Kia Sorento: parıltı, şarm və dinamizm

Просмотров: 5051
Kia Sorento: parıltı, şarm və dinamizm

Sanki içərisinə hava üfürülmüş kimi şişman, iri qabaritləri olan Kia Sorento-nun böyük ölçülərinə baxmayaraq, çəkisi təxminən D sinfinə mənsub olan sedanın çəkisi qədərdir: 1,5 tondan azacıq artıqdır. Ramadan imtina edilməsi bu krossoverin çəkisinin iki sentnerini itirməsi ilə nəticələnib. Bu cür ciddi “pəhriz” avtomobilin “dəlisov” həyatını kökündən dəyişib.

Sorento, sanki, daha da canlanıb, indiyədək onda sezilməyən yeni parıltı, şarm, dinamizm əldə edib. Sələfinin bir qədər kiçildilmiş, adi görünüşlü “fasadından” sonra bu yeni avtomobil müasir dövrün meyllərini özündə əks etdirir: gəncliyə xas olan aqressiv üslub dizaynın hər elementində hiss olunur.

Kia-nın yeni marketinq siyasəti hazırlandıqdan sonra başqa cür ola da bilməzdi: bu markanın digər modelləri kimi bu yeni krossover də insanda emosiyaları coşdurur, daha gənc və proqressiv auditoriyanın diqqətini cəlb edir və Kia modellərinə aid olduğunu öz görkəmi ilə əyani şəkildə nümayiş etdirir.

Amma zahiri görünüş ən əsası deyil. İndi Sorento ilə bir qədər fərqli davranmaq lazım gələcək. İndi bu avtomobil daha keçilməz palçığın içərisinə girmək niyyətində deyil. Konstruktorlar modelin konsepsiyasını dəyişərək onun ofrouder keçmişinin üzərindən birdəfəlik xətt çəkiblər.

Ramanı unudun, indi avtomobilin “daşıyıcı” kuzovu var. Demultiplikatoru da yaddan çıxarın. İndi qazonların səliqə ilə qırxıldığı və yollara asfalt döşəndiyi bir dövrdə aşağı sürətə keçidin necə işə düşməsi kimi maraqlandırır?

Bu, yalnız yol şəraitinin pis olmasından əziyyət çəkən kiçik bir qrup üçün maraqlı ola bilər.

Daimi tam ötürücünü də unudun. Avtomobil əsasən ön ötürücülüdür, yəni onun aparıcı təkərləri qabaq təkərlərdir, yalnız bəzi hallarda çoxdiskli mufta vasitəsilə arxa təkərlər aparıcı rolu öz üzərilərinə götürür (əgər elektronika buna icazə verərsə).

Zərurət olduqda məcburi bloklanmanı işə salmaq olar, o, 40 km/saatadək sürət zamanı işləyir və fırlanma anını ön və arxa oxlar arasında 50:50 nisbətində paylayır.

Həmçinin siz yoxuşa qalxmaq üçün və enişdə əyləclərin idarə olunması üçün yardım sistemlərini də işə sala bilərsiniz. Bir sözlə, Sorento indi daha çox “şəhər” yönümlü avtomobildir.

Yol örtüyü olmayan yerlərdə özünü inamlı hiss etməyən Sorento II meqapolis yollarında özünü əla aparır. Dönmə radiusu böyük deyil.

Qabaritlər isə əksinə, şəhər yolları üçün çox da kiçik deyil. Amma sürücünün yolda baş verənləri görmə imkanları əladır. Hərəkətin rəvanlığı da yüksək səviyyədədir:

əvvəlki modeldən qalmış iki köndələn rıçaqlar üzərindəki qabaq asqı öz yerini daha yüngül və kompakt McPherson asqısının dayaqlarına verib, arxa asqı isə tamamilə yeni, müstəqil çoxrıçaqlı asqı ilə əvəzlənib.

Çala-çuxur yerləri rahatca dəf edən avtomobil yoldakı hər cür nahamarlıqları inamla arxada qoyur.

Bu isə, təbii ki, sürücünün emosional durumunu xeyli yaxşılaşdırır. 

Adekvat sükan idarəetməsi başlanğıc nöqtədən son nöqtəyədək 3,02 dövrə tələb edir. Sorento-nun sükanı yaxşı informativliyi və asan anlaşılan əks-əlaqə ilə seçilir.
 
2,4 litr həcmə və 174 at gücünə malik yenilənmiş benzin mühərriki 6 pilləli avtomat transmissiya ilə tandemdə avtomobilin dayandığı yerdən qısa müddətdə sürət yığmasını təmin edir.

İstehsalçının verdiyi məlumata görə, avtomobil start götürərkən 100 km/saat sürət yığmağa 11,6 saniyə tələb olunur. Avtomat bir sürətdən başqasına keçidi cəld həyata keçirir və bu zaman yubanmalar baş vermir.

Amma mühərrikin gücü, məsələn, 60 km/saat sürətlə hərəkət zamanı akseleratoru tam sıxarkən yüksək sürət yığmaq üçün “sıçrayış” etməyə imkan vermir.

Yeni krossover Hyundai ix55 ilə eyni platformada yığılıb. Sələfi ilə müqayisədə Sorento-nun uzunluğu 95 mm artıb, hündürlüyü 15 mm azalıb, təkər bazasının ölçüsü isə 10 mm azalaraq 2700 mm-ə enib.

