Daewoo Matiz avtomobili təkcə zərif cins üçün deyil

Просмотров: 9124
Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil
  • Daewoo Matiz avtomobili təkcə zərif cins üçün deyil

Bu gün Daewoo Matiz istər birinci, istərsə də ikinci bazarda qiymət baxımından ən əlçatan avtomobildir. Məhz bu fakt bəzən Matiz-in potensial alıcılarını qorxudur. Hətta bəziləri deyirlər ki, bu “yarımavtomobildə” getməkdənsə, ümumiyyətlə avtomobilə malik olmamaq yaxşıdır. Amma bu “balacanın” sükanı arxasına heç olmasa bir dəfə keçənlər çox zaman ona münasibətlərini dəyişirlər.

Kim nə deyir-desin, Daewoo Matiz-in simpatik dizaynı var. Bəzi bədxahların “təkərlər üzərində təsərrüfat çantası” adlandırdıqları bu avtomobil kifayət qədər maraqlı görünür və qətiyyən xoşagəlməz hisslər yaratmır. Burada təəccüblü heç nə yoxdur, axı Matiz-in xarici görünüşünü koreyalılar deyil, bütün dünyada məşhur olan ItalDesign studiyasının mütəxəssisləri fikirləşiblər. Özü də ən maraqlısı budur ki, əvvəlcə bu avtomobil Fiat konserni üçün hazırlanmışdır! Amma italyanlar naməlum səbəblərdən ondan imtina etdilər, ItalDesign təmsilçiləri isə bu kuzovu Daewoo-ya təklif etdilər. Beləliklə də Matiz ərsəyə gəldi.

Azərbaycanın ikinci avtomobil bazarında Daewoo Matiz avtomobillərinin böyük əksəriyyəti Özbəkistan mənşəlidir, axı bu model 2001-ci ildən orada buraxılır. Amma bəzən Avropa və ya Koreyadan ölkəmizə gətirilən Daewoo Matiz avtomobillərinə də rast gəlinir. Bir qayda olaraq, onların təchizatı kifayət qədər yaxşı olur və onlar bir neçə transmissiya variantı ilə təklif olunurlar: mexaniki transmissiya, avtomat transmissiya, və ya pilləsiz variator (yeri gəlmişkən, avtomat transmissiya Matiz-ə Özbəkistanda da quraşdırılır). Bir qədər irəliyə gedərək qeyd edək ki, Koreya avtomobillərinin təmiri üzrə səriştəli ustalar variator quraşdırılmış modifikasiyaları almamağı təkidlə tövsiyə edirlər. O, şəhərdə rahat olsa da, sıradan çıxdığı təqdirdə avtomobil sahibi sadəcə olaraq fantastik məsrəflərə məruz qalır (xüsusən də işlənmiş Matiz-in qiyməti ilə müqayisədə). Məsələ burasındadır ki, variatoru təmir etmək sadəcə mümkün deyil və zavodda bərpa olunmuş aqreqat almaq lazım gəlir (yeniləri sadəcə olaraq satılmır, onlar yalnız yığım üçün konveyerə daxil olur). Variatorun qiyməti təxminən 2.400 dollardır, üstəlik, onun dəyişdirilməsinə 200 dollar sərf etmək lazım gələcək!

Avadanlıqlar kasaddır
Bizim bazarda sayı yetərincə olan sadə Daewoo Matiz avtomobillərində ümumiyyətlə heç bir əlavə avadanlıq yoxdur. Onlarda nəinki kondisioner, elektropaket və ya hidrogücləndirici, hətta arxa şüşətəmizləyən də yoxdur! Amma hidrogücləndiricisiz də keçinmək olar, xüsusən də Matiz-i qadın idarə edirsə (açığını deyək ki, bu avtomobili idarə edənlərin çoxu zərif cinsin nümayəndələridir). Amma bununla belə, bu avadanlıqlarla təchiz olunan Matiz almağınız məsləhətdir (hidrogücləndiricinin daxil olduğu komplektasiyaya adətən iki elektrik şüşə qaldırıcısı, o qədər də keyfiyyətli olmayan maqnitola və mərkəzi kilid daxildir). Yeri gəlmişkən, təcrübə göstərir ki, əgər mərkəzi kilid varsa, qapıların motorları kifayət qədər zəif olur və qışda normal işləyə bilmir (bu səbəbdən bəlkə də mərkəzi kilidin olmaması daha yaxşıdır). Firma siqnalizasiyasının olmamasından çox da məyus olmayın, adətən onun da keyfiyyəti yüksək olmur.
Bəzən ara söhbətlərində eşidirik ki, Daewoo Matiz-in kuzovu tez paslanır. Əslində bu, cəfəngiyyatdır. Doğrudur, bu avtomobilin metalı nazikdir, amma özbək Matiz-ləri korroziyaya qarşı kifayət qədər yaxşı müdafiəyə malikdir ki, bu da kuzovu paslanıb xarab olmaqdan qoruyur. Buna görə də məsləhət görürük ki, məsələn, 5 illik Matiz almaq istəsəniz, əlavə antikorroziya tədbirlərini unutmayın.

