Hyundai Grand Santa Fe Koreya istehsalçısının buraxdığı yeddi yerlik yeni krossoverdir. Azərbaycan bazarında bu avtomobil ix55 (Veracruz) modelini əvəz edəcək. İri Santa Fe modelinin necə alındığını Qobustan yollarında aydınlaşdırmağa çalışaq. 

Koreya avtomobil istehsalçısı Hyundai yeddi yerlik yeni krossoverini – Hyundai Grand Santa Fe modelini Azərbaycan bazarına çıxarır. Bu avtomobil orta ölçülü Santa Fe krossoveri ilə eyni bazada hazırlanıb. İri ailə krossoveri ix55 (Veracruz) modelini əvəzləmək üçün buraxılır. 

Azərbaycan jurnalistləri üçün Qobustanda test-drayv təşkil edildi. Bu tarixi qoruq Hyundai Grand Santa Fe üçün ilk sınaq məkanı oldu. İlk təəssürat ondan ibarətdir ki, yeni Koreya krossoveri yolsuzluq şəraitində idarə edilmək üçün nəzərdə tutulmayıb. Yolda avtomobil silkələnirdi, sanki dalğalı dənizdə idi. 

Yol örtüyünün az-çox qənaətbəxş keyfiyyətdə olduğu nadir yerlərdə güclü silkələnmə sakit və səssiz hərəkət ilə əvəzlənirdi. 

Bütün bunlar bu tezisi təsdiq edirdi ki, koreyalılar yolsuzluq şəraiti üçün deyil, ilk növbədə şəhər daxilində gündəlik idarəetmə üçün iri ailə avtomobili düzəldiblər. 

Beləliklə, Grand Santa Fe şəhər yollarında hərəkət üçün nəzərdə tutulmuş iri ölçülü yeddi yerlik krossoverdir. 

Yeni krossoverin işıq üzü görməsinin resepti kifayət qədər sadədir: koreyalılar onu bir il əvvəl bizim bazarda peyda olmuş adi Santa Fe modelinin bazasında hazırlayıblar. Təkər bazası 100 mm uzadılıb: iri Santa Fe "kiçik qardaşından" 10 mm hündür, 5 mm enli və 225 mm uzundur. Zahiri müqayisədə Grand Santa Fe modeli xeyli iri görünür. Həmçinin detallarda da nəzərə çarpan fərqlər var: yeni modeldə radiator barmaqlığı daha enlidir, bamper və işıq texnikası fərqlidir. 

Kiçik versiya ilə müqayisədə avtomobilin salonu olduqca böyük görünür.

Avtomobilin daxili məkanını həm sürücü, həm də sərnişinlər üçün yetərincə böyüdüblər. Sükanın arxasında istənilən bədən quruluşlu sürücü əyləşə bilər. Eyni sözü arxa cərgə barəsində də demək olar, burada test-drayv zamanı sərnişinlərdən biri (onun çəkisi 100 kiloqramdan artıq idi) yol boyu rahatca yuxulamışdı. Bundan əlavə, salonda üçüncü oturacaq cərgəsi də peyda olub. Qeyd edək ki, digər modellərin üçüncü cərgələrindən fərqli olaraq bu avtomobilin üçüncü cərgəsində otursanız, darısqallıq hissindən əziyyət çəkməyəcəksiniz. 

Salonun tərtibatına görə iri ölçülü yeni Hyundai Santa Fe krossoveri kiçik ölçülü Santa Fe versiyasına çox oxşayır. 

Sərnişinlərin rahatlığını daha dolğun təmin etmək üçün salonda hətta stəkan altlıqları və ayrıca kondisioner üçün əlahiddə yer ayrılıb. 

Baqaj bölməsinin həcmi 634 litrə çatır, ehtiyat təkər isə avtomobilin dib hissəsində yerləşdirilib. Baqaj bölməsinin qapısı elektrik ötürücüsü ilə təchiz olunub. Bütün bunlar Hyundai Grand Santa Fe modelini yükdaşıma baxımından olduqca praktik avtomobilə çevirir. 

Eyni zamanda, təchizatına və interyerindəki detalların tərtibatına görə Grand Santa Fe analoji kiçik modeldən praktiki olaraq az fərqlənir. Cihazlar panelindəki siferblatların yaraşıqlı və dərində yerləşən oyuqları, habelə multimedia sistemi quraşdırılmış mərkəzi konsolun qeyri-adi "ilanvarı" dizaynı baza modelindən götürülüb. Ümumən salonun tərtibatında işlənmiş materialların keyfiyyəti kifayət qədər yüksək, dəri kreslolar isə rahat və komfortludur. Artıq bütün komplektasiyalarda ikizonalı klimat-kontrol, elektron dayandırıcı əyləc, sensor ekran, arxa görüntü kamerası, sükana düşən gücün tənzimlənməsi sistemi və hətta paralel avtoparklayıcı nəzərdə tutulub (istehsalçı bir müddət sonra perpendikulyar avtoparklayıcının da olacağını vəd edir).

Azərbaycanda Grand Santa Fe yalnız bir növ mühərriklə təchiz olunur. Bu, altı pilləli avtomat transmissiya ilə tandemdə işləyən V6 benzin mühərrikidir. Bu güc aqreqatının həcmi 3,3 litr, gücü isə 271 at gücü təşkil edir. 

Avtomobilin güc aqreqatının yanacaq sərfiyyatı 100 km məsafəyə cəmi 15 litr təşkil edir. 

Yeddi yerlik krossoverlər sinfində bu avtomobilin əsas rəqibləri arasında Toyota Highlander ilə Mazda CX-9-u qeyd etmək olar. Yeni avtomobilin qiymətinə gəlincə isə 35900 manat təşkil edir