki, onlar rəsmi olaraq təmsil olunmurlar. Belə olan təqdirdə “boz diler”lər öz bacarıqlarını nümayiş etdirirlər. Bu sahədə onlara təşəkkür etmək lazımdır. Misal üçün, onlar olmasaydı, Hummer markalı avtomobillərin sayı paytaxtda indi gördüyümüz qədər olmazdı...
Bəli, amerikanlar həmişə iri və güclü avtomobillərə üstünlük veriblər. Bu tendensiya ötən əsrin 60 - 70-ci illərində ən pik həddinə çatıb. Həmin dövrdə amerikanlar mühərrikin həcmində, dövrələnmə anında, həmçinin gücündə xəsislik etməyiblər. Zamanın sınağından keçmiş və nüfuz qazanmış modellərdən biri də Dodge Charger olub. Bu model dövrünün muskl-karı olub. Amma onun dördüncü nəsli sələflərinin bütün ideyalarını alt-üst edib. Hazırda istehsalda olan Dodge Charger avtomobilin beşinci nəslidir. Maraqlıdır ki, buna qədər bütün modellər ikiqapılı olduğu halda, yeni Charger 4 qapılıdır. Buna baxmayaraq, o, güclü və kobud anlayışlarını qoruyub saxlayıb. Artıq neçə vaxt idi ki, onunla daha yaxından tanış olmaq istəyirdim. Avtomobilin ilkin görünüşü, sözün əsl mənasında, onun gücündən xəbər verir. Onun iri və kobud xətləri dinamikanın təcəssümüdür. Fərqli faralar, fərqli radiator barmaqlığı və tam fərqli dizayn. Bu yeniliklər Dodge Chargerin yeni simasını formalaşdırır. Modelin arxa hissəsi xüsusi diqqət çəkmir. Amma arxa təkərlərin üst hissəsinin dizaynı Charger modellərinin ənənəsini yaşadır.

Chrysler 300C platformasında yığılıb.

Qapını açıb salona əyləşəndə Amerikan üslubu və keyfiyyəti dərhal hiss olunur. İlk diqqətçəkən məqam sükan oldu. Çünki, avtomobilin sükanı çox böyükdür. Amma siz avtomobilin önünə baxanda və ölçüləri hiss edəndə, sükanın modelin ümumi ölçülərinə uyğun olduğunu görürsünüz. Yeri gəlmişkən, sükan çox “kasıbdır”. Digər Avropa modellərində alışdığımız multi funksiyaların heç biri bu sükanda yoxdur. Sükanın tam arxasında cihazlar paneli sport avtomobillərini xatırladır. Əlbəttə, onun gücü bu cihazları şərtləndirir (bu barədə bir az sonra). Salon yüksəkkeyfiyyətli dəri ilə işlənib. Bütün detallarda bu keyfiyyəti duymaq olar. Kriuz kontrol və klimat kontol sizin əlinizin altındadır, çox axtarışa ehtiyac yoxdur. Arxa oturacaqda əyləşənlər isə Bluetooth sistemli qulaqcıqlardan istifadə edib monitorda DVD izləyə bilərlər. Mühərriki işə salarkən səs bir o qədər də hiss olunmur. Amma sizə lazım olduğu təqdirdə sürət yığarkən aqreqat əsl idman avtomobilinin səsini verir. Test etdiyimiz Dodge Charger 3,5 litr həcmli V6 benzin mühərriklə və 5 pilləli avtomatik transmissiya ilə təchiz olunub. Aqreqat  253 at gücü istehsal edir.

Digər modifikasiyalarda 5,7 litr həcmli V8 mühərriki 344 at gücü, 6,1 litr həcmli V8 mühərriki isə 432 at gücü istehsal edir. Bu göstəricilər kifayət qədər yaxşı rəqəmlərdir. Baxmayaraq ki, avtomobil ağırdır (1735 kq), amma yerindən çox cəld və yumşaq tərpənir. Avtomobilin ümumi ölçüləri və mükəmməl asqı sistemi dönmələr zamanı yana əyilməni xeyli azaldır. Həm ön, həm də arxa əyləclər disklidir. Siz yüksək sürət altında belə avtomobili çox rahatlıqla anı olaraq dayandıra bilərsiniz. Bütün bunlar idarəolunmanı mükəmməlləşdirir. Bu avtomobillə çox rahatlıqla uzun məsafələri də qət etmək olar. Bilirəm, bir çoxlarınız fikirləşirsiniz ki, avtomobilin ehtiyat hissələrini tapmaq çətin olacaq. Bəli, sizinlə razıyam. Amma “gözəllik fədakarlıq tələb edir!” Əgər siz də belə gözəl (kobud) və güclü bir avtomobil idarə etmək istəyirsinizsə, bu çətinliklərə dözməli olacaqsınız. Bir məqam da var ki, yüksək texnologiyanın inkişaf etdiyi bir dövrdə istənilən ehtiyat hissəsini tapmaq su içmək kimi asandır. Kiçik araşdırmadan sonra məlum oldu ki, Bakıda artıq bir neçə ehtiyat hissələrinin satışı ilə məşğul olan mağaza var ki, orada Dodge markalı avtomobillər üçün çox hissələri tapmaq olar. İstənilən hissəni isə sifariş etmək mümkündür. Belə olan təqdirdə, heç çəkinmədən Dodge Charger modelini almaq barədə düşünə bilərsiniz. Yuxarıda qeyd etdiyim kimi, bu markanı ölkəmizdə rəsmi olaraq təmsil edən yoxdur. Amma siz bizim sayt vasitəsilə fərdi şəxslərdən və “boz diler”lərdən bu avtomobildən tapa bilərsiniz.

Vasif Xəliloğlu

© 2008 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.