Infiniti FX

Просмотров: 6288
Infiniti FX
  • Infiniti FX
  • Infiniti FX
  • Infiniti FX
  • Infiniti FX
  • Infiniti FX
  • Infiniti FX
  • Infiniti FX
  • Infiniti FX
  • Infiniti FX

Bu avtomobillə Infiniti-nin rəsmi salonunun qarşısında rastlaşdım. Enli “qaşlar”, iri “burun” və atletik gövdə – bütün bu cizgilər aqressiv görünüşlü avtomobildə var idi. Amma, doğrusu, onun görünüşü heç də qorxunc deyildi. Onun sələfi ilə kifayət qədər çoxdan tanış idim, buna görə də onun bütün ədaları və ənənələri mənə yaxşı tanış idi. Üstəlik, yaponlar avtomobilin sələfinin bütün müsbət cəhətlərini saxlamağa cəhd etməklə yanaşı, həm də bu cəhətləri artırmağa çalışmışdılar.

Yeniliklər

Nissan təmsilçilərinin sözlərinə inansaq, yeni FX-i hazırlayarkən konstruktorların və mühəndislərin qarşısında duran əsas vəzifələrdən biri avtomobili daha da gözəlləşdirmək, müasir sistemlərin və texnologiyaların köməyi ilə avtomobil sahiblərinin işini yüngülləşdirmək idi.

Dizayna gəldikdə, indi FX daha aqressiv görünür. Doğrusu, krossoverin sələfindən daha gözəl olduğunu iddia edə bilmərəm, amma o, sələfinə nisbətən daha müasir görünür. Başqa cür ola da bilməzdi, axı yeni Infiniti FX-in xarici görünüşü üzərində öncə Nissan GT-R superkarının eksteryerini hazırlamış Xiroşi Xaseqava işləyib.

Avtomobildə elektron qurğular kifayət qədər çoxdur. Test-drayvın ilk kilometrindəcə onlardan birini sınaqdan çıxardıq. Söhbət qarşıda gedən avtomobilə qədər məsafəni avtomatik mühafizə edən intellektual kruiz-kontrol sistemindən (ICC) gedir. O, əyləc sisteminə, drossel qapağının sensoruna və məsafəölçən lazer aparatına nəzarət edir. Avtomobilin sürəti 40 km/saata çatdıqda bu sistem işləməyə başlayır. ICC bütünlüklə sükan çarxı vasitəsilə idarə olunur: arzu etdiyimiz sürət göstəricisini və qarşıda gedən avtomobilə qədər məsafəni seçirik (cəmi üç məsafə nəzərdə tutulub: yaxın, uzaq və daha uzaq), bununla da məsələ bitir. FX qarşıda gedən avtomobilə yaxınlaşdıqca və ya ondan uzaqlaşdıqca sistem krossoverin hərəkətini əyləcləyərək və ya sürətləndirərək lazımi məsafəni saxlayır.

Amma tam arxayınlaşmaq olmaz, belə ki, sistem fövqəladə hallarda avtomobili tam dayandırmaq funksiyasına malik deyil. O yalnız avtomobilin sürətini saatda 40 kilometrədək azalda bilir. Odur ki, avtomobili tam dayandırmaq vəzifəsi sürücünün öhdəsinə düşür.

Yolda hərəkət

“Baza” modeli olan FX35-in asqısını hazırlayanlar, zənnimcə, qızıl ortanı tapa biliblər. Belə ki, asqı nə həddən artıq sərtdir, nə də yumşaq. Amma bütün bu sözlər 18 düymlük təkərləri olan avtomobillərə aiddir. Standart Еlegance komplektasiyasında krossoverə məhz belə təkərlər quraşdırılır. Avtomobilin daha bahalı versiyalarına 21 düymlük alüminium təkər diskləri quraşdırılıb. Enkei şirkətinin istehsalı olan bu disklərin üzərinə 265/45 ölçülü şinlər taxılıb. Bu təkərlərlə hərəkət zamanı təəssürat bir qədər fərqli olur – bu təkərlərlə FX bir qədər sərtləşir.

Nissan GT-R superkarında olduğu kimi, FX-a tam ötürücülü ATTESA E-TS intellektual sisteminin quraşdırıldığını bilmək avtomobil sahibinin praktiki olaraq istənilən yol örtüyündə özünü inamlı hiss etməsinə imkan verir. Müxtəlif sensorların göstəricilərinə istinadən bu sistem fırlanma momentini bütünlüklə və ya qismən ön və ya arxa oxa ötürməyə qadirdir.

Yeni Infiniti FX-in interyeri, praktiki olaraq, tam dəyişib. Yalnız mərkəzi konsoldakı analoq saat olduğu kimi qalıb.

