Hyundai Veloster

Просмотров: 4572
Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster
  • Hyundai Veloster

Gözəllik qurban tələb edir. Gözəl və qeyri-adi avtomobil hazırlamaq üçün Hyundai nəinki müəyyən qurbanlara getməyə razı olub, həm də qeyri-adi eksperimentlər aparıb, yəni beşqapılı hetçbekin arxa qapılarının birini ixtisara salmağı qərara alıb. Qeyd edək ki, "avtomobil.az"ın müxbiri dünyada ilk dördqapılı hetçbeki – Hyundai Veloster avtomobilini testdən keçirib.

Bu avtomobil "C" sinfinə aiddir və ölkəmizdə populyar olan KIA cee'd modelinin bazasında hazırlanıb. Avtomobilin ön hissəsi kifayət qədər aqressiv görünüşə malikdir, amma faraların quruluşu i30 Solaris modellərini xatırladır və bu, avtomobilin Koreya istehsalı olduğunu dərhal sezdirir. Hetçbekin arxa tərəfinin görünüşü də maraqlıdır: burada iri ölçülü qabarıq faralar, mərkəzdə səsboğucu sistemin borularının ucluqları, iri təkər tağları diqqəti cəlb edir.

Veloster-ə sağ tərəfdən baxdıqda onu arxa qapıda "gizli" dəstəyi olan standart hetçbekə bənzətmək olar, avtomobilin sol tərəfi isə hetçbekdən daha çox, kupeyə bənzəyir, belə ki, bir hissədə bircə qapı var.

Veloster-in salonu olduqca əla işlənib. Burada lazım olan hər şey var və lazımi əşyaların yerini müəyyənləşdirmək çətinlik yaratmır. Sürücü kreslosunda kifayət qədər tənzimlənmə imkanı nəzərdə tutulub. Həmçinin sükan sütununun uzunluğunu və sükanın maillik bucağını tənzimləmək olar. Bu funksiyanın sayəsində istənilən bədən quruluşuna malik sürücü sükanın arxasında özünü tam komfortlu hiss edə bilər. Konsolun mərkəzində 7 düymlük ekranı olan multimedia sistemi naviqasiya funksiyası təchiz olunub ki, bu da nəinki disk vasitəsilə, həm də fləş-kart və ya iPhone vasitəsilə musiqiyə qulaq asmağa imkan verir. Yeddi dinamik və baqaj bölməsindəki sabvufer səslərin keyfiyyətini təmin edir.

Arxa tərəfdə yalnız iki sərnişin yerləşə bilər, çünki arxa divanın mərkəzində oturacaqların arasında stəkan altlıqları quraşdırılıb.

Test-drayv üçün müxbirimiz 1,6 litr həcmə və 132 at gücünə malik benzin mühərriki quraşdırılmış maksimal komplektasiyalı (HIT) avtomobili götürdü. Narıncı rəngdə bu avtomobil çox effektli görünür. Müxbirimiz qeyri-adi xarici görünüşə malik avtomobildən yolda da qeyri-adilik gözləyirdi, amma təəssüf ki, Velostergözləntiləri doğrultmadı: avtomat transmissiya ilə 100 km/saat sürət yığmağa 11,5 saniyə sərf etmək, yumşaq desək, yüksək göstərici deyil. Hərəkət zamanı hetçbek özünü kifayət qədər dinamik avtomobil kimi götürsə də, işıqforun yanında start götürərkən onun digər avtomobilləri dərhal geridə qoyacağını gözləməyə dəyməz.

Mühərrikin yetərincə güclü olmamasından savayı, Hyundai Veloster-ə hər hansı digər ciddi irad tutmaq mümkün deyil. Yolda avtomobil özünü olduqca əla aparır, həssas sükan isə sürücünün kifayət qədər sərt manevrlər etməsinə imkan verir. Sərtliyi lazımi dərəcədə olan asqı praktiki olaraq ideal işləyir, belə ki, yolda yalnız iri çökəkliklərdən yan keçmək lazımdır, yoldakı qalan nahamarlıqlar isə salonda heç bir narahatlıq yaratmır. Ön tərəfdə McPherson tipli asqı, arxada isə yarımmüstəqil asqı quraşdırılıb. Səs izolyasiyası bu sinfə aid avtomobil üçün kifayət qədər yaxşı səviyyədədir. Əlbəttə, şinlərin və mühərrikin səsi salonda eşidilir, amma salondakıların söhbətinə mane olacaq dərəcədə narahatlıq doğurmur. Bort kompüterinin göstəricilərinə əsasən, test zamanı 100 km məsafəyə yanacaq sərfiyyatı 10 litr təşkil etdi.

Belə bir sual yaranır ki, hetçbekin kuzovunda bu eksperimentin aparılması nəyə lazım idi? Görünür, avtomobili hazırlayanlar beşqapılı hetçbekin bir qapısını ona görə ixtisara salıblar ki, azyaşlı uşaqları olan və kupe, yaxud üçqapılı avtomobil almaq istəyən alıcılarda Veloster-i almağa maraq yaratsınlar. 

Potensial alıcılarda maraq yaratmaq üçün mübarizə aparan istehsalçılar hər cür vasitələrə əl atırlar, amma digər avtomobillərə bənzəməyən unikal avtomobil hazırlamaq ildən-ilə çətinləşir. Belə getsə, hətta birqapılı avtomobilin düzəldilməsi də mümkün ola bilər.

Müəyyən nöqsanlara və narahatlıqlara baxmayaraq, Veloster-i kifayət qədər yaxşı və balanslaşdırılmış avtomobil hesab etmək olar. O, xüsusən bir-birinə bənzəyən sedanların və ofrouderlərin axınında başqalarından seçilmək istəyənlərin ürəyincə olacaq. Parlaq narıncı rəngli kuzovu olan Veloster yolda digər sürücülərin diqqətini özünə cəlb edə bilir. Diqqəti özünə cəlb etmək istəməyən, sadəcə olaraq yaxşı hərəkət keyfiyyətinə malik avtomobilə sahib olmaq istəyən şəxslər isə Hyundai-ın rəqiblərinin avtomobillərini nəzərdən keçirə bilərlər: digər istehsalçılar bu qiymət seqmentində kifayət qədər çoxlu sayda əlverişli təkliflər irəli sürürlər.


© 2013 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.