Salonda sərbəst məkan artırılıb: nə öndə, nə də arxada yer çatışmazlığında şikayətlənək üçün əsas yoxdur. Həmçinin oturacaqların üçüncü cərgəsi də peyda olub ki, bu da salonun tutumunu yeddi nəfərədək artırmağa imkan yaradıb.

Amma bunun mənfi tərəfi də var, belə ki, oturacaqların sayı artırıldıqda baqaj yerinin kifayət qədər böyük həcmi dörd dəfə azalmış olur (1047 litrdən 258 litrə enir).


Sorento-nun interyeri təkcə keyfiyyətli materialları ilə deyil, həm də yaxşı təchizatı ilə göz oxşayır. Mühərriki işə salan düymə, kruiz-kontrol, ikizonalı klimat-kontrol, çoxfunksiyalı sükan, arxa tərəfi göstərən kamera (salonun güzgüsündə 3,5 düymlük ekranla), hərəkət kursunun stabilliyinə nəzarət edən elektron sistem – bütün bunlar rahat və faydalı funksiyaların heç də tam siyahısı deyil.

Amma təəssüf ki, faydalı funksiyaların çoxu yalnız bahalı versiyalarda nəzərdə tutulur.
 
Yeni Sorento-da aktiv və passiv təhlükəsizliyə görə cavabdeh olan yetərincə müasir sistemlərə və avadanlıqlara rast gəlmək olar: məsələn, ABS sistemi, əyləc gücünün bölüşdürülməsi sistemi EBD, əyləcləmə zamanı yardım sistemi HAC, enişdə əyləcləmə zamanı dinamikaya nəzarət edən DBC sistemi və s.

Kuzovda əhəmiyyətli təkmilləşdirmələr sayəsində yeni krossover passiv təhlükəsizlik sahəsində öz sələfinə nisbətən xeyli üstünlüklərə malikdir, həmin üstünlüklər zərbələrə qarşı yüksək müqavimət qabiliyyətini təmin edir.

Konstruksiyada daha möhkəm poladdan istifadə edilməsi sayəsində Sorento toqquşmalar zamanı özünü daha yaxşı tərəfdən göstərə bilir.

Avtomobil hazırlanarkən kuzovun mərkəzi dayağına xüsusi diqqət yetirilib, onun içərisində qoruyucu polad qövs yerləşdirilib.

Sərnişinlərin təhlükəsizliyinin əlavə müdafiəsi yan panellərin hesabına təmin edilir, onlar qəza zamanı sümük zədələri almaq ehtimalını minimuma endirməyə imkan verir.

Sorento-nun baza komplektasiyasına frontal təhlükəsizlik yastıqları daxildir, opsiya qismində avtomobil yan təhlükəsizlik yastıqları və pərdələri ilə təchiz olunur.

Hər iki ön oturacaq aktiv baş altlıqları ilə təchiz oluna bilər, onların sayəsində arxadan zərbə zamanı boyun zədəsi alma ehtimalı azalmış olur.

Qiymətləndirmə:

Baqaj yerinin həcmi 258 litrdən (7 yerlik variant) 2052 litrədək dəyişir (“Həcm yaxşıdır”).

Sorento tam “krossover” olmasa da, hər halda avtomobildə ofrouder keyfiyyətləri var (“Ofrouder keyfiyyətləri pis deyil”).

Mərkəzi konsolun funksionallığı sayəsində klavişlərin təyinatını müəyyən etmək üçün baş sındırmaq lazım gəlmir (“Klavişlər başa düşüləndir”).

İdarəetmə
 
Avtomobil yolda öz adekvat davranışı ilə adamı sevindirir, amma dinamika tam yüksək səviyyədə deyil.

Salon

Hətta oturacaqlardakı ən kənar yerlərdə də sıxlıqdan və ya narahatlıqdan şikayət etmək üçün əsas yoxdur. Amma bu sözlər orta və alçaq boylu sərnişinlərə aiddir.

Komfort 

Yetərincə yumşaq olan asqı nahamar, çala-çuxurlu yerlərdə adamı yormur. Salonda faydalı funksiyaların bolluğu sevindirici haldır.

Təhlükəsizlik 

Avtomobildə təhlükəsizliyi təmin edən sistemlər çoxdur, amma bizim bazarda onların heç də hamısı avtomobilin baza komplektasiyasına daxil edilməyəcək.

Müsbət və mənfi cəhətlər 

+ Geniş salon, maraqlı xarici görünüş, düşünülmüş interyer, sükanla idarəetmənin rahat olması. 
– Dinamikanın tam yüksək səviyyədə olmaması.

Bizim rəyimiz


Modelin təyinatındakı bu radikal dönüş əvvəllər münasib qiyməti və yüksək keçid qabiliyyəti sayəsində Sorento ofrouderinə ehtiramla yanaşan avtomobil həvəskarlarını Sorento-dan uzaqlaşdıra bilər. Amma belələrinin sayı getdikcə azalır.

Bu gün daha utilitar modellər dəbdədir. Digər tərəfdən, avtomobilin keyfiyyəti və müasir xarici görünüşü yeni alıcıları cəlb etmək baxımından onun qarşısında yeni üfüqlər açılır.

Gəncliyə xas olan aqressiv üslub dizaynın hər elementində hiss olunur.




© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.





Şərhlərin sayı: 0

AVATAR
Hələ heç kim şərh verməyib. Birinci siz olun.