Əsl ailə başçısının avtomobili Dodge Journey

Просмотров: 3194
 Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey
  •  Əsl ailə başçısının avtomobili Dodge Journey

"Journey" sözü ingiliscə "səfər", "səyahət" mənasını verir. Bu söz Dodge Journey amerikan modelini təsvir etmək üçün ən uyğun sözdür. Belə ki, Journey alçaq və geniş avtomobildir, klirensi kifayət qədər hündürdür və ən əsası, tam ötürücülü modeldir. Onu bir neçə avtomobil sinfinə aid etmək olar. Bu avtomobili istehsal edərkən Dodge qarşısına kifayət qədər ambisiyalı məqsəd qoyub: minivenin, universalın və ilk növbədə, ofrouderin ən yaxşı keyfiyyətlərini bir avtomobildə birləşdirmək. Kompaniyanın bu məqsədə nə dərəcədə nail olduğunu gəlin nəzərdən keçirək.

Journey modelinin qabaritləri kifayət qədər böyükdür. Belə ki, onun uzunluğu 5 metrə yaxın, eni isə 2 metrdir. İnteryeri tərtib edənlər sərəncamlarındakı geniş məkandan çox gözəl istifadə ediblər. Əşyaları qoymaq üçün cürbəcür oyuqlar, qutular dərhal diqqəti cəlb edir, onlara hətta arxa sərnişinlərin ayaqlarının altında və qabaq oturacaqda da rast gəlmək olar.

Ötən illərin amerikan krossoverlərinin interyerinin xarakterik xüsusiyyətlərini xatırlayırsınızmı? Solğun və sərt plastik materialı unudun. Journey modelinin ön paneli keyfiyyətinə görə biznes-klass sedanlarından geri qalmır. İqlim qurğusunun və media sisteminin idarə olunması üçün iri düymələr, iri ölçülü havaçəkənlər, dirsək altlığında iri həcmli keys – bir sözlə, salonda hər şey üçün gen-bol yer var.

Dodge avtomobilinin sükanı arxasına keçərkən özünü əsl ailə başçısı kimi hiss edirsən. Ev sahibi kimi öz mülkünə göz gəzdirir, çantaları bir küncə yığır və uşaqları oturacağa oturdursan. Bu iş kifayət qədər zövqvericidir, belə ki, salonun transformasiyası sistemi Flip-N-Stow tam qüvvəsi ilə işləyir. Qabaq sərnişinin oturacağı qatlanaraq kiçik masaya çevrilir. Arxa oturacaqlar kürək hissəsindəki rıçaqın vasitəsilə asanlıqla hərəkət etdirilir və üçüncü cərgəyə yol açılır. Yeri gəlmişkən, yeddiyerlik salonda səfər yoldaşlarınız arasında uşaqlar da varsa, yaxşı olar ki, onları üçüncü cərgədə oturdasınız. Bura onlar üçün münasib yerdir. İkinci və üçüncü cərgədəki oturacaqları qatlamaqla 2 min litrə yaxın həcmi olan məkan yaratmış oluruq.

Salonda məkanın olduqca düşünülmüş şəkildə təşkili hər bir detalda hiss olunur. İkinci cərgədəki oturacağı uşaq kreslosuna çevirmək mümkündür ki, bu sistemin sayəsində həm pulunuza qənaət edir, həm də xeyli sərbəst məkan qazanmış olursunuz.

Azərbaycanda Journey avtomobillərinin kapotunun altında iki növ mühərrik quraşdırılır. Bunlardan birincisi 2,4 litr həcmli, 170 at güclü DOHC mühərrikidir. İkincisi isə  3,6 litr həcmli Pentastar mühərrikidir. O, 280 at gücündədir. Silindrləri "V" formasında yerləşdirilən bu güc aqreqatı 2011-ci ildə "Ward" jurnalının versiyasına görə, ən yaxşı on mühərrik sırasına daxil olub.

Yolla hərəkət zamanı Journey modeli daha çox sedanı xatırladır ki, bu da sürücü üçün bir qədər narahat olan iri minivenlərin qarşısında bu avtomobilin üstünlüyüdür. Təsadüfi deyil ki, bu avtomobil yeni Crysler Sebring-in bazasında hazırlanıb. Avtomobilin güclü mühərriki altıpilləli avtomat transmissiya ilə tandem təşkil edir. Bu cütlük öz işini əla yerinə yetirir.

Yolsuzluq şəraitində də Journey özünü yaxşı tərəfdən göstərir. Çoxsaylı yardımçı sistemlərlə təchiz olunan avtomobil mühərrikin fırlanma momentinin zəruri faizini arxa təkərlərə ötürərək təpəciklərə inadla dırmaşır. Avtomobil torpaq yolda yerdən kip "yapışaraq" sürüməyə qarşı əla müqavimət göstərir. Tractoin Control və ESP sistemləri sürücünün səhvlərini sığortalayır. Dodge Journey modelinin baza komplektasiyasına dinamik stabilləşdirmə sistemi ESC və istənilən sürətlə hərəkət zamanı təkərlərin yerində (boş-boşuna) fırlanmasının qarşısını alan sistem daxildir. Onlar müxtəlif yol və hava şəraitlərində krossoverin trayektoriyasından kənara çıxmasının qarşısını alır. Hər iki sistem tam ötürücülü idarəetmə funksiyası ilə birgə işləyir. Bu funksiya onlara imkan verir ki, fırlanma momentini oxlar arasında bölüşdürməklə öz potensiallarının bir hissəsini reallaşdırsınlar. 

Avtomobilin yoldakı maneələri rahat dəf edə bilməsi üçün istehsalçı şirkətin mühəndisləri onu təkcə tam ötürücü ilə deyil, həm də kifayət qədər hündür (197 mm) klirenslə təchiz ediblər. Bundan əlavə, əvvəlki nəsillə müqayisədə avtomobilin səs izolyasiyası və asqısı təkmilləşdirilib. Bu avtomobillə sürücü qarlı yol örtüyünü rahatca dəf edir və sonra isə geriyə baxaraq bunun öhdəsindən gəldiyinə  özü də inana bilmir.

Bizim bazarda təklif olunan Dodge Journey avtomobili üç komplektasiyada alıcılara təklif olunur. Ən sadə versiya - Journey 2.4 SE 26.900 manata, optimal versiya kimi Journey 3.6 FXT 33.900 manata, RT idman paketli Journey 3.6 RT modeli isə 36.900 manata sahib olmaq olar. Bu məbləğə bu cür avtomobili almağa həqiqətən dəyər, çünki o, sizi və ailənizi uzaq səyahətlər və təbiət qoynuna səfərlərlə uzun müddət sevindirəcək. Rəqibləri belə geniş salonla və salonun daxili məkanının geniş transformasiya imkanları ilə öyünə bilməzlər. Bu isə o deməkdir ki, onlar öz sahiblərinə Journey qədər sərbəstlik bəxş edə bilməzlər.

Yerli bazarda bu avtomobilə rəqib təyin etmək çox çətindir. Ölçülərinə və yeddi yerlik olduğuna görə Hyundai SantaFe-ni və minik avtomobilinin bazasında hazırlandığına görə Toyota Highlander krossoverlərini rəqib kimi görmək olar. Journey ən sadə versiyası 2,4 litr həcmli mühərriklə təchiz olunmuş koreyalı rəqibi ilə demək olar ki, eyni qiymətdədir. Yapon modeli ilə müqayisədə isə amerikan avtomobilindən bir qədər balaca (uzunluq ölçüsü baxımından) və zəifdir, amma yanacağı daha çox işlədir (Dodge Journey modelində bu göstərici qarışıq rejimdə 100 km məsafəyə 11,3 litr, Toyota Highlander-də isə 12,4 litr təşkil edir). Üstəlik, onun qiyməti Dodge Journey avtomobilindən 9000 manatdan artıq bahadır. Toyota-nın əsas üstünlüyü bu brendin məşhur olmasındadır. Belə ki, bizim yollarda şütüyən Dodge avtomobillərinin sayı o qədər də çox deyil.

İstənilən halda, hətta siz amerikan avtomobillərinin pərəstişkarı olmasanız belə, Dodge Journey avtomobilinə baxmağınıza və onu sınaqdan keçirməyinizə dəyər. Şübhə etmirik ki, Dodge Journey sizi çox şeylə təəccübləndirəcək. Yeri gəlmişkən, markanın Azərbaycandakı rəsmi dilerindən bu avtomobili əldə etmək olar.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.