Kia Ceed SW 2013: Kia-dan yeni universal

Просмотров: 2205
Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal
  • Kia Ceed SW 2013: Kia-dan yeni universal

İritutumlu yaxşı universal əldə etmək istəyənlər nəzərlərini Kia Ceed Sportswagon 2013-ə yönəldə bilərlər. Avtomobilin ikinci nəsli dəyişikliklərə uğrayıb və onun istehlak keyfiyyətləri yaxşılaşdırılıb. Kia Ceed modelləri arasında universaldan başqa, beşqapılı hetçbek də var. Paris-2012 avtosalonundan sonra isə onlara xarizmatik üçqapılı Pro Ceed də əlavə olunub.

Yeni Kia Ceed SW avtomobilini müasir, texnoloji, praktik, qənaətcil və idmansayağı avtomobil kimi səciyyələndirmək olar. Təsadüfi deyil ki, istehsalçı modelin adına "Sports" sözünü əlavə edib. Koreyalılar bütün Ceed modelləri sırasını Avropa üçün ideal avtomobillər kimi təqdim edirlər. Sportswagon 2013 modeli Kia-nın Frankfurtdakı texniki mərkəzində hazırlanıb. Yeni universal Slovakiyanın Jilina şəhərində istehsal olunur.

Eksteryer
Kia Ceed Sportswagon sələfindən daha emosional görünüşə malikdir. Yeni Ceed-in uzunluğu 4,5 metrdən azacıq çoxdur (sələfinin uzunluğundan 15 mm çox). Avtomobilin təkər bazasının ölçüsü dəyişməz qalıb – 2650 mm, eni isə 10 mm qısaldılıb. Bundan başqa, hündürlüyü sələfinkindən 40 mm azdır, o cümlədən klirens 10 mm azaldılıb.
Yeni Kia Ceed Sportswagon-un hava axınına qarşı müqavimət əmsalı 0,30-dur. 17 düymlük təkərləri ilə birlikdə enli təkər tağları avtomobilin idmansayağı profilini vurğulayır. Dizaynerlər gizlətmirlər ki, universal tipli kuzova kupe cizgilərini əlavə etməyə çalışıblar. Kia Ceed Sportswagon-nun müəyyən qədər aqressiv görünüşlü ön hissəsində iti xətləri olan faralar diqqəti cəlb edir. Həmçinin xromlanmış haşiyələrlə əhatələnən radiator barmaqlığının maraqlı formasını da qeyd etmək lazımdır. Radiator barmaqlığı üzərində emblem bir qədər yuxarıda çəkilib.

İnteryer
Yeni Kia Ceed Sportswagon digər universallar kimi, yetərincə praktik avtomobildir. Salon sərnişinlərlə dolu olanda baqaj bölməsinin həcmi 528 litr, arxa oturacaqlar qatlandıqda isə 1642 litr təşkil edir. Baqaj bölməsində əşyaları qoymaq üçün torlar və dayaqlar var, iri qabaritli yükləri isə damda daşımaq olar. Belə ki, reylinqlər bütün modellərin standart komplektasiyasına daxildir. Koreya universalının yükgötürmə qabiliyyəti 500 kiloqramdır, mexaniki transmissiya quraşdırılan modifikasiyalar isə 1,5 tonluq qoşquları dartıb apara bilir. 

Kia Ceed Sportswagon 2013-ün interyeri həm sürücü, həm də sərnişinlər üçün komfortu təmin edir, xüsusən yan tərəflərdə yaxşı dayaqları olan oturacaqlar buna şərait yaradır. Funksionallıq və təchizatın zənginliyi seçilmiş komplektasiyadan çox asılıdır. Ən bahalı versiyada sürücü oturacağının elektrik tənzimi, dəri üzlük və iri sensor ekranlı audiosistem nəzərdə tutulub, daha sadə komplektasiyalarda isə kresloların üzlüyü parçadandır.

Mühərriklər
Koreya avtomobil istehsalçısı bildirir ki, Kia Ceed Sportswagon 2013-ün kapotunun altında Avropada və Avropa üçün hazırlanmış yeni dizel güc aqreqatları quraşdırılıb. 1,4 litr həcmli CRDi mühərrikinin gücü 89 at gücü, fırlanma momenti 220 Nm təşkil edir. Bu mühərrikdə kompressorun təzyiqinin dəyişdirilməsi texnologiyasından istifadə olunur. Bu motorla avtomobil 100 km/saat sürəti 13,4 saniyəyə yığır, maksimal sürət isə 170 km/saat təşkil edir. Orta yanacaq sərfiyyatı 100 km məsafəyə 3,5 litrdir.

1,6 litr həcmli ikinci mühərrik (U2) 128 at gücündədir. Onun 100 km/saat sürət yığmasına 10,8 saniyə tələb olunur. Bu mühərriklə Ceed SW-nin maksimal sürəti 193 km/saat təşkil edir. Bu göstəricilər 6 pilləli mexaniki transmissiya quraşdırılan versiyalara aiddir, avtomat transmissiya quraşdırılan versiyalarda isə 100 km/saat sürət yığmağa sərf olunan müddət 11,7 saniyə, maksimal sürət isə 185 km/saatdır. Qarışıq hərəkət rejimində 1,6 litr həcmli mühərrikin yanacaq sərfiyyatı 100 km məsafəyə 4,7 litrdir, bu göstəricidə "start-stop" idarəetmə sisteminin böyük rolu var.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.