Chevrolet Captiva

Просмотров: 4195
Chevrolet Captiva

Bu gün Chevrolet markası ölkəmizdə böyük populyarlığa malikdir. Bu da əsassız deyil, belə ki, bu gün praktiki olaraq hər bir avtomobil sinfində bu brendin modellərinə rast gəlmək olar. Krossoverler sinfində də Chevrolet markasının təmsilçisi var. Bu, Chevrolet Captiva modelidir.

Chevrolet Captiva avtomobilinə bircə dəfə nəzər salmaq yetər ki, qarşınızdakının hamar yolları sevən avtomobil olduğunu müəyyən edəsiniz (son illərdə avtomobil bazarının bu seqmenti bir çox ölkələrdə, o cümlədən bizdə populyar seqmentdir). Captiva-nın transmissiyasının konstruksiyası da bu fikri möhkəmləndirir (avtomobil daimi ön ötürücülüdür, muftanın köməyi ilə avtomobilin arxa oxu da işə düşür).

Sonuncunun hansı məqamda işə düşəcəyini elektronika təyin edir. Sürücü bu prosesə müdaxilə edə bilmir, çünki avtomobildə əlavə klavişlər və ya rıçaqlar yoxdur (adətən ciddi ofrouderlər bu cür klavişlərlə və rıçaqlarla komplektləşdirilir).

Əsl ofrouderlərin fərqləndirici əlamətlərindən burada yalnız artırılmış klirensə və kuzovu yolda sıçrayan daşların təsirindən qoruyan qara plastik örtüyə rast gəlmək olar. Avtomobilin qalan əlamətləri tipik krossoverlərin əksəriyyəti üçün səciyyəvi olan əlamətlərdir.

Eksteryer

Kuzovun iti sürət təəssüratı yaradan cizgiləri modelin ofrouder keyfiyyətlərindən daha çox, dinamik imkanlarından xəbər verir. Bəziləri bu fikirdədir ki, Chevrolet Captiva eyni sinfə mənsub olan məşhur Lexus RX350 və hətta BMW X3 avtomobillərinə oxşayır (Nissan X-Trail və ya Hyundai Tucson daha çox “kvadratşəkillidir” və Captiva-ya o qədər də bənzəmir). Amma bu müqayisə potensial alıcını qorxutmamalıdır.

Yuxarıda qeyd edilən oxşarlıq yalnız zahiri oxşarlıqdır, daxildən isə Captiva daha sadədir. Əks halda modelin qiyməti bu qədər münasib olmazdı. Bu qiymət, həqiqətən, ölkəmizdəki alıcılarda maraq oyada bilər. Baza komplektasiyasında Chevrolet Captiva-nın qiyməti 29 000 manatdır (?). Qiymətin münasib olması heç də baza komplektasiyasının kasad olması demək deyil.

İstehsalçı sürücünü və sərnişinləri bu gün olduqca zəruri olan təhlükəsizlik elementləri ilə təchiz edib. Zəruri miqdarda təhlükəsizlik kəmərləri və yastıqları var.

Bundan başqa, Captiva hərəkət kursunun sabitliyini və yoxuşdan aşağı enərkən avtomobilin dayanıqlığını təmin edən sistemlə təchiz olunub (sonuncu sistem avtomobilin yoxuşdan enərkən böyük sürət yığmasının qarşısını alır, bununla da əyləcləri həddən artıq qızmaqdan qoruyur və digər problemləri əngəlləyir).


Captiva-nın salonunun ölçüləri elədir ki, baqaj yerində iki əlavə kreslo yerləşdirmək mümkündür. Özü də onları uşaq yerləri adlandırmaq olmaz, çünki sərnişinlərin ayaqlarına kifayət qədər yer qalır. 7 yerlik versiyada baqaj yeri heç də kiçik deyil.

Sevindirici haldır ki, oturacaqların kürək hissələri qatlanaraq hamar döşəmə əmələ gətirir.

Mühərrik

Chevrolet Captiva alıcılara 2,4 və 3,2 litr həcmli iki mühərriklə təklif olunur. Baza komplektasiyasına daxil olan 2,4 litr həcmli mühərrikin qüvvəsi 137 at gücünə bərabərdir.

Əlbəttə, ondan yüksək dinamika gözləmək düzgün olmazdı, amma şəhər axınında bu cür Captiva-nın sahibi özünü tamamilə inamlı hiss edə bilər. Yüksək sürət həvəskarları üçün daha güclü mühərrik nəzərdə tutulub.

Transmissiyaya gəldikdə, alıcılara iki transmissiya arasında seçim etmək imkanı verilir: avtomat və mexaniki. Mexaniki transmissiyanın qısa dəstəyi sürücünün göstərişlərinə yaxşı tabe olur, bir sürətdən digərinə keçid asan və səs-küysüz baş verir.

Hər halda, bir çox daha ucuz modellərdən fərqli olaraq burada “üçüncü” sürətin əvəzinə “beşinci” sürətə düşmürsən.


Avtomat transmissiya da kifayət qədər uğurlu işləyir və mühərriklə əla tandem yaradır. Sürət yığmaq lazım olduqda bu cütlük var gücü ilə işə qoşulur və avtomobil axınında sizi irəli aparır.

Yeri gəlmişkən, ümumən Captiva-da səs izolyasiyası lazımi səviyyədədir. Hətta mühərriki “son nəfəsinə qədər sıxdıqda” belə, salonda səs sizi narahat etmir.

Model Daewoo mühəndisləri tərəfindən hazırlanıb. Oturacaqların yastıqları rahatlığı ilə adamı sevindirir. Sürücü oturacağını avtomatik olaraq tənzimləmək mümkündür.

Dördmilli sükan çarxı bir qədər nazik görünür, əvəzində onun üzərində Cruiz-kontrolun və CD-pleyerin idarəetmə düymələri var. Pleyerin səsləndirilmə səviyyəsi yüksəkdir və bu, yəqin ki, melomanları qane edəcək. Sükan kifayət qədər qaneedicidir və yüksək sürətlərdə tam komfortu təmin edir.

Captiva-nın sükanı arxasında yoldakı kiçik nahamarlıqlardan qorxmaya bilərsən, ümumən avtomobilin hərəkəti rəvandır. Digər tərəfdən, əyləclər də sürücünün avtomobilə inamını artırır: onlar effektiv işləməklə yanaşı, həm də dayanma komandasını səlis yerinə yetirir. Bloklanma əleyhinə sistem də özünü yaxşı tərəfdən göstərir.

O, işə düşərkən sürücünün ayağını səliqə ilə yuxarıya doğru itələyir. Avtomobilin güzgülərini də xüsusi qeyd etmək lazımdır. Onların köməyi ilə sürücü həm avtomobilin yan tərəflərini, həm də alt hissəsini nəzarətdə saxlaya bilir.

Funksionallığa üstünlük verən insanlar arasında Chevrolet Captiva avtomobilinə yetərincə tələbat olacaq. Bu avtomobilin “orta ölçülü” mühərriki, geniş salonu və münasib qiyməti bu cür düşünməyə əsas verir. Həmçinin Captiva-nın zərif xarici görünüşü də onun mövqeyini möhkəmləndirəcək.



Vasif Xəliloğlu

Foto: Toğrul Məmmədov

© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.



Şərhlərin sayı: 0

AVATAR
Hələ heç kim şərh verməyib. Birinci siz olun.