Kia Rio

Просмотров: 8228
Kia Rio
  • Kia Rio
  • Kia Rio
  • Kia Rio
  • Kia Rio
  • Kia Rio
  • Kia Rio

Özünü ən yaxşı tərəfdən göstərə bilmiş kompakt-klass avtomobili Kia Rio 2005-ci ildən dünya arenasına çıxdığına görə artıq onun yenilənməsinə ehtiyac yaranmışdı. İstehsalçı, sadəcə səthi dəyişikliklərlə, avtomobilin feysliftinqi ilə kifayətlənməyərək, onu əhəmiyyətli dərəcədə modernləşdirdi və Kia Rio-nun dördüncü nəslini ictimaiyyətə təqdim etdi.

İndi Kia Rio avtomobili alıcılara üç kuzov variantında təqdim olunacaq: üçqapılı hetçbek (yeni versiya), beşqapılı hetçbek və dördqapılı klassik sedan.

Avtomobilin proporsiyaları və qabaritləri əhəmiyyətli dəyişikliklərə məruz qalıb. 2011-ci ilin ikinci yarısında buraxılması gözlənilən yeni Kia Rio modeli Hyundai i20 ilə eyni platformada hazırlanıb və ondan 55 mm uzun və 25 mm enlidir. Onun hündürlüyü isə Hyundai i20-dən azdır, bu azaltmanın məqsədi daha yaxşı aerodinamikaya və daha aqressiv dizayna nail olmaqdır. Yeri gəlmişkən, Kia Rio-nun tamamilə yenilənmiş xarici görünüşü və interyeri P. Şrayerin başçılıq etdiyi Avropa dizayn studiyasının işidir. Təbii ki, dizayn studiyası öz işində konsernin müasir modellərinin vahid üslubunu nəzərə alıb. Belə ki, yastı yan səthlər, sadə formalar və dairəvi işıq texnikası artıq keçmişdə qalıb.

İri havaçəkənlərin dəqiq sərhədləri və kuzovun rəngində rənglənmiş moldinqlərlə birlikdə yan tərəflərin dinamik görünüşü avtomobilin alçaq profilini xüsusi vurğulayır. Radiator barmaqlığı, iri ön bamper və kənarları qara haşiyələrlə əhatələnən mürəkkəb həndəsi formalı əsas faralar yeni nəsil Kia avtomobillərini səciyyələndirən firma cizgisinə çevrilib.

Daha böyük və daha komfortlu

Avtomobilin qabaritlərinin böyüməsi salonun komfortunu da artırıb. Belə ki, təkər bazası 7 santimetr artıb, nəticədə salonda sərnişinlər üçün məkan genişlənib. Baqaj bölməsinin həcmi də artıb (hetçbek versiyasında 292 litrədək, sedan versiyasında 390 litrədək). Bundan başqa, koreyalılar vəd edirlər ki, komplektasiyasına və istifadə edilmiş materialların keyfiyyətinə görə Kia Rio avtomobili Venga Sportage modellərindən heç də geri qalmayacaq.

 Ekoloji cəhətdən ən təmiz “qeyri-elektrik” avtomobil

Avtomobilin texniki xarakteristikalarına gəldikdə, satış bazarından asılı olaraq, yeni Kia Rio üçün altı güc aqreqatı nəzərdə tutulub. Avropaya ixrac ediləcək avtomobillər üçün baza mühərriki 1,1 litr həcmə və 70 at gücünə malik turbodizel mühərriki olacaq. Yanacağa yüksək qənaətcilliyi (100 km məsafəyə 3,2 litr) və atmosferə atılan karbon qazının miqdarının azlığı (hər kilometrə 85 qram) sayəsində bu mühərrik Kia Rio avtomobilinə ekoloji cəhətdən ən təmiz “qeyri-elektrik” avtomobili titulunu qazandırıb. 2012-ci ildə avtomobilə həmçinin birbaşa yanacaqçiləmə texnologiyası ilə təchiz olunmuş 1,2 litr həcmli turbodizel mühərrikinin quraşdırılması nəzərdə tutulur. Şimali Amerika bazarı üçün isə 1,6 litr həcmə və 140 at gücünə malik benzin mühərriki quraşdırılmış versiya təklif olunacaq.

Şirkət Avropada yeni Kia Rio-nun satışlarına 2011-ci ilin payızında başlamağı planlaşdırır. Öncə satışda beşqapılı hetçbek peyda olacaq, 2011-ci ilin sonunda isə üçqapılı hetçbek satışa çıxarılacaq. Sedan kuzovlu Kia Rio-nun satışlarına isə 2012-ci ildən başlamaq planlaşdırılır.

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.  

Şərhlərin sayı: 0

AVATAR
Hələ heç kim şərh verməyib. Birinci siz olun.