İcbari sığorta: cibdə lazımi sənəd yoxsa zərərlərə təminat

Просмотров: 2094
İcbari sığorta: cibdə lazımi sənəd yoxsa zərərlərə təminat

Ölkəmizdə sığorta ilə bağlı mübahisəli söhbətləri tez-tez eşidirik. Əsasən sürücülər sığorta şirkətlərindən gileylənir, sığorta ödənişlərini ala bilmədiklərini söyləyirlər.

Amma əslində ölkəmizdə çox sayda sürücünün sığortaya aid bilmədiyi xeyli məqamlar var. Məsələn, qəza törətmiş  sürücü nəqliyyat vasitəsi sahiblərinin mülki məsuliyyətinin icbari sığortası şəhadətnaməsi ilə sığorta şirkətindən öz əmlakına dəymiş ziyanı tələb edir. Halbuki, belə tələblə kasko sığorta polisi olan sürücülər sığorta şirkətlərinə müraciət edə bilərlər.

Bu gün bizlər demokratik cəmiyyətdə yaşayırıq. Hər birimiz öz fikrimizi azad şəkildə ifadə edə bilərik. Amma gəlin hansısa fikri səsləndirməzdən, sığorta şirkətlərini etibarsızlıqda, yalançılıqda günahlandırmamışdan öncə bir az öyrənək.

Mən demirəm ki, sığorta şirkətləri aydan arı, sudan durudurlar. Şirkətlərin özlərində də etiraf edirlər ki, sığortaya ləkə gətirən bəzi şirkətlər var. Amma bütövlükdə sığortaya mənfi baxmaq olmaz.

Mətləbdən uzaqlaşmayaq. Sürücülərimizin sığortaya aid bilmədiyi çox şeylərin olduğunu qeyd edirdim. Elə götürək,  cibinizdə avtomobilin sənədləri ilə birlikdə gəzdirdiyiniz nəqliyyat vasitəsi sahiblərinin mülki məsuliyyətinin icbari sığortası şəhadətnaməsi haqqında ətraflı bilirikmi? Çoxlarımızın 10 manat ödəyərək aldığımız həmin məcburi kağız parçası nəyə lazımdır?

Nəqliyyat vasitəsi sahiblərinin mülki məsuliyyətinin icbari sığortası Azərbaycan qanunvericiliyinə əsasən, məsuliyyətini sığortalayan nəqliyyat vasitəsi sahiblərinin nəqliyyat vasitəsinin istifadəsi zamanı üçüncü şəxslərə vurduğu zərərə təminat verir.

Tutaq ki, siz qəza törədərək başqa bir avtomobili əzmisiniz. Belə olan halda sığorta şirkəti sizə deyil, avtomobilini əzdiyiniz şəxsə ödəniş edəcəkdir. Siz və ailə üzvləriniz üçüncü tərəf sayılmır. Buna görə də sığorta şirkətindən heç bir məbləği ala bilməzsiniz.

Əgər kasko sığortası zamanı qəzanı alkoqol qəbul etmiş halda və ya sürücülük vəsiqəsi olmayan şəxsin avtomobilinizi sürərək törətdikdə, sığorta şirkəti ödəniş verməkdən imtina edəcəkdir.

Lakin nəqliyyat vasitəsi sahiblərinin mülki məsuliyyətinin icbari sığortası sığorta müqaviləsində göstərilən nəqliyyat vasitəsini idarə edən şəxs həmin nəqliyyat vasitəsini alkoqol, narkotik və ya toksikoloji vəziyyətdə idarə etdikdə və sığorta müqaviləsində göstərilən nəqliyyat vasitəsi onu qanuni əsaslarla idarə etməyə hüququ olmayan şəxs tərəfindən idarə edildikdə baş verən sığorta hadisələrinə təminat verir.

Sadəcə olaraq qanunun 23-cü maddəsinə əsasən, həmin hallarda sığorta ödənişi məbləğində subroqasiya hüququ yaranır. Başqa sözlə, sığortaçı yuxarıda göstərilən hallarda üçüncü şəxsə vurulan zərərə görə sığorta ödənişini həyata keçirir, zərər vuran şəxsdən isə ödənilmiş sığorta ödənişinin məbləğini subroqasiya qaydasında alır.

Üçüncü şəxslər qarşısında öz məsuliyyətlərini sığortalamamış nəqliyyat vasitələri sahibləri (fiziki şəxs olduqda) Dövlət Yol Polisi əməkdaşları tərəfindən 10 manat cərimə olunur.

Bu sığorta növündə illik sığorta haqqı  fiziki şəxslərə məxsus minik avtomobilləri üçün 10 manat,  hüquqi şəxslərə məxsus minik avtomobilləri üçün 12 manat,  yük avtomobilləri üçün isə 16 manatdır. Avtobuslar üçün isə oturacaq yerlərinin sayından asılı olaraq 24 manatdan 50 manata qədər dəyişir.

Sığorta ödənişlərinin limit haqqı isə belədir. Yol-nəqliyyat hadisəsi zamanı əmlaka dəyən zərərə görə isə 1000 manat, səhhətə vurulan zərərə və ölümə görə adambaşına  1000 manat olmaqla cəmi məsuliyyətin məbləği 5000 manatdan artıq olmamaq şərti ilə ödənilir.

Hörmətli sürücü,  bunları bilmək sizin özünüz üçün lazımdır. Bəlkə də, çox vaxt aldadılmağımızın səbəbi öz hüquqlarımızı bilməməyimizdir. Biz hər bir sahədə hüquqlarımızı öyrənək. Sığortanın isə əmlak və insan həyatı ilə bağlı olduğunu düşünsək, bu xidmətin nə qədər lazımlı olduğunu görərik. Gəlin sığorta şəhadətnaməsini cibimizə lazımi sənəd kimi yox, dayaq kimi qoyaq.



Seymur Yunusov



© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.


Şərhlərin sayı: 0

AVATAR
Hələ heç kim şərh verməyib. Birinci siz olun.