Ford Transit Connect Electric Van & Taxi CNG/LPG: uğurun möhkəmləndirilməsi

Просмотров: 2805
Ford Transit Connect Electric Van & Taxi CNG/LPG: uğurun möhkəmləndirilməsi
  • Ford Transit Connect Electric Van & Taxi CNG/LPG: uğurun möhkəmləndirilməsi
  • Ford Transit Connect Electric Van & Taxi CNG/LPG: uğurun möhkəmləndirilməsi
  • Ford Transit Connect Electric Van & Taxi CNG/LPG: uğurun möhkəmləndirilməsi
  • Ford Transit Connect Electric Van & Taxi CNG/LPG: uğurun möhkəmləndirilməsi
  • Ford Transit Connect Electric Van & Taxi CNG/LPG: uğurun möhkəmləndirilməsi

Ford Transit Connect-in “Truck of the Year 2010”un nüfuzlu Şimali Amerika müsabiqəsində qələbəsinin bayram edilməsi hələ bitməmiş, Ford bu uğurlu başlanğıcın davamçılarını – elektromotorlu furqonu və qazla işləyən taksini bazara çıxarmaqla Ford Transit Connect-in uğurunu möhkəmləndirməyə tələsir. Onların hər ikisi Ford Transit Connect-in bazasında hazırlanıb.

Ford Transit Connect Electric ilk dəfə Çikaqo avtoşousunda nümayiş etdirilib. O, birdən-birə üç şirkətin səylərinin nəticəsində ərsəyə gəlmiş məhsuldur: Ford bu iş üçün bilavasitə furqonu təqdim edib, Force Drive elektrik ötürücüsünü hazırlayıb, Azure Dynamics isə litium-ion batareyalarının hazırlanması üzərində çalışıb. Nəticədə “sıfır” emissiyalı elektrik mühərrikli yüngül furqon alınıb. O, kiçik yük partiyalarını şəhər daxilində və şəhər kənarında müxtəlif yerlərə çatdırmaq işinə əla yarayan nəqliyyat vasitəsidir. Hərəkət marşrutu boyunca tez-tez dayanmaq və sonra hərəkətə başlamaq elektrokarlar üçün adi iş rejimidir.

Bu kommersiya elektromobili batareya ilə 120 km/saat maksimal sürətlə hərəkət etməyə və batareyası bir dəfə yükləndikdən sonra 128 km məsafə qət etməyə qadirdir. Bu elektromobilin əsas üstünlükləri ondan ibarətdir ki, o, sərt ekoloji tələblərin irəli sürüldüyü “yaşıl” zonalar deyilən yerlərdə işləmək iqtidarındadır və ətraf mühitə atılan zərərli maddələrin miqdarı ilə bağlı tələblərə, məsələn, Kaliforniya ştatındakı kimi sərt tələblərə tam cavab verir.

Ford Transit Connect Electric Van furqonu 3,82 kubmetr həcmli baqajın daşınması üçün nəzərdə tutulub. Yük bölməsinin uzunluğu 1844 mm, hündürlüyü 1501 mm-dir. Qoşa taylı arxa qapılar standart variantda 180 dərəcə, opsional variantda isə 255 dərəcə bucağadək açılır.

Elektromobilin texniki xüsusiyyətlərinə gəlincə, aşağıdakıları qeyd etmək olar. Standart komplektasiyada bütün nüsxələr 120 voltluq enerji mənbəyi ilə təchiz olunur, sifariş əsasında 240 voltluq enerji mənbəyi də quraşdırıla bilər. Sonuncular batareyaların 240 voltluq gərginliklə işləyən qurğularından yüklənib-doldurulması üçün nəzərdə tutulub. Yükləmə müddəti 6 saatdan 8 saata qədərdir. Enerji kabeli hər iki tip gərginlik üçün yararlıdır. Elektrik transmissiyası litium-ion batareyalarından qidalanır. Batareyaların ümumi gücü 28 kVt/saat təşkil edir. Bundan başqa, elektromobildə iki gərginlik dəyişdiricisi var: onlardan biri avtomobilin aşağı voltlu bort şəbəkəsini qidalandırmaq üçün, digəri isə elektromotorun batareyalarını qidalandırmaq üçündür. Elektrik avadanlıqları və batareyalar elə formada yerləşdirilib ki, Ford Transit Connect-in üslubuna və interyerinə, eləcə də yük bölməsinə heç bir mənfi təsir göstərmir.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.