Chevroletin ən böyük sedanı

Просмотров: 4973
Chevroletin ən böyük sedanı

Dünyada baş verən iqtisadi böhran Amerikanın avtomobil bazarına da öz təsirini göstərib. Amerikada işlənmiş avtomobillərin qiymətləri kifayət qədər aşağı düşüb. Bu da bu bazara olan diqqəti artırır. Hal-hazırda xaricdən işlənmiş avtomobil almaq istəyənlər ilk öncə Amerika bazarı ilə maraqlanırlar. Biz də bu məqamı diqqətə alaraq sizləri Amerikada məşhur olan və yerli sürücülərimiz arasında istifadə olunan bir modellə daha yaxından tanış etmək istəyirik.   

Bu model Chevrolet avtomobilləri ailəsində ən böyük sedandır. 

Qısaca avtomobilin tarixi haqqında...

1989-cu ildə Chevrolet siniflərinə görə tamamilə fərqli olan iki avtomobili – sedan və mikroavtobusu ChevroletLumina adı altında ictimaiyyətə təqdim etdi. Siniflərinə görə bir-birindən tamamilə fərqlənən iki avtomobilin eyni ad daşıması ilk öncə istehlakçıları çaş baş saldı (qeyd edək ki, sedan Chevrolet Lumina, mikroavtobus isə Chevrolet Lumina APV adını daşıyırdı). Bu hal 1997-ci ilədək davam etdi. Həmin il Chevrolet Lumina APV adı Chevrolet Venture adı ilə əvəz olundu. 
Chevrolet Lumina modeli General Motors korporasiyasının W platformasında hazırlanmışdı.

Qeyd edək ki, bu platforma Pontiac Grand Prix, Oldsmobile Cutlass Supreme, Oldsmobile Intrigue, Buick Regal və Buick Century (1996-cı ildən sonra) kimi avtomobillərin hazırlanmasında istifadə olunub. Orta ölçülü Chevrolet Lumina həmin dövrdə iki kuzov variantında təklif olunurdu: 4 qapılı sedan və 2 qapılı kupe.

Azərbaycana bu modelin yalnız dördqapılı versiyası idxal olunub.
Bu model həmçinin həmin illərdə ABŞ polisinin istifadə etdiyi avtomobildir. Geniş salona, rahat idarəetməyə və yumşaq asqıya sahib olması bu avtomobilin mülki insanlar arasında da populyarlıq qazanmasına səbəb olub. Yerli Lumina sahibləri öz avtomobillərindən razı olduqlarını bildirirlər.

Avtomobilin asqı hissəsi çox sadə quruluşa malikdir. Asqıda istifadə olunan hər bir detalın resursu kifayət qədər çoxdur. Bu avtomobil bizim yollarda özünü çox gözəl aparır və dözümlüyünə görə seçilir. İstənilən servis mərkəzində rahatlıqla avtomobilə qulluq etmək mümkündür.  

1995-ci ildə Chevrolet Lumina-nın xarici görünüşü ciddi dəyişikliklərə uğradı, kupe kuzovlu versiyanın adı dəyişdirilərək Chevrolet Monte Carlo adı ilə əvəzləndi. Alıcılara təklif olunan mühərriklərin siyahısında 3,1 litr həcmli LHO V6-nı 3,1 litr həcmli L82 V6 əvəz etdi (o həmçinin 3100 SFI adı ilə tanınır). Bütün mühərriklərlə birlikdə 4 pilləli 4T60-E avtomat sürət qutusu təklif olunurdu.

Azərbaycana idxal olunan avtomobillərin əksəriyyəti 1995-ci ildə yeniləşdirilmiş modellərdir. 3.1 litr həcmli mühərrik öz etibarına görə seçilir. Vaxtlı-vaxtında texniki baxışdan keçdikdə mühərrik öz sahibinə uzun müddət xidmət etmək iqtidarındadır. Avtomobildə istifadə olunan yanacağa diqqət etmək lazımdır. Keyfiyyətsiz yanacaq mühərrikin yanacaq bölüşdürücü sisteminə, katalizatorlara, alışdırma şamlarına və s. öz təsirini göstərir.

Mühərrikin quruluşu və yerləşdirilməsi çox rahatdır. Məsələn, Chevrolet Lumina-da mühərrikin kəmərlərini dəyişdirmək üçün digər modellərdə olduğu kimi, avtomobilin yarı hissəsini sökmək lazım deyil. Mühərrikin bu formaya malik olması onun serviz xərclərini də azaldır. Mühərrikdə ən maraqlı məqam isə avtomobilin elektron idarəetmə blokunun hava filtri olan hissədə yerləşdirilməsidir.

Bu da öz növbəsində həmin blokun qızmasının qarşısını alır. Həmçinin avtomobilin elektron sistemi müasirliyinə görə seçilir. Məsələn, adətən, qış aylarında salonun qızdırılması üçün avtomobildə qızdırıcı sistemdən istifadə edirik. Bu avtomobildə həmin sistemi işə saldıqda avtomatik olaraq kondisioner də işə düşür. Bir müddət havada olan rütubəti aradan qaldırdıqdan sonra kondisioner avtomatik olaraq sönür. Bu sistem, adətən, bahalı avtomobillərdə müşahidə olunur.

Avtomatik şüşə qaldıranlar, qap
ıların avtomatik açılıb-bağlanması sistemi, idarəetmə düymələri və s. kifayət qədər keyfiyyətli və uzun ömürlüdürlər.

Avtomobildə ən zəif yer onun salonudur. Salonda istifadə olunan materiallar öz keyfiyyətləri ilə seçilmir. Avtomobilin ön paneli qızmar günəş şüalarından deformasiya uğrayır və çatlayırlar. Tavana çəkilmiş örtük isə istifadə olunmuş yun parçanı xatırladır.

26 aprel 2001-ci ildə Chevrolet Lumina-nın istehsalı dayandırıldı.
Asiya ölkələrində o, Buick (Buick Century/Regal) markası altında satılmaqda davam etdi. Latın Amerikasında isə Lumina avtomobili Omega adı altında satılırdı. 
Bu bizim ən çox  tanıdığımız Opel Omaga-dır.

Chevrolet Lumina modelinin texniki göstəriciləri

Mühərrik    3,1
Silindrlərin sayı    6
Həcmi, kub.sm.    3137
At gücü     162
Maksimal sürət, km/saat    190
0-100 km/saat, saniyə ilə    10
Transmissiya    4 pilləli avtomatik



© 2008 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.

Şərhlərin sayı: 0

AVATAR
Hələ heç kim şərh verməyib. Birinci siz olun.