Chevrolet Aveo kimin seçimidir?

Просмотров: 4410
Chevrolet Aveo kimin seçimidir?

Kiçik avtomobillər adətən gənc, enerjili, aktiv, ailə və təsərrüfat qayğılarından azad olan insanlara təklif olunur. Yeni Chevrolet Aveo bu ənənəni pozur. General Motorsda hesab edirlər ki, o, təkcə gənclərə deyil, həm də ailəli insanlara tam uyğundur. Görəsən burada səhv yoxdur ki? Gəlin bunu  birgə araşdıraq.

Öncə tarixə müraciət edək. Əvvəllər kiçik avtomobillər öz xarici görünüşləri ilə kimisə heyran etməyə qadir deyildi. Ya avtomobil dizaynerləri hesab edirdilər ki, kompakt modellər dizayner fantaziyasını işə salmaq üçün həddən artıq kiçikdir, ya da, ümumiyyətlə, bu avtomobillərin dizaynına ikinci dərəcəli bir iş kimi yanaşırdılar.

Təəccüblü deyil ki, ümumi kütlədən seçilən istənilən kiçik avtomobil dərhal klassik modelə çevrilmək şansına malik idi!

Zaman keçdikcə kompakt avtomobillərin xarici görünüşü yaxşılaşdı. Əvvəlcə onların xarici görünüşündəki eybəcərliklər aradan qalxdı. Sonra isə onlar cəlbedici olmağa başladı! Aveo modeli cəlbedici “mini”lərin son dəbə uyğun yeni dizayner dalğasının növbəti təmsilçisidir.

Son dövrlərin tendensiyası daim mühərrikin gücünün artırılmasını diqtə edir – mühərrikin həcminin hər litrinə getdikcə daha çox at gücü düşür. Hər bir aktiv sürücü üçün xoş olan bu tendensiyanın fonunda digər bir yeni dalğa – avtomobilin funksionallığının artması çoxlarının diqqətindən yayındı. Müasir avtomobil hazırlanarkən onun daxili məkanı son santimetrə qədər hesablanır.

Chevrolet Aveo-nun timsalında bunun bir çox müsbət cəhətləri var. Avtomobilin salonunda dörd nəfər darısqallıq hiss etmədən yerləşə bilər. Arxa oturacaqda üç sərnişin də otura bilər, amma bu halda onların komfortluluğuna bir qədər xələl gətirilmiş olur.

Dizaynerlər salonda köklü dəyişikliklər etməyərək, xırdalıqlarla kifayətləniblər Məsələn, cihazlar panelini təzələyiblər. Əslində sabitliyə bu cür meyl dizaynerlər üçün müsbət cəhətdir, belə ki, modelin erqonomikası əvvəlkitək yaxşı səviyyədə qalıb.

Bu sinfə aid olan avtomobillərlə bağlı daha bir stereotip salonun hazırlanmasında işlənən materiallarla əlaqədardır. Adətən salon, yumşaq desək, kasad materiallarla işlənir. Amma bu məsələdə Aveo-ya irad tutmaq mümkün deyil: onun salonu layiqli materiallardan hazırlanıb, həmçinin salonun dizaynı da darıxdırıcı deyil.

Aveo-nun ailə avtomobili olduğunu söyləyənlər ilk növbədə, onun baqaj yerini nəzərdə tuturlar.

Yeri gəlmişkən, 1,4 litr həcmli yeni benzin mühərriki yaxşı uzaq səfərə çıxmaq üçün münasib variantdır. Hər şeydən əvvəl ona görə ki, o, yanacağa qənaət edir: 100 km/saat məsafəyə 5,5 litr benzin gənc ailə üçün heç də yüksək məsrəf deyil.

Amma belə avtomobildən güclü dinamika gözləməyə dəyməz. Hətta əvvəlki mühərriklə müqayisədə aqreqatın qüvvəsi 12 vahid artması da kömək etmir. Amma vəziyyət heç də çıxılmaz deyil.