1 litrlik mühərrik daha yaxşıdır
Ölkəmizin yolları ilə hərəkət edən  Daewoo Matiz avtomobillərinin çoxunun kapotunun altında 0,8 litr həcmə və 52 at gücünə malik üç silindrli kiçik motorlar olur (bəzi Matiz avtomobillərində onun gücü 50, bəzilərində isə 56 at gücü təşkil edir). Aydın məsələdir ki, gücü bu qədər olan mühərriklə yolda sürətli hərəkətdən danışmağa dəyməz. Hərçənd ki, işıqforun yanında dayanan Matiz çox vaxt yanındakı avtomobillərin sahiblərini təəccübləndirərək kifayət qədər sürətli təkanla start götürür. Doğrudur, hərəkət sürəti 60-80 km/saata çatdıqda o, yetərincə imkanları olan zavod avtomobilindən mühərriki çətinliklə işləyən nəqliyyat vasitəsinə çevrilir. Kondisioner işlədiyi vaxtlarda bu hal özünü daha aydın büruzə verir, belə ki, kondisioner həqiqətən mühərrikin gücünün xeyli hissəsini aparır.

2002-ci ildən Daewoo Matiz-ə 0,8 litrlik mühərrikdən başqa həm də 1,0 litr həcmə və 64 at gücünə malik dörd silindrli güc aqreqatı quraşdırmağa başladılar. Əlbəttə, bu mühərrik də balaca Matiz-i idman bolidinə çevirmir, amma hər halda avtomobilin dinamikasını xeyli yaxşılaşdırır. Ümumiyyətlə, 1 litrlik mühərrik quraşdırılmış Matiz-in üstünlüyü avtomobilin maksimal sürətinin daha yüksək olmasında deyil, mühərrikin fırlanma dövrəsinin bütün diapazonlarında onun dartı qüvvəsinin xeyli yaxşılaşmasındadır. Bundan başqa, avtomobil ustaları hesab edirlər ki, 1 litr həcmli mühərrikin resursu daha çoxdur və o, daha gec xarab olur. Hərçənd ki, 0,8 litrlik mühərrik də kifayət qədər davamlıdır. Əlbəttə, əsaslı təmirdən çıxmadan bu cür avtomobilin 500 min kilometr məsafə qət etmək iqtidarında olması inandırıcı deyil, amma 150 və ya 200 min kilometr məsafəni qət etməyi bacarmalıdır.

Təcrübə göstərir ki, Matiz-ə yalnız yaxşı yanacaq doldurulmalıdır, çünki keyfiyyətsiz benzin doldurulduqda onun yandırıcı şamları tez sıradan çıxa, forsunkaları da tez tutula bilər (cəmi bir neçə min kilometrdən sonra). Yeri gəlmişkən, “93” benzini işlətməyiniz məsləhətdir, “95”in istifadəsi əhəmiyyətli üstünlüyə gətirib çıxarmır. Yağı ən azı on min kilometrdən sonra dəyişmək tövsiyə olunur. Özü də texniki xidmət əməliyyatının zəruriliyi barədə avtomobil özü xəbərdarlıq edir, bu zaman “check engine” lampası yanıb-sönür (hərçənd ki, bəzi hallarda bu siqnal yanacaqçiləmənin idarə olunması sisteminin sensorlarının sıradan çıxdığını bildirir).

Sürət qutusuna yeni yağ lazımdır
Daewoo Matiz avtomobillərinin böyük əksəriyyətinə quraşdırılan mexaniki sürət qutusu kifayət qədər etibarlı işləyir. Hərçənd ki, sürücülər bəzən sürət pillələrinin işə salınmasında çətinlik yaranmasından şikayət edirlər. Belə hallarda hər şeydən əvvəl sürət qutusunda yağı dəyişmək lazımdır. Özü də yaxşı sintetik yağ almağınız tövsiyə olunur, bundan sonra 90% hallarda transmissiyada sürət pillələrinin işi qaydaya düşür. Pilləsiz variatorun problemlərindən yuxarıda bəhs etmişik. Avtomat sürət qutusuna gəlincə, o, avtomobilin sahibinə kifayət qədər uzun müddət xidmət göstərməlidir. Amma avtomat sürət qutusu olan işlənmiş avtomobil alarkən çox diqqətli olmaq lazımdır. Bundan başqa, 3 pilləli avtomat sürət qutusu olan Matiz aldıqda avtomobilin yolda yavaş hərəkət edəcəyinə hazır olun.

Daewoo Matiz-in asqısı ən azı bu cür avtomobil üçün pis deyil. Kiçik və orta dərinlikli çuxurları bu asqı ilə rahatca geridə qoymaq olar, amma bir qədər dərin çuxurları bu asqı ilə dəf etmək Matiz üçün problem yaradacaq. Müəyyən detalların, məsələn, kürəvi dayaqların və ya amortizatorların resursu böyük deyil, amma 50-80 min kilometr məsafəyə kifayət etməlidir. Burada hər şey avtomobilin idarə olunması tərzindən asılıdır. Əgər sahibi Matiz-i “amansızcasına” istismar edərsə, o, tez “haldan düşər” və əlavə maliyyə məsrəfləri tələb edə bilər.

Matiz-in bir çox sürücüləri zavodda bu avtomobilə quraşdırılmış şinlərin çox pis olduğunu hesab edirlər. Təcrübə göstərir ki, quru yol örtüyü üzərində təkərlər az-çox hərəkət xətti üzrə irəliləyirlər, amma yağış yağdıqda vəziyyət xeyli dərəcədə pisləşir. Buna görə də, ikinci bazardan aldığınız Matiz-in şinləri zavod şinləridirsə, yaxşı olar ki, onları dərhal yeniləri ilə əvəz edəsiniz.

© 2012 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.