Kia Quoris: daha bir rəqib

Просмотров: 3533
Kia Quoris: daha bir rəqib
  • Kia Quoris: daha bir rəqib
  • Kia Quoris: daha bir rəqib
  • Kia Quoris: daha bir rəqib
  • Kia Quoris: daha bir rəqib
  • Kia Quoris: daha bir rəqib
  • Kia Quoris: daha bir rəqib

Ən yüksək avtomobil seqmenti bir çox istehsalçılar üçün əlçatmaz olaraq qalmaqdadır.
Bu seqmentdə Mercedes-Benz, BMW, Jaguar, Bentley kimi brendlər hökmranlıq edirlər. 90-cı illərdə gərgin və inadlı səylər hesabına Audi bu elitaya qoşulmağa nail oldu. Bu, ilk növbədə, birinci nəsil A8 modelinin sayəsində baş tutdu. Onun sələfi V8 isə qüdrətli brendlərlə rəqabətə hazır deyildi. Bu yazının qəhrəmanı olduqca iddialı avtomobildir. Kia təmsilçiləri yeni Quoris modelinin sedan kuzovlu ən yaxşı avtomobillərin rəqibi olduğunu açıq şəkildə elan etməsələr də, anlamaq çətin deyil ki, bu avtomobilin buraxılışı Kia-nın elitar avtomobillər dünyasına yolunu açmaq cəhdidir. Gəlin koreyalıların buna nə dərəcədə nail olduqlarına nəzər salaq.

Eksteryer
Sedanın eksteryerini elə ilk baxışdan ifadəli və cazibədar adlandırmaq olar ki, bu da təsadüfi deyil. Axı Kia-nın baş dizayneri bir başqası yox, məhz Peter Şrayerdir. Bu həmin şəxsdir ki, Audi TT və ikinci nəsil A6 modellərinin dizaynını hazırlayıb, habelə Quattro Spyder kimi şedevrin yaradılmasında iştirak edib. Quoris-in "burun" hissəsi ənənəvi üslubda hazırlanıb və  eleqant görünüşə malikdir, radiator barmaqlığı qeyri-adi adaptiv elementləri ilə seçilən "böcək" formalı baş optikaya çox gözəl uyğunlaşdırılıb. Bamper sadə görünüşlüdür və onda lazım olandan artıq heç nə yoxdur. Bununla belə, o, yuxarıda qeyd edilən elementlərlə uğurlu bur vəhdət təşkil edir. Avtomobilin profili iti sürətdən xəbər verir. Belə ki, o, yüksək sinfə mənsub olan Avropa modellərinin ən yaxşı cəhətlərini özündə cəmləşdirib. Damın dayaqlarındakı mailliklər "kupe" formasını xatırladır, uzun kapot və qısa maili baqaj bölməsi isə avtomobilin obrazını tamamlayaraq onu daha dolğun və yaraşıqlı göstərir. Arxa tərəfin görünüşü də xoşagələndir, burada eyni vaxtda həm Avropa, həm də Şərqi Asiya texnikası hiss olunur. Arxa optikanın işıqları xromlanmış moldinq formasında olan özünəməxsus körpü vasitəsilə bir-biri ilə birləşdirilib. İrad tutula bilən yeganə cəhət bamperin böyüklüyündən ibarətdir. Bütövlükdə Quoris-in dizaynını on ballıq qiymətləndirmə sistemində "doqquz" balla qiymətləndirmək olar. Onun qabarit ölçüləri isə belədir: uzunluğu – 509 sm, eni – 190 sm, hündürlüyü – 149 sm, təkər bazası – 304,9 sm.

