Dünyada ən sürətli motosiklet

Просмотров: 3947
Dünyada ən sürətli motosiklet

Almaniyanın kiçik Aalen şəhərində fəaliyyət göstərən kiçik tüninq firması Warm Up müxtəlif motosikletlərin təkmilləşdirilməsi və gücləndirilməsi ilə məşğul olur. Mahiyyət etibarı ilə bu firmaya əsl idmansayağı tüninq arzusunda olan müştərilər müraciət edirlər. Amma Essendə keçirilmiş illik sərgidə Warm Up mütəxəssisləri öz adi işləri ilə yanaşı, dünyanın ən sürətli motosikletini də nümayiş etdirdilər!

Nə qədər qəribə olsa da, bu sahədə bütün məsələlərin kökü qanunvericilikdədir. Bir sıra ölkələrdə, məsələn, Rusiyada motosikleti tanınmaz dərəcədə dəyişmək və sonra yolda onu idarə etmək olar və buna görə yolda sizi heç kim saxlamaz. Almaniyada isə vəziyyət başqa cürdür. Hətta səsboğucu sistemi dəyişsəniz belə, bunu xüsusi dövlət orqanında qeydə aldırmalı və oradan xüsusi sənəd almalısınız.

Əgər texnikanızda daha böyük dəyişikliklər etmək niyyətindəsinizsə, məsələn, texnikanın mühərrikini və ya asqısını təkmilləşdirmək istəyirsinizsə, onda həmin texnikanı özünüz tərəfindən düzəldilmiş texnika kimi qeydə aldırmalısınız. Stormbringer (“fırtına gətirən”) adlı motosiklet də məhz bu cür yarandı.

Bu motosiklet Kawasaki ZX 10R-in hissə və detalları əsasında hazırlanıb. Tüninq ustaları öncə onun mühərrikini 220 at gücünədək artırıblar. Amma bu göstərici onları qane etməyib və sistemə azot oksidi əlavə ediblər. Qısa müddətdə mühərrik 280 at gücü göstəricisinə nail olub, bu isə 320 km/saat sürətlə hərəkət etmək üçün kifayətdir. Sən demə, bu göstərici ümumi istifadə yolları üçün nəzərdə tutulan motosikletlər arasında rekord göstəricidir.

Əlbəttə, yüzlərlə və hətta minlərlə texnika var ki, turbinlərlə, kompressorlarla və müxtəlif modifikasiyalarla təchiz olunub, bəzən onların sürəti 400 km/saata çatır. Amma bütün bunlar qeydiyyata alınmayan motosikletlərdir, onlar rəsmən ümumi istifadə yollarında istifadə üçün nəzərdə tutulmayıb. Stormbringer isə tam “sənədlər paketinə” malikdir və ümumi istifadə yollarında əsl çempion adlandırıla bilər!

Firmanın mütəxəssisləri motosikletin mühərrikini gücləndirməklə yanaşı, motosikletdə digər dəyişikliklər də ediblər. İlk növbədə onun çəkisini 195 kiloqramadək azaldıblar. Bundan başqa, motosikletə döymə təkərlər (OZ) və ksenon faralar quraşdırılıb. Amma ən maraqlı təkmilləşdirmə... arxa tərəfi göstərən kameranın quraşdırılmasıdır.

Bu addımı başa düşmək olar, belə ki, sürət 300 km/saat həddini keçdikdə güzgüyə istədiyin kimi rahat baxmağa fürsət tapmırsan, həm də güzgülər motosikletin sürətini əhəmiyyətli dərəcədə aşağı salır. Odur ki, indi arxa tərəfi göstərən kameradakı görüntülər ön tərəfdəki şüşəyə ötürülür və göz önündə olur.

Sürücü hətta motosikleti 300 km/saat sürətlə idarə etdikdə belə, arxadan kiminsə onu ötmək istəyib-istəmədiyini müəyyən etmək üçün daha güzgüyə boylanmalı olmur.