Bu avtomobil yetərincə dinamikdir. Bu sürücüyə problem yaratmır, əksinə, xoş ovqat gətirir. Mühərrikin fırlanma dövrələrini 3000-4000 civarında saxlasanız, Aveo-nu kifayət qədər sürətlə qovmaq olar.

Bu şərtlə ki, arxa oturacaqda çoxlu sərnişin olmasın. Böyük ailə üçün böyük sürət alınmır. Belə hallarda avtomobil sakit irəliləyir. Əvəzində onun hərəkəti rəvan olur. Asqı yoldakı nahamarlıqları “udaraq” salondakıların silkələnməsinə imkan vermir. Amma döngələrdə yana meyllənmələr özünü büruzə verir.

Bizcə, GM təmsilçilərinin yeni model üçün müəyyən etdiyi statusda heç bir yanlışlıq yoxdur. Aveo ailə avtomobili haqqında təsəvvürlərə tam uyğundur. Avtomobilin qabaritləri kiçik olduğuna görə həyətdə və ya supermarketin qarşısında parkinq zamanı problemlər yaranmır.

1,2 və 1,4 litr həcmdə mühərrikləri olan Chevrolet Aveo (mühərriklərin gücü, müvafiq olaraq, 84 və 98 at gücü təşkil edir) bizim bazarda ötən ilin martında peyda oldu.

Mühərriklərin maksimal gücü əvvəlki modellərlə müqayisədə artsa da, yanacaq sərfi azalıb (1,2 litr həcmli aqreqatda hər 100 kilometrə 5,5 litrədək, yəni 14%, 1,4 litr həcmli aqreqatda isə hər 100 kilometrə 6 litrədək, yəni 10% azalma qeydə alınıb). Bu model üçün dizel mühərriki nəzərdə tutulmayıb.

İdarəetmə
Avtomobil yaxşı idarə olunur, amma mühərrik daim yüksək fırlanma dövrələri formasında “dopinq” tələb edir.

Salon
Salonun materiallarının keyfiyyəti yaxşı təsir bağışlayır.

Komfort
Rahat oturacaqlar və yumşaq örtük uzaq səfərlər üçün yaxşı yarayır.

 Təhlükəsizlik
Baza komplektasiyasında yalnız iki frontal təhlükəsizlik yastığı nəzərdə tutulub.

 Müsbət və mənfi cəhətlər
+ Yaxşı erqonomikaya malik komfortlu salon, yanacağın az işlədilməsi, cazibədar xarici görünüş.
– O qədər də güclü olmayan mühərrik, çox da böyük olmayan baqaj yeri. 

Texniki xarakteristikalar
Marka və model – Chevrolet Aveo 1.4
Qabaritlər – 3920х1680х1510 mm
Mühərrik – 4 silindrli benzin (1406 kub sm.,  98 at gücü/1 dəqiqədə 6000 dövrə)

Transmissiya – avtomatik, dördpilləli

Dinamika – 100 km/saat sürət yığma: 13 saniyəyə; maksimal sürət: 172 km/saat

Rəqiblər: Opel Corsa, Ford Fiesta.


Bizim rəyimiz
Qənaətcil və kompakt Aveo nəqliyyatla dolu şəhər həyatının ahənginə tam uyuşur. Artıq öz büdcəsini formalaşdırmış gənc ailə Aveo-nun xoşagələn xarici görünüşü və yaxşı hərəkət keyfiyyətləri sayəsində ona laqeyd qalmayacaq. Odur ki, alıcı auditoriyası istehsalçı tərəfindən düzgün seçilib.



Məlahət Ramizqızı



© 2009 Bütün hüquqlar qorunur. Məqalələrdən və şəkillərdən istifadə edərkən “avtomobil.az”a istinad zəruridir.




Şərhlərin sayı: 0

AVATAR
Hələ heç kim şərh verməyib. Birinci siz olun.