Ford Mustang avtomobilini bilyard stolu ilə “calaq etdilər”

Просмотров: 2331
Ford Mustang avtomobilini bilyard stolu ilə “calaq etdilər”

Yüksək ixtiraçılıq qabiliyyətinə malik amerikalılar Yeni il bayramları ərəfəsində onları və ya yaxınlarını qeyri-adi hədiyyə ilə sevindirmək istəyənlərə təklif edirlər ki, hədiyyə qismində bilyard stolunu seçsinlər. Söhbət 1965-ci ildə buraxılmış populyar Ford Mustang modeli formasında hazırlanmış bilyard stolundan gedir.

Ford Mustang-ın “kuzovu” şüşə liflərindən hazırlanıb, ekstravaqant bilyard stolunun ayaqlarının yerinə isə xromlanmış diskləri olan əsl təkərlər quraşdırılıb. Mahudla örtülmüş kuzovun uzunluğu real avtomobilin ölçülərindən fərqlənsə də, bilyard stolunun yaradıcıları qeyd edirlər ki, ön və arxa hissənin detalları qabaritlərinə görə orijinala uyğundur.

Unikal bilyard stolunun yaradıcıları ilk dəfə onu yanvarın 18-dən 24-dək keçiriləcək Barret-Jackson hərracında təqdim etmək niyyətindədirlər. Amma avtomobil və kolleksiya həvəskarları, eləcə də bilyard oyunun pərəstişkarları bu “incəsənət əsəri”ni indidən sifariş edə bilərlər. Bunun üçün onların 14.995 dollar pulu olmalıdır.

Dəfn bürosu sərxoş sürücülərə pulsuz dəfn mərasimi təklif edir

Amerikanın Corciya ştatının şimalında, “Əbədi şəhər”in adaşı olan kiçik Roma şəhərində yerləşən mərasim xidmətləri bürosu sərxoş vəziyyətdə avtomobil sürmək həvəskarlarına özünəməxsus yeni il hədiyyəsi edib. Bu hədiyyə bayramlar ərəfəsində içki həvəskarlarını dəfn xərclərinə qənaət etmək barədə deyil, yol hərəkəti qaydaları barədə daha çox düşünməyə vadar edib.

Bayram ərəfəsində sürücülər McGuire, Jennings and Miller dəfn bürosuna baş çəkib müqavilə bağlayıblar. Həmin sənəddə göstərilir ki, onu imzalamış avtomobil həvəskarı yeni il gecəsi spirtli içki və ya narkotik maddə qəbul etdikdən sonra avtomobili idarə edəcək. Əgər o həmin gecə yol-nəqliyyat hadisəsində ölərsə, firma onu pulsuz dəfn etməyi öhdəsinə götürür.

Xidmətlərin siyahısına bunlar daxildir: tabutun və qəbiristanlıqda yerin seçilməsi, limuzinin verilməsi və mərhumun cəsədinin dəfn üçün hazırlanması.
Dəfn bürosunda izah ediblər ki, onların “Dayan və fikirləş!” adlanan proqramı hər hansı hərəkəti etməzdən əvvəl fikirləşməyən adamların həyatını xilas etmək məqsədini daşıyır. 

General Motors “keçiyə görə” hindliyə cavab verəcək

Amerikanın avtomobil nəhəngi General Motors-un ahıl yaşlı hindistanlı avtomobil sürücüsü ilə üç ildən artıq davam etmiş məhkəmə çəkişməsi, nəhayət ki, başa çatdı. Qeyd edək ki, həmin sürücü bu avtomobil istehsalçısının reklam prospektinə son hərfinə qədər inanmışdı, həmin reklamda o dövrdə hələ Subaru-ya deyil, General Motors-a məxsus olan Forester ofrouderi istənilən maneəni dəf etməyə qadir olan dağ keçisi ilə müqayisə edilmişdi.

Məhz bu arqument hindli alıcının bu avtomobili almasında həlledici amil olmuşdu, halbuki dağ keçisi ilə müqayisə sadəcə şirkətinin reklam yaradıcılarının hazırladığı obrazlı müqayisədən başqa bir şey deyildi.

Hadisənin tarixçəsi 2005-ci ildən başlayır, həmin il 80 yaşlı Aşok Tolat (Ashok Tolat) rəsmi dilerdən yeni Forester avtomobilini aldı. Hindistanda bu krossoverlər o vaxt General Motors-a (GM) məxsus olan Chevrolet modelləri sırasına daxil idi.
Aşok Tolat öz Chevrolet Forester-ini rahatca sürür və heç bir problemlə qarşılaşmırdı. Amma bir dəfə tropik leysan başladı və kiçik daşqın oldu ki, bu da

Hindistan kimi ölkə üçün ənənəvi haldır. Dərinliyi 30 santimetrdən çox olmayan su maneəsini dəf etməyə cəhd göstərərkən hindlinin Forester-i suda ilişib qaldı və daha hərəkət edə bilmədi. Hadisələrin bu cür gedişatından narazı qalan Tolat məhkəməyə müraciət edərək Fuji Heavy-yə qarşı deyil, avtomobili ona satmış şirkətə, yəni GM-ə qarşı iddia qaldırdı.

Məyus olmuş avtomobil sahibinin məhkəməyə müraciət etmək üçün əsas arqumenti Chevrolet Forester avtomobilinin reklam prospekti oldu, həmin reklamda deyilirdi ki, bu avtomobil “bütün maneələri dağ keçisi kimi asanlıqla dəf edir”. Yeri gəlmişkən, bu sözlər müvafiq şəkillərlə müşayiət olunurdu.

Hindli şikayətində iddia edirdi ki, keçilər bir fut dərinliyində su axınından keçərkən dayanıb qalmırlar və əlbəttə ki, həmin axında məhv olmurlar. “Buna görə də alıcının açıq-aydın aldadılması göz önündədir”, – deyə iddiaçı məhkəmədə bildirdi. Hindistanın yerli instansiya məhkəməsi iki dəfə Tolatın xeyrinə qərar çıxardı. GM Hindistanın Ali Məhkəməsinə apellyasiya şikayəti verərək mövqeyini onunla izah etdi ki, Forester hər cür hava şəraiti və yol örtüyü üçün nəzərdə tutulan avtomobil deyil, amma cəhdləri boşa çıxdı: Ali Məhkəmə təhqir olunmuş istehlakçını yenə də müdafiə edərək onun xeyrinə qərar çıxardı.

“Keçi reklamına görə” GM aşağıdakı qaydada cavab verməli olacaq: avtomobil onun sahibindən ilkin dəyəri ödənilməklə satın alınacaq. Bundan başqa, şirkət öz reklam prospektlərinin hazırlanmasına daha məsuliyyətlə yanaşacaq.


Hazırladı: Sevinc Yusifova


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.


Şərhlərin sayı: 0

AVATAR
Hələ heç kim şərh verməyib. Birinci siz olun.