İnteryer
Kia Quoris-in interyeri də xarici görünüşü kimi çox uğurlu alınıb. Ön panel monumental və müasirdir. Cihazlar paneli tam rəqəmsal texnologiyalıdır. Displeydə əks olunan göstəricilər rahat oxunur, kifayət qədər orijinal günlük də interyerdə uğurlu elementdir. Mərkəzi konsol böyüklüyü ilə seçilir – yuxarıda multimedia sisteminin iri ekranı, aşağıda isə xeyli sayda idarəetmə klavişləri var, həmçinin mərkəzdə yerləşən analoq saatını da qeyd etmək lazımdır. Multimedia sisteminin idarəetmə bloku rəqib şirkətlərin modelləri ilə eyni prinsip əsasında hazırlanıb. Burada məlumatların ön şüşədə əks etdirilməsini xüsusi qeyd etmək olar. Materiallar "premium-klass" keyfiyyətinə malikdir, xüsusən salonda ağ və qara rənglərin kombinasiyasından ibarət üzlük variantı çox gözəl görünür. Arxa cərgədə kifayət qədər yer var. Əlavə ödəniş müqabilində oturacaqlar üçün olduqca maraqlı opsiya – ayrıca kürək hissələri və yastıqlar təklif olunur. Arxada sağ tərəfdə oturan sərnişinin rahatlığı üçün ön kreslonu qatlamaq və ayaq altlığını irəliyə doğru çəkmək olar. Qabaq oturacaqlara displeylərin quraşdırılması və dirsək altlığında multimedianı idarə etmək üçün pultun olması da salondakıların rahatlığı üçün nəzərdə tutulub. Baqaj bölməsinin həcmi 455 litrə çatır. Doğrudur, bu, o qədər də iri həcm deyil, amma bu məsələ çox da əhəmiyyət kəsb etmir.

Qalan detallar
Kia Quoris üçün bir güc qurğusu nəzərdə tutulub (hər halda ilkin dövr üçün). V6 atmosfer mühərriki bir qədər arxaik çoxnöqtəli yanacaqçiləmə sisteminə malikdir, amma əvəzində dəyişkən uzunluqlu giriş kollektoru, qazbölüşdürmə fazalarının dəyişdirilməsi sistemi və alüminiumdan hazırlanmış silindrlər bloku ilə öyünə bilər. Mühərrikin maksimal potensialı 290 at gücünə çatır, fırlanma momenti isə 358 Nm təşkil edir (1 dəqiqədə 4500 fırlanma dövrəsi ilə). Dayanmış Quoris kifayət qədər tez bir zamanda hərəkətə gəlir. Onun 1930 kiloqramlıq kütləsinin ağırlığını səkkiz pilləli avtomat sürət qutusu əla kompensasiya edir. V6 aqreqatının fırlanma sürəti artarkən heç bir səs eşidilmir, çünki avtomobilin səs izolyasiyası olduqca yüksək səviyyədədir. İstehsalçının məlumatlarına əsasən, Quoris-in 100 km/saat sürət yığmasına 7,3 saniyə tələb olunur, sürətin maksimal həddi isə 240 km/saatdır.

Avtomobilin hərəkətinin  rəvanlığına heç bir irad yoxdur. O, yol örtüyündəki nahamar yerləri rahatca dəf edir. Buna ön və arxa tərəfdəki pnevmatik asqılar sayəsində nail olunur. Burada adət etdiyimiz amortizatorlar yoxdur, onların əvəzinə adaptiv dempferlər nəzərdə tutulub. Bundan başqa, dörd tənzimləmə rejimi var ki, sükan idarəetməsinin, sürət qutusunun və asqının işinə öz təsirini göstərir. Həmin rejimlər bunlardır: qarlı yolda hərəkət rejimi, qənaətcil rejim, adi rejim və idman rejimi. "Qənaətcil" rejimdə mühərrik o qədər də yüksək sürətlə fırlanmır, şassi ləng hərəkət tərzinə uyğunlaşır və benzinin sərfiyyatı minimal həddə olur. "İdman" rejimində motor daha sürətlə fırlanır, qaz pedalının hərəkətləri kəskinləşir, asqı isə sərtləşir. Amma bütün bunlar Kia-nı sportkara çevirmir. Belə ki, yüksək sürətlə hərəkət zamanı yanlara meyllənmələr azalsa da, bu azalma sportkarlara xas olan həddə çatmır.

ESP sisteminin işi bir qədər ləng olsa da (xüsusən kəskin dəyişikliklər zamanı), əvəzində təhlükəsizlik yüksək səviyyədədir. Təhlükəsizlik məqsədinə xidmət edən digər sistemlər arasında görünməyən zonalara nəzarət sistemini, adaptiv optikanı, adaptiv kruiz-kontrolu, qəzaya hazırlıq sistemini və avtomobili müasir səviyyəli edən bir çox digər detalları qeyd etmək olar. Bir sözlə, yekunda belə nəticəyə gəlmək olar ki, Quoris elitar modellərə olduqca yaxınlaşan avtomobildir.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.