İtalyanlar məhdud sayda Suzuki B-King buraxdılar

Yaponiyanın motosiklet istehsalçısı Suzuki-nin italyan bölməsi olan Suzuki Italia şirkəti B-King populyar motosikletinin özü tərəfindən hazırlanan versiyasını buraxıb. Bu versiya məhdud seriya ilə buraxılır (Limited Edition).

Yeni motosikletə Hamamatsu Hyaku B-King adı verilib. O, şirkətin yüzillik yubileyi münasibəti ilə istehsal edilib. Motosikletin adı yapon dilindən tərcümədə “yüz” mənasını verir.

Məsələ ondadır ki, Suzuki Italia şirkəti bu Hamamatsu motosikleti üçün xüsusi bodi-kit hazırlayıb, onun tərkibinə səsboğucu, tutqun qara rəngli üst elementlər, habelə fərqli dizaynlı əsas işıq və quyruq hissədəki işıq daxildir. Bu, o deməkdir ki, adi B-King motosikletlərinin sahibləri, sadəcə olaraq, öz motosikletlərinə dəyişikliklər etmək üçün sözügedən bodi-kit dəstini əldə edə bilərlər. Hamamatsu Hyaku B-King-in qiyməti 14.500 avrodur.  
B-King 1340 kub santimetr həcmli mühərriki olan motosikletdir.

Mühərrik 4 taktlı, 4 silindrlidir, maye vasitəsilə soyudulur, silindrin diametri 81 mm, porşenin gedişi 61 mm-dir, sıxılma dərəcəsi 12,1-dir. Əyləclər disklidir, ön tərəfdə 310 mm diametrli iki diskli radial əyləc (4 porşenli supportlarla), arxada isə 260 mm diametrli bir diskli əyləc quraşdırılıb. Qabarit ölçüləri (uzunluq-en-hündürlük): 2220х800х1085 mm.

Təkər bazasının ölçüsü: 1525 mm. Oturacağın hündürlüyü: 805 mm. Tam kütləsi: 255 kq. Yanacaq bakının həcmi: 16,5 litr. Motosiklet alıcılara iki rəngdə təklif olunur: qara və gümüşü.

Raleri-dən özütündləşən qurğular

Boloniyada (İtaliya) yerləşən Raleri brendi motosiklet dəbilqələrinin günlükləri üçün özütündləşən LCDrive “ağıllı” qurğularını təklif edir. Bu qurğu maye kristallı texnologiyalar əsasında hazırlanıb, onun üçün enerji mənbəyi rolunu günəş batareyaları oynayır.

Motosikletçilərin öz həmkarları üçün hazırladıqları bu qurğular motosiklet sürücüsü üçün komfortu artırır və motosiklet idarə olunan zaman görmə şəraiti dəyişdikdə (məsələn, sürücü geniş və işıqlı yoldan kölgəli yerə, ağacların və evlərin arasına keçdikdə, yəni məkanın işıqlandırılma dərəcəsi kəskin dəyişdikdə) sürücünün diqqətinin idarəetmədən yayınmamasına şərait yaradır.

LCDrive qurğuları ətrafdakı işıqlandırma səviyyəsində baş verən dəyişikliklərə dərhal uyğunlaşaraq sürücü üçün maksimal komfortlu görmə şəraiti yaradır. Bundan başqa, LCDrive qurğusunun şüşəsi heç vaxt tərləmir.

LCDrive qurğusu vizora quraşdırılan əlavədir, onun vizora bərkidilməsi üçün detallar komplektasiyaya daxildir.

LCDrive ilk dəfə 2008-ci ildə prototip qismində nümayiş etdirilib, indi isə onu sərbəst şəkildə almaq, o cümlədən onlayn-mağazadan əldə etmək olar. Onun qiyməti: 216 avro, ölçüləri 275x115x2 mm-dir. Sifariş əsasında müxtəlif rəngli – göy, yaşıl, çəhrayı və kəhrəba rəngində LCDrive sifariş vermək olar.


Hazırladı: Zaur Əzizov 


© 2010 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.




Şərhlərin sayı: 0

AVATAR
Hələ heç kim şərh verməyib. Birinci siz olun.