“Juqili”lər yenidən dəbə minə bilərmi?

Просмотров: 3935
“Juqili”lər yenidən dəbə minə bilərmi?

Ekspert hesab edir ki, “AvtoVAZ” məhsullarını bütün parametrlərinə görə yeniləməlidir

Cəmi bir il əvvəl can vermək üzrə olan  Rusiyanın “AvtoVAZ” müəssisəsi indi yeni planlar üzərində işləyir. Bu plana əsasən, şirkət ötən əsrin 70-ci illərindən hamının yaxşı tanıdığı 07 və 05 modellərinin istehsalını artıracaq. Şirkət o qədər sifariş alıb ki, zavod həftənin şənbə günü də işləməyə başlayıb. Təkcə ötən ayla müqayisədə plan 12 faiz artıb.

Mütəxəssislər hesab edirlər ki,  “AvtoVAZ”ın məhsullarına, özü də qədim və ucuz modellərə tələbatın artması hökumətin köhnə avtomobillərin utilizasiyası proqramı ilə bağlıdır. Proqrama görə, köhnə avtomobil sahibləri avtomobillərini təhvil verib, əvəzində yeni “Juqili” alırlar. Artıq 41 min rusiyalı uzun illər işlətdiyi köhnə maşınlarından xilas olub. Bu isə o deməkdir ki, “AvtoVAZ”ın maşın növbəsində ən azı elə bu qədər müştərisi var.

Bundan əlavə, “köhnə maşını təhvil ver, yenisini al” kampaniyası təkcə “Juqili”yə aid deyil. Belə ki, köhnə avtomobilini təhvil verənlər Rusiya istehsalı olan Avropa maşınları da ala bilərlər. Amma hesablamalar göstərir ki, kampaniyada iştirak edənlərin 55-60 faizi yenə də “Juqili” almağa üstünlük verir. Ekspertlərin qənaətinə görə, 07 və 05 modellərini alanlar nisbətən kasıb əhalidir və onlar, sadəcə, köhnə “vedrə”lərini yenisi ilə əvəzləyirlər.

Ona görə də mütəxəssislər “AvtoVAZ”ın dirçəlmək əlamətlərinin müvəqqəti olduğunu düşünürlər. Əmlak Bazarı İştirakçıları İctimai Birliyinin icraçı direktoru Ramin Osmanov “Avtomobil.az”a deyib ki, “AvtoVAZ”ın bu nailiyyətləri müvəqqəti xarakter daşıyır. Onun sözlərinə görə, artıq bir neçə onilliklərdir ki, istehsal olunan “VAZ-2107” ilk gün necə istehsal olunubsa, indi də eyni cür yığılır. Yəni avtomobilin modifikasiyasında yaxşıya doğru heç bir dəyişiklik baş verməyib.

R.Osmanov deyir ki, bütün bunlara baxmayaraq, “VAZ-2107”nin alıcıları digər MDB ölkələrində olduğu kimi, Azərbaycanda da kifayət qədərdir: “Hesab edirəm ki, “AvtoVAZ” yeni planlarına avtomobilin modifikasiyasına dəyişiklik etmək, xarici görünüşünə əl gəzdirmək daxildirsə, bu, “VAZ-2107”nin bazarda bir az da yüksəlməsinə kömək edəcək. Baxmayaraq ki, iqtisadi böhran səbəbindən Azərbaycanda satışı azalan dilerlərdən biri də məhz “Xəzər-Lada” şirkətidir”.

Ekspert hesab edir ki, daha çox MDB ölkələrinin bazarı üçün nəzərdə tutulan “AvtoVAZ” məhsullarının yenilənməsinə ehtiyac var. Burada söhbət təkcə avtomobilin xarici görünüşündən getmir, eyni zamanda digər parametrlərin də yenilənməsi lazımdır. Nəzərə almaq lazımdır ki, bu günün avtomobil alıcısının zövqü 70-80-ci illərin zövqündən kəskin şəkildə fərqlənir.

Mais Şahmaroğlu


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.


Şərhlərin sayı: 0

AVATAR
Hələ heç kim şərh verməyib. Birinci siz olun.