Kia Quoris

Просмотров: 5393
Kia Quoris
  • Kia Quoris
  • Kia Quoris
  • Kia Quoris
  • Kia Quoris
  • Kia Quoris

Kia marketinq addımı atmağı qərara aldı və K9 flaqman modelini Avropa bazarında təqdim etmək niyyətini elan etdi. Amma Avropa və Amerika sedanlarının bu koreyalı rəqibi Avropada başqa adla – Quoris adı ilə satılacaq. Hətta iyun ayında Azərbaycanın istirahət zonalarından biri olan Nabranda keçirilən Caspian Motor Show 2012 çərçivəsində Kia Motors Azərbaycan şirkəti Koreya flaqmanını yerli avtomobil həvəskarlarına təqdim etdi. Kia-nın yeni avtomobili onun tərəfdaşı olan Hyundai kompaniyasının buraxdığı Equus modelinin əkizi olacaq.

Alman sedanlarının rəqibinin Avropaya gətirilməsi ideyası üzərində koreyalılar çoxdan düşünürdülər. Hyundai Kia Automotive Group bu ideyanı yalnız 2010-cu ildə gerçəkləşdirə bildi, həmin il Hyundai Equus Köhnə Qitəni fəth etməyə qalxdı. İki il sonra Kia Quoris də onun açdığı cığırla getdi.

Yeri gəlmişkən, “Quoris” adı iki ingilis sözünün birləşməsindən əmələ gəlib: “quality” (“keyfiyyət”) və “core” (“nüvə”, “özək”). “Bu avtomobil dəbdəbənin və yüksək texnologiyaların sintezidir. Bu avtomobildə bütün detallar bir-birini tamamlayır”, – deyə Kia-nın icraçı vitse-prezidenti Tomas O bildirir.

Əlbəttə, yeni avtomobilin dünyanı nə iləsə təəccübləndirdiyini demək olmaz. Rəqibləri kimi, o da elektronika ilə gen-bol təchiz olunub. Misal olaraq, adaptiv kruiz-kontrolu göstərmək olar, o, irəlidə gedən obyektlərin hərəkət sürətini və onlara qədər olan məsafəni izləyir və radardan daxil olan məlumatları emal edir. Radar 174 metrədək məsafədə yoldakı vəziyyəti daim izləyir.

Sürücü sükandakı müvafiq idarəetmə orqanlarının köməyi ilə lazımi hərəkət məsafəsini özü seçə bilər. Zərurət yarandıqda Quoris avtomatik rejimdə dayana bilər. Dayanma üç saniyədən artıq davam etmirsə, hərəkət avtomatik bərpa olunur və Quoris irəliyə doğru hərəkətini davam etdirir. Dayanma müddəti üç saniyədən artıq çəkirsə, sürücü hərəkəti davam etdirmək üçün qaz pedalını və ya mühərriki işə salan düyməni basmalıdır.

Kia sedanı həmçinin görünməyən zonalara nəzarət sistemi ilə də təchiz olunur. Bu sistem avtomatik olaraq aktivləşir və avtomobilin yanında başqa avtomobillərin olduğu barədə sürücünü məlumatlandırmağı bacarır. Dairəvi görmə sistemi də nəzərdə tutulub – bu zaman avtomobilin və onun ətrafında olan obyektlərin (360 dərəcə boyunca) real təsviri salondakı ekranda peyda olur.

Yeni avtomobilin Avropa versiyası iki mühərriklə təchiz olunacaq: 3,8 litr həcmə və 290 at gücünə malik V6 və 3,8 litr həcmə və 333 at gücünə malik turbinli motor.

Yeni avtomobil artıq bir neçə aydır ki, Cənubi Koreya ərazisində satılır. Daxili bazarda bu modelin qiyməti təxminən 45 min dollar təşkil edir. Yeri gəlmişkən, Hyundai Equus da Avropa və ABŞ dilerlərinin salonlarına daxil olana qədər yalnız öz vətənində satılırdı. Görünür, istehsalçı modeli dünya premyerasına tam hazırlamaq üçün müəyyən vaxt gözləməyi qərara alıb.

Bu avtomobillə daha yaxından tanış olmaq üçün Kia Motors Azərbaycan şirkətinin salonlarına baş çəkə bilərsiniz.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.