Jaguar F-Type

Просмотров: 801
Jaguar F-Type
  • Jaguar F-Type
  • Jaguar F-Type
  • Jaguar F-Type
  • Jaguar F-Type
  • Jaguar F-Type
  • Jaguar F-Type

Şübhəsiz ki, Jaguar F-Type Paris avtosalonunun əsas "baxımlı" avtomobillərindən biri idi. Digər istehsalçılar kimi, bu Britaniya brendi də yeni avtomobil barədə bəzi təfsilatları  sərgidən öncə açıqlamağı qərara alaraq Parisdəki Roden Muzeyində (Musée Rodin) onun təqdimatını keçirib.

Mühərriki qabaq tərəfdə yerləşən arxa ötürücülü kabriolet bundan öncə 2011 IAA sərgisində CX-16 konsepti kimi təqdim olunmuşdu. Həmin konsept kupe versiyasında olsa da, yumşaq dam örtüklü F-Type kabrioleti CX-16 konseptinə çox oxşayır. 
Jaguar-dan bildirdilər ki, onların modelləri həmişə girintili-çıxıntılı, "əzələli" xətləri ilə seçilib və əlavə etdilər ki, F-Type modelində də eyni prinsiplərə riayət edilib.

"Dizayn avtomobilin tarixçəsindən xəbər verməlidir. Məhz buna görə F-Type modelinin hər bir xəttinin başlanğıc nöqtəsi, davamı və bitmə nöqtəsi var", – deyə brendin dizayn üzrə direktoru Yan Kallum bildirdi. – "Əgər hər bir xəttə fərdi qaydada baxsaq, onun zamanın sınağına davam gətirməyə qadir olan dəqiq və mütənasib cizgiləri əks etdirdiyini görə bilərik".

Yeni kabriolet mənəvi cəhətdən E-Type modelinin sələfi kimi təqdim edilsə də, onda retro üslubunun cizgiləri azdır. Baxmayaraq ki, Jaguar mütəxəssisləri iki modelin oxşar cəhətlərini birləşdirməkdən ötrü F-Type üçün qatlanan yumşaq dam örtüyü hazırlayıblar və kapotu eynilə qabarıq formada düzəldiblər. Hər  halda F-Type mövcud ənənədən kənara çıxır, belə ki, onun radiator barmaqlığı oval formasında deyil, düzbucaqlı formasındadır.

İnteryer barəsində də eyni sözləri demək olar. Jaguar mütəxəssisləri interyeri "1+1" formulu əsasında hazırlayıblar. Bu, sərnişinin oturacağının sürücünün oturacağından ayrılması demək deyil, sadəcə o deməkdir ki, salonun tərtibatının mərkəzində sürücü dayanır. Bunu mərkəzi konsolun və cihazlar panelinin tərtibatından asanlıqla görmək olar.
Avtomobilin çəkisini minimuma endirmək üçün şassi və kuzov alüminiumdan düzəldilib, amma əsas sahələrdə onların sərtliyi hər hansı digər Jaguar modeli ilə müqayisədə 30% artırılıb. Asqı alüminiumdan düzəldilmiş iki köndələn rıçaqları ilə seçilir.
İlk dövrdə yeni idman avtomobili üç modifikasiyada təklif olunacaq: F-Type, F-Type S F-Type V8 S.

Birinci iki versiya 3,0 həcmə və 340 at gücünə malik turbinli yeni V6 mühərriki ilə təchiz olunur (F-Type S versiyasında onun gücü 380 vahiddir). Birinci mühərrik 100 km/saat sürət yığmağa 5,3 saniyə, ikinci isə 4,9 saniyə sərf edir. F-Type versiyasının maksimal sürəti 260 km/saat, F-Type S versiyasınınkı isə 275 km/saatdır.

F-Type V8 S versiyası 5,0 həcmə və 495 at gücünə malik (fırlanma momenti 625 Nm) turbokompressorlu V8 mühərriki ilə təchiz olunur. Bu mühərriklə F-Type V8 S 100 km/saat sürəti 4,3 saniyəyə yığır. Onun maksimal sürəti elektronika vasitəsilə məhdudlaşdırılıb və 300 km/saat təşkil edir.

Bütün versiyalara səkkizpilləli " Quickshift" avtomat transmissiyası quraşdırılıb, V6 S modifikasiyası isə əlavə olaraq dinamik start funksiyası ilə təchiz olunub.
F-Type modelinin salonunda XF və XJ modellərinin "gizli" ventilyasiya dəlikləri saxlanıla bilər. Amma sürət pillələrini dəyişdirən dairəvi tutqac yenisi ilə əvəzlənib, şirkət onu coystiklə müqayisə edir.

Böyük Britaniyada yeni avtomobilin qiymətləri V6 versiyası üçün 58.500 funt sterlinqdən, V6 S versiyası üçün 67.500 funt sterlinqdən, V8 S versiyası üçün isə 79.950 funt sterlinqdən başlayacaq. Müştərilər ilk avtomobilləri təxminən 2013-cü ilin ortalarında əldə edə biləcəklər.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.