Yeni krossover o qədər yüksək səviyyəli texnologiyalarla təchiz olunub ki, öz zədələrini özü “sağalda” bilir. Müasir texnologiyadan istifadə sayəsində avtomobil kuzovun lak-boya örtüyündəki kiçik sıyrıntıları “sağaldaraq” əvvəlki görünüşünü bərpa edir. Amma söhbət yalnız mikronlarla ölçülən kiçik zədələrdən gedir (belə sıyrıntılar, məsələn, avtomobilin ehtiyatsızlıqla yuyulması zamanı yarana bilər).

Kapotun altında

Adından göründüyü kimi, bu avtomobilə 3,5 litr həcmə malik mühərrik quraşdırılıb. Onun gücü sələfi ilə müqayisədə 27 vahid çoxdur və 307 at gücü təşkil edir. FX35 100 km/saat sürət yığmağa 6,9 saniyə çox vaxt sərf edir.

FX50 indeksli Infiniti avtomobilinə 5 litr həcmə və 400 at gücünə malik V8 mühərriki quraşdırılır. İki ton kütləsi olan bu avtomobil 100 km/saat sürəti cəmi 5,8 saniyəyə yığır. Doğrudan da, əsl superkar göstəricisidir.

Həm altı silindrli mühərrik, həm də V8 aqreqat yeddipilləli adaptiv avtomat transmissiya ilə tandemdə işləyir. Transmissiyaya qarşı hər hansı irad yoxdur. Sürət keçidləri rəvan, cəld və maneəsiz həyata keçirilir.

Rahatlılığı

Biz dairəvi müşahidə sistemini sınaqdan keçirmək istədik. Bu sistem dörd rəqəmsal kameradakı təsvirləri konsolun yuxarı hissəsindəki rəngli displeyə çıxarır. Həmin kameralardakı təsvirlər çox məharətlə işlənib hazırlanır.

Belə ki, sürücü öz avtomobilini “quş uçuşu hündürlüyündən” seyr edə bilir.

Avtomobilin yuxarıdan görüntüsü sürücünü qane etmədikdə o, digər kameraları, məsələn, arxa kameranın görüntüsünə keçə bilər. Həmin kamera avtomobilin hərəkət trayektoriyasını yan tərəflərdəki güzgülərdə əks etdirir, yaxud ön tərəfin kənarlarında baş verənlərə nəzər salmağa imkan yaradır.

Dairəvi müşahidə sistemi “görünməyən zonalar” problemini, həqiqətən, aradan qaldırır və parkinq prosesini xeyli asanlaşdırır. Bu sistemdə sükanı özü fırlada bilən yarımavtomatik parkinq funksiyası da olsaydı, yaxşı olardı.

Səkkiz düymlük monitora təkcə yuxarıda qeyd edilən kameraların təsvirləri deyil, həm də Bosse audiosisteminin, klimat-kontrolun göstəriciləri və ya naviqasiya sisteminin məlumatları çıxarılır.

Yekun

Əgər avtomobilin insan üçün rahatlığını çoxlu sayda faydalı elektron sistemlərin mövcudluğu ilə ölçsək, onda tam əminliklə deyə bilərik ki, yeni FX, həqiqətən, “canlı” və maraqlı avtomobildir. O heç də sələfindən geri qalmır. O, istər hərəkətsiz vəziyyətdə, istərsə də hərəkət edərkən sələfinə nisbətən daha aqressiv və müasir görünüşə malikdir. 5,0 litr həcmli motor əla işləyir, transmissiya isə heç bir problem yaratmır. 

Əlbəttə, yeni FX-i aktiv asqı və şassi ilə yoxlamaq maraqlı olardı, amma qoy bu gələn dəfəyə qalsın...

Mühərrik

Həcmi 3.5 litr

Silindr / Klapan – 6/24

At gücü – 307

Fırlanma anı – 355 Nm

Transmissiya – 7 AT

Ölcülər

Uzunluq 4859 mm

En 1928 mm

Hündürlük 1679 mm

Təkər bazası – 2885 mm

Klirens - 187 mmBaqaj həcmi – 702/1756 lt

Yanacaq çəni 90 lt

Interyer

Dəri sükan və oturacaqlar

İşıq sensoru

6CD+MP3+Radio Bose

LCD monitor

Klimat-kontrol

Bort kompüteri

Yaddaşlı oturacaqlar

Elektrikli arxa pərdə

4 kamera

Eksteryer

Yüngül lehimli R20 disklər

Şüşə lyuk

Arxa spoyler

Reylinqlər

Bi-ksenon faralar

 © 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.   

Şərhlərin sayı: 0

AVATAR
Hələ heç kim şərh verməyib. Birinci siz olun.