Düzgün daşımaq qazanca sahib çıxmaqdır

Просмотров: 2101
Düzgün daşımaq qazanca sahib çıxmaqdır

Artıq meyvə-tərəvəz dövrü başlayıb. Alverçilər, fermerlər topladıqları meyvə və tərəvəz məhsullarını Bakı şəhərinə satmağa gətirirlər. Rayonlarda heç neçəyə gedən meyvə-tərəvəz məhsulları Bakının bazarlarında əla qiymətə yerə dəymir. Məsələn, Mərkəzi Aran rayonlarında kiloqramı 20 qəpiyə satılan alçanı Bakıda 1,50 - 2 manata verirlər.

Əgər hesablamağa başlayaraq kəndlilərin gözəl qazandıqlarını düşünürsünüzsə, bu səhvdir. Bu qədər qazancdan kəndli evinə az bir məbləği apara bilir. Kəndlərdə olan qiymətlərlə Bakı şəhərində olan qiymətlərin arasında fərqin bu qədər böyük olmasının səbəblərindən biri də yollarda paylanan pullardır.

Bakıya şəxsi avtomobilində və ya kənar avtomobildə meyvə-tərəvəz gətirən kəndli yolda bəzi şəxslərə “görüm-baxım” eləməsə, məhsulunu daşıya bilməz. Çünki bu ölkədə yükdaşıma qaydaları, sanitariya-gigiyena normaları var. Sadə kəndlilərin əksəriyyətinin də bu qayda  və normalardan xəbəri yoxdur, hətta həmin tələblərə uyğunlaşmaq onların imkanı xaricindədir. Amma bunlara baxmayaraq, belələri bir sıra qaydalardan xəbərdar olub, nisbətən xərclərini azalda bilərlər.

Ötən ilin sonlarında qəbul olunmuş “Avtomobil nəqliyyatı ilə yüklərin daşınması qaydaları”nda göstərilir ki, ev heyvanları, ət və ət məhsulları, bitkilər, meyvələr, tərəvəzlər müəyyən olunmuş qaydada verilən müvafiq baytarlıq şəhadətnamələri, icazələri və ya karantin sertifikatları olduqda daşınmaya qəbul edilməlidir. Meyvə-tərəvəzin daşınması yükün faktiki kütləsi nəzərə alınmaqla, əmtəə-nəqliyyat qaiməsi əsasında  yerinə yetirilməlidir.

Meyvə və tərəvəz ümumi təyinatlı, həmçinin furqon, izotermik furqon və ya refrijerator banı olan yük avtonəqliyyat vasitələri ilə daşına bilər. Tərəvəz daşınmaya təqdim edildikdə tara saz və quru vəziyyətdə, qoxusuz olmalı, həmçinin dövlət standartlarının, texniki və gigiyenik şərtlərin tələblərinə cavab verməlidir. Taralanmış tərəvəz avtonəqliyyat vasitəsinin banına sıx və arasında boş məsafə olmayan sıralarla yüklənməlidir.

Meyvə və tərəvəz məhsullarının çoxu tezkorlanan yük hesab olunduğundan belə yüklər sanitariya-gigiyena normalarına da uyğun olaraq daşınmalıdır. Məsələn,  meyvə və tərəvəz təzə dərilmiş, hər partiyada yetişmə dərəcəsinə görə eyni növlü olmalı və standart taraya qablaşdırılmalıdır.

Yük göndərən sərt iyi və güclü ətri olan məhsulları eyni avtomobildə daşımamalıdır. Limon, naringi, yemiş daşınan avtomobildə soğan, sarımsaq və yaxud pendir daşımaq olmaz. Meyvə və tərəvəzlərin avtomobildə xarab olmaması üçün lazımi temperatur təmin edilməlidir. Məsələn, lobya +2, xiyar +5, pomidor +4, badımcan +8, ərik 0, albalı, gilas +1 dərəcə selsi temperatur rejimində daşınmalıdır.

Meyvə və tərəvəz məhsulları avtomobilə onun götürə biləcəyi çəkidən artıq yüklənməməlidir. Avtomobilin banına, baqajına, qoşqusuna yığılan yüklərin kənarlara çıxması və hündürlüyü normalar daxilində olmalı və üstü örtülməlidir. Avtomobilin yüklə birlikdə eni 2,5 m-dən, hündürlüyü yolun hərəkət hissəsinin səthindən 4 metrdən, uzunluğu  isə avtomobilin arxa qabaritindən 2 metrdən çox olmamalıdır.

Yük ön və ya arxa tərəfdən avtomobilin qabaritindən - qabarit işığının xarici kənarından 1 metrdən çox və ya yan tərəfdən 0,4 metrdən çox qırağa çıxdıqda “İri qabaritli yük” tanınma nişanı ilə işarələnməlidir.

Əgər göstərilən tələblərə əməl olunarsa, yollarda paylanan pullara xeyli qənaət etmək olar. Bu zaman əllərin zəhməti ilə əkib-becərilən məhsulların bəhrəsini onun əsl sahibi yeyə biləcəkdir.



Seymur Yunusov